ހައްޖަށް ގެންދަން ކަނޑައެޅިފައިވާ އަގަށް ވުރެ ބޮޑު އަގު ނަގާ ފަރާތްތަކާމެދު ފިޔަވަޅު އަޅާނަން: މިނިސްޓްރީ

1444 ވަނަ އަހަރު ޙައްޖަށް މީހުންގެންދިއުމަށް ހުއްދަދީފައިވާ ބައެއް ކުންފުނިތަކުން ދިވެހިރާއްޖެއިން މީހުން ޙައްޖަށް ގެންދިއުމާގުޅޭ އުސޫލާ ޚިލާފަށް ކަނޑައަޅާފައިވާ އަގަށްވުރެ އިތުރަށް ފައިސާ ނަގަމުންދާ މައްސަލަ އިސްލާމިކް މިނިސްޓްރީން ބަލަން ފަށައިފިއެވެ.

އިސްލާމިކް މިނިސްޓްރީން މިއަދު ބުނީ، އުސޫލާއި ޚިލާފަށް ބައެއް ކުންފުނިތަކުން ބޮޑު އަގު ނަގަމުންދާކަމުގެ ޝަކުވާތައް މި މިނިސްޓްރީއަށް ލިބިފައިވާ ކަމަށެވެ. އަދި އެކަމާ ގުޅިގެން ބަލަންޖެހޭ ކަންކަން ބަލަމުން އަންނަ ކަމަށްވެސް އެ މިނިސްޓްރީން ބުނެއެވެ.

މިއާއެކު އެ މިނިސްޓްރީން ބުނީ، މިކަން ބެލުމަށްފަހު އުސޫލާ ޚިލާފަށް ޢަމަލުކުރާ ފަރާތްތަކާމެދު ފިޔަވަޅު އަޅާނެ ކަމަށެވެ.

މި އަހަރު ރާއްޖެ އިން، އަގު ހެޔޮކޮށް ހައްޖަށް މީހުން ގެންދިއުމަށް ތިން ކުންފުންޏަކަށް އިސްލާމިކް މިނިސްޓްރީން ހުއްދަ ދީފައިވެ އެވެ. އެއީ؛

• އަލްހަރަމައިން ހައްޖު އެންޑް އުމްރާ (75،465ރ.)

• ސިސިލްފަރު ހައްޖު އެންޑް އުމްރާ (75،250ރ.)

• އަލްމަނާސިކް ޕްރައިވެޓް ލިމިޓެޑް (75،000ރ.)

ރާއްޖެއަށް ލިބިފައިވާ 1،000 ހައްޖު ކޯޓާގެ ތެރެއިން، އެ އިން ކޮންމެ ކުންފުންޏަކަށް ދޫކުރީ 90 ޖާގަ އެވެ. ބާކީ ޖާގަތައް ދޫކުރަނީ ސަރުކާރުގެ 100 ޕަސެންޓް ހިއްސާ އޮންނަ ހައްޖު ކޯޕަރޭޝަނަށެވެ.

އެ ކުންފުނި ތަކުން، މީހުން ގެންދިޔުމަށް ކަނޑައަޅާފައިވާ އަގަށްވުރެ ބޮޑު އަގު ނަގައި، ބޮޑު އަގު ދައްކައި، އަދި ކަނޑައަޅާފައިވާ ކޯޓާ އަށްވުރެ ގިނައިން މީހުން ހައްޖަށް ގެންދިޔުމަކީ ހައްޖަށް ގެންދިޔުމުގެ އުސޫލާއި ޚިލާފް ކަމެއް ކަމަށް މިނިސްޓްރީން ބުނެއެވެ.