"މިއަދު މިފެންނަނީ ޒަމާނަކު ނުދެކޭފަދަ މިނިވަން މާހައުލެއްގައި ނޫސްވެރިން މަސައްކަތް ކުރާތަން"

މިއަދު ދެކެމުން މިދަނީ ޒަމާނަކު ނުދެކޭ ފަދަ މިނިވަން މާހައުލެއްގައި ހާސްކަމެއްނެތި ނޫސްވެރިން މަސައްކަތް ކުރާތަން ކަމަށް ރައްޔިތުންގެ މަޖިލީހުގެ އިހަވަންދޫ ދާއިރާގެ މެންބަރު މުހައްމަދު ޝިފާއު ވިދާޅުވެއްޖެއެވެ.

ދުނިޔޭގެ ނޫސްވެރިކަމުގެ މިނިވަންކަމުގެ ދުވަހާއި ގުޅުވައިގެން ޝިފާޢު ކުރެއްވި ޓްވީޓެއްގައި ވަނީ، މީގެ 5 އަހަރު ކުރީގައި ނޫސްވެރި ކަމުގެ ޙާލަތު އޮތް ގޮތަށް ވިސްނާލުމަށް އެދިފައެވެ.

"މީގެ 5 އަހަރު ކުރިއަށް ވިސްނާލަމާ. އެދުވަހު މީޑިއާތަކަށް ދިންގެއްލުން. ނޫސްވެރިންނަށް ކުރިމަތިކުރުވި ތުރާތަކާއި މަސައްކަތްކުރި ނާމާން ބިރުވެރި މާހައުލު." ޝިފާޢު ވިދާޅުވިއެވެ.

މިއާއެކު ޝިފާއު ވިދާޅުވީ، މިއަދު ދެކެމުން މިދަނީ ޒަމާނަކު ނުދެކޭ ފަދަ މިނިވަން މާހައުލެއްގައި ހާސްކަމެއްނެތި ނޫސްވެރިން މަސައްކަތް ކުރާތަން ކަމަށެވެ.

ޝިފާޢު މިފަދައިން ވިދާޅުވެފައި ވީ ނަމަވެސް،ރިޕޯޓާޒް ވިތައުޓް ބޯޑާސް، (އާރުއެސްއެފް)އިން އަހަރަކު އެއް ފަހަރު ނެރޭ ވޯލްޑް ޕްރެސް ފްރީޑޮމް އިންޑެކްސް ނުވަތަ ނޫސްވެރިކަމުގެ ހާލަތު ދަރަޖަ ކުރާ އިންޑެކްސްގައި ރާއްޖެ 13 ދަރަޖަ ފަހަތަށް ވެއްޓި މިހާރު ވަނީ 100 ވަނައިގައި ހިމެނިފައެވެ.

ކޮންމެ އަހަރަކުވެސް ފާހަގަކުރާ ބައިނަލްއަގުވާމީ ނޫސްވެރިކަމުގެ މިނިވަންކަމުގެ ދުވަސް، މޭ 3ގައި އާންމު ކުރާ ވޯލްޑް ޕްރެސް ފްރީޑޮމް އިންޑެސްގައި މިދިޔަ 2022 ވަނަ އަހަރު ރާއްޖެ އޮތީ 87 ވަނައިގަ އެވެ. އެހެން ނަމަވެސް މިއަދު އާންމުކުރި ޕްރެސް ފްރީޑޮމް އިންޑެކްސްގައި ރާއްޖޭގެ ދަރަޖަ ވަނީ 100 ވަނައަށް ވެއްޓިފަ އެވެ.

އޭގެ މާނައަކީ ރާއްޖެ މިހާރު އޮތީ "ޕްރޮބުލޮމެޓިކް" ކެޓަގަރީ ނުވަތަ ނޫސްވެެރިކަމުގެ މިނިވަންކަމަށް ހުރަސްތަކާއި ގޮންޖެހުންތައް ހުރި ގައުމުތަކުގެ ކެޓަގަރީގަ އެވެ.

މި ސަރުކާރު ވެރިކަމަށް އައުމަށް ފަހު އަބުރުގެ ގާނޫނު އުވާލުން ފަދަ ކަންކަން ކުރުމާ އެކު ޕްރެސް ފްރީޑޮމް އިންޑެކްސްގައި ރާއްޖޭގެ ދަރަޖަ ރަނގަޅުވެގެން ދިޔަ އެވެ. އެގޮތުން، 2021ގައި ރާއްޖޭގެ ދަރަޖައަކީ 72 އެވެ. ނަމަވެސް އަނެއްކާ ވެސް އެ އިންޑެކްސްގައި ރާއްޖޭގެ ދަރަޖަ މި ދަނީ ދަށްވަމުންނެވެ.

ރައީސް އަބްދުالله ޔާމީންގެ ސަރުކާރުގައި ނޫސްވެރިންކަމާއި ނޫސްވެރިންނަށް އެޅި ހުރަސްތަކާ އެކު އެ ސަރުކާރު ނިމުނު އިރު ޕްރެސް ފްރީޑޮމް އިންޑެކްސްގައި ރާއްޖޭގެ ދަރަޖައަކީ 120 އެވެ. އެއީ ނޫސްވެރިކަމަށް އުނދަގޫ ހާލަތްތައް ހުރި ކެޓަގަރީ އެވެ.