ކުޑަކުދިންގެ ސިރަޕްތަކުގައި ނުރައްކާތެރި މާއްދާއެއް އެކުލެވޭތީ ސަމާލުވާން އެދިއްޖެ

ކުޑަކުދިންނަށް ދޭ ސިރަޕްތަކުގައި ނުރައްކާތެރި މާއްދާއެއް އެކުލެވޭތީ ސަމާލުވާން މޯލްޑިވްސް ފުޑް އެންޑް ޑްރަގް އޮތޯރިޓީން އެެދެފިއެވެ.

އެ އޮތޯރިޓީން ބުނީ، ކުޑަކުދިންނަށް ދޭ ސިރަޕްތަކުގައި، ސިއްހީ ނުރައްކަލަށް ހުށަހެޅިދާނެ މާއްދާއެއް ކަމަށްވާ، "diethylene glycol and ethylene glycol” ހިމެނިފައިވާ ކަމަށް ދުނިޔޭގެ ސިއްހަތު ޖަމިއްޔާއިން އެލާޓް ކޮށްފައިވާތީ، މީގެ ކުރިންވެސް އެ އޮތޯރިޓީގެ ފަރާތުން ތިން އެލާޓްނެރެފައިވާ ކަމަށެވެ.

ދުނިޔޭގެ ސިއްހަތު ޖަމިއްޔާގެ އެލާރޓް އިން ކުރެއްވި އިތުރު އެލާޓްއެއްގައި އިންޑިޔާގެ ޕަންޖާބް ގައި އުފައްދާފައިވާ ސިރަޕްގައި ގައިވެސް އެ މާއްދާ ހުރި ކަމަށް ފާހަގަ ކުރައްވާފައިވާ ކަމަށް އެ ފުޑް އެންޑް ޑްރަގް އޮތޯރިޓީން ބުންޏެވެ.

"މިބޭހަކީ ރާއްޖެއަށް އިމްޕޯރޓް ކުރުމާއި ވިއްކުމަށް ހުއްދަ ކުރާ ބޭހުގެ ލިސްޓް (އެޕްރޫވްޑް ޑްރަގް  ލިސްޓް) ގައި ހިމެނޭ ބޭހެއް ނޫން ނަމަވެސް، ބޭސްސިޓީއަށް ނުވަތަ އެނޫންވެސް ގޮތަކުން ރާއްޖެއަށް މިބޭސް އިމްޕޯރޓް ވުމުގެ ފުރުސަތު އޮތްކަމަށް ވާތީ، މިކަމަށް ސަމާލުވުމަށް ދަންނަވަން" ފުޑް އެންޑް ޑްރަގް އޮތޯރިޓީން ބުންޏެވެ.

މީގެ އިތުރުން އެ އޮތޯރިޓީން ބުނީ، ރައްކާތެރިކަމުގެ ފިޔަވަޅެއްގެ ގޮތުން ބޭސްސިޓީއެއް ރާއްޖެއަށް އިމްޕޯރޓް ކުރާ ބޭސް ހާއްސަ ސަމާލު ކަމެއްދީގެން ޕޯރޓްތަކުގައި ބަލައިފާސް ކުރަމުން ގެންދާނެ ކަމަށެވެ.

އިތުރު މައުލޫމާތު ބޭނުންވާ ނަމަ، އެ އޮތޯރިޓީގެ މެޑިސިން އެންޑް ތެރަޕިއުޓިކް ގުޑްސް ޑިވިޝަންގެ ހޮޓްލައިން ނަންބަރ: 7200321 އަށް ގުޅުމަށް އެ އޮތޯރިޓީން ވަނީ އެދިފައެވެ.