"އުމުރުން މިވީހާތަނަށް އިންސާނުންގެ ތެރެއިން ރައީސް ޞާލިހުހާ ކެތްތެރި ވެރިއެއް ނުފެނޭ"

ދުނިޔޭގައި ދުވަސްކޮޅެއް ހޭދަ ކުރެވިއްޖެކަމަށާއި، އެހެން ނަމަވެސް މިހާތަނަށް ރައީސް އިބްރާހިމް މުހައްމަދު ޞާލިހު ފަދަ ކެތްތެރި މީހަކާއި ދިމާނުވާކަމަށް ވިދާޅުވެ މިއަހަރުގެ ރިޔާސީ އިންތިހާބުގައި އެމްޑީޕީއާއި ކޯލިޝަން ހަދައިފައިވާ އެމްޑީއޭގެ ލީޑަރ، އަހުމަދު ސިޔާމް މުހައްމަދު އަނެއްކާވެސް ރައީސް ސޯލިހަށް ތައުރީފު ކުރައްވައިފިއެވެ.

ސިޔާމް މިފަދައިން ވިދާޅުވެ ރައީސަށް ތައުރީފުކުރައްވައިފައިވަނީ، ރިޔާސީ ދެވަނަ ދައުރަކަށް ރައީސް ސޯލިހު އިންތިހާބުކުރެއްވުމަށް ކުރައްވަމުން ގެންދަވާ ކެމްޕެއިން ދަތުރުގެ ތެރެއިން ހދ ހަނިމާދޫގައި ބޭއްވި ބޮޑު ޖަލްސާގައި ދެއްކެވި ވާހަކަގުޅުގައެވެ.

މި ޖަލްސާގައި ވާހަކަ ދައްކަވަމުން ސިޔާމް އިތުރަށް ވިދާޅުވީ، ރައީސް އިބްރާހިމް މުހައްމަދު ޞާލިހުގެ 5 އަހަރުގެ ވެރިކަމަކީ މިފަހުގެ ތާރީޙެއްގައި ދިވެހިން ދެކުނު އެންމެ އުފާވެރި ދައުރުކަމަށާއި ސިޔާސީ ޚިޔާލް ތަފާތުވުންތަކާއި، ފިކުރުގެ ތަފާތުވުމަކީ ރައީސް ޞާލިހަކަށް މައްސަަލައެއް ނޫންކަމަށެވެ.

މީގެ އިތުރުންވެސް ރައީސް ސޯލިހަށް ތައުރީފުކުރައްވައި ސިޔާމް އިތުރަށް ވިދާޅުވީ އެބޭފުޅާގެ ސިޔާސީ ހަޔާތުގައި އެކުގައި މަސައްކަތް ކުރެއްވި ގިނަ ބޭފުޅުންގެ ތެރެއިން ކޯލިޝަންގެ ތެރޭގައި ދިމާވާ ގޮންޖެހުންތަކާއި، ދަތިތަކާއި، ޝަކުވާތަށް ކެތްތެރި ކަމާއިއެކު އަޑުއަހައި އެއްވެސް މީހަކަށް އަދި ޕާޓީއަކަށް ދެރަގޮތެއް ނުހައްދަވައި އެކީގައި ގޮވައިގެން ގެންގުޅުއްވި ކެތްތެރި ބޭފުޅަކު ރައީސް ސޯލިހު ފިޔަވައި ދެކިނުލައްވާ ކަމުގައެވެ.

އަޅުގަނޑުގެ އުމުރުން މިވީހާތަނަށް އިންސާނުންގެ ތެރެއިން މިހާ ކެތްތެރި ވެރިއެއް ނުފެނޭ. މިއީ ކެތްތެރި ކަމުގެ ލާމަސީލު މިސާލެއް.

އަހުމަދު ސިޔާމް (ސަން ސިޔާމް)

މި ފަހަކަށް އައިސް ރިޔާސީ ކެމްޕެއިންގެ ޖަލްސާތަކުގައި ޝިޔާމް ގެންދަވަނީ ރައީސް ސޯލިހަށް ވަރަށް ބޮޑަށް ތައުރީފުކުރައްވަމުންނެވެ.

އެގޮތުން މި ފަހުން ފުވައްމުލަކު ސިޓީގައި ބޭއްވުނު ކެމްޕެއިން ޖަލްސާއެއްގައިވެސް ޝިޔާމްވަނީ ކޮވިޑްގެ ދުވަސްވަރު ރައީސް ސޯލިހު ފިތިވަޑައިގެން ދިޔަ ވަގުތު ހަށިގަނޑުން އައިސްފައިވަނީ މާމުއި ކަމުގައި ވިދާޅުވެ، ރައީސަށް ވަރަށް ބޮޑަށް ތައުރީފުކުރައްވައިފައެވެ.