ކޮންމެ ކެންޑިޑޭޓެއް ނެރުނަސް ޕީޕީއެމުން ތަންފީޒް ކުރާނެ ސިޔާސަތު ވަރަށް ސާފު: ރައީސް ޞާލިހު
އިދިކޮޅު އެންމެ ބޮޑު ޕާޓީ, ޕީޕީއެމް އިން ރިޔާސީ އިންތިޚާބަށް ކޮންމެ ކެންޑިޑޭޓެއް ނެރުނަސް އެ ކެންޑިޑޭޓެއް ތަންފީޒް ކުރާނީ ޕީޕީއެމްގެ ސިޔާސަތު ކަމަށާ، އެ ސިޔާސަތު އެމަނިކުފާނަށާއި ރައްޔިތުންނަށް ވަރަށް ރަނގަޅަށް ސާފުވާ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
ރިޔާސީ ކެންޕެއިނަށް ހދ. އަތޮޅަށް ކުރައްވަމުން ގެންދަވާ ދަތުރުފުޅުގައި ރޭ ހަނިމާދޫގައި ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޞާލިހް ވިދާޅުވީ، އިގްތިސާދީ ކުރިއެރުންތައް ގެނެވޭނީ މުޖުތަމަޢުގެ މެދުގައި ހަމަޖެހުން އޮވެގެން ކަމަށެވެ.
"އިޤްތިޞާދީ ގޮތުން ރައްޔިތުންނަށް އެއްވެސް މަންފާއެއް ނުކުރާނެ ސިޔާސީ ހަމަޖެހުން ނެތިއެއް. އެންމެ ފުރަތަމަ ކުރަންވީ ހަމަކީ އެއީ. ހަލަބޮލި ކަމާއި, ސިޔާސީ ދެކޮޅުވެރިކަމުން ދުރަށް ދިއުން. މި ވޭތުވެދިޔަ ފަސް އަހަރުގެ ތެރޭގައި އަޅުގަނޑުމެން މަސައްކަތް ކުރަމުން އައީ މިގޮތަށް. އެހެންވެ މިއަދު ރާއްޖޭގެ ރަށްރަށުގައި ތަރައްޤީގެ މަޝްރޫއުތައް ބާރަށް ކުރިޔަށް އެދަނީ."
ރައީސް އިބްރާހިމް މުހައްމަދު ޞާލިހު
މިއާއެކު ރައީސް ޞާލިހް ވިދާޅުވީ ކުރިއަށް އޮތް ރިޔާސީ އިންތިހާބުގައި ވޯޓުލާއިރު، ސަރުކާރު ތަކުގައި ހުރި ތަފާތު ދެނެގަނެ އަޅާކިޔާލަންޖެހޭ ކަމަށެވެ. އެގޮތުން، ކުރީގެ ރައީސް ޔާމީން އަބްދުލްގައްޔޫމް ގެ ވެރިކަމުގައި ރާއްޖޭގެ ސިޔާސީ މަޝްރަހު އޮތްގޮތް ވަރަށް ސާފު ވާނެ ކަމަށް ރައީސް ވިދާޅުވި އެވެ. އޭގެ ނަތީޖާއެއްގެ ގޮތުން ހދ އަތޮޅުގައި އެ ސަރުކާރަށް ހިންގުނީ 79 ޕްރޮޖެކްޓް ކަމަށް ވެސް ވިދާޅުވި އެވެ. ނަމަވެސް މި ސަރުކާރުން އެ އަތޮޅުގައި 230 ޕްރޮޖެކްޓް ހިންގަމުންދާ ކަން ރައީސް ފާހަގަ ކުރެއްވި އެވެ.
މިއާއެކު ރައީސް ވަނީ ތަރައްގީ ގެނައުމަށް ސިޔާސީ ހަމަޖެހުން މުހިންމުކަން ތަކުރާރުކޮށް ވިދާޅުވެ, މި ސަރުކާރަށް ދެވަނަ ދައުރެއް ބޭނުން ވަނީވެސް އެ ސަބަބަށްޓަކައި ކަމަށް ވިދާޅުވެފައެވެ.
ރައީސް ޞާލިހު ވިދާޅުވީ މީގެ ކުރީ ސަރުކާރާއި މިސަރުކާރު މިހާރު ޓެސްޓު ކުރެވިފައި ވާ ކަމަށާ، ޕީޕީއެމުން ކޮންމެ ކެންޑިޑޭޓަކު ނެރުނު ނަމަވެސް ތަންފީޒް ކުރާނެ ސިޔާސަތު "އަޅުގަނޑުމެންނަށް ވަރަށް ސާފު" ކަމަށެވެ.
"ޕީޕީއެމް އިން ކޮންމެ މީހަކު ކެންޑިޑޭޓެއްގެ ގޮތުގައި ނިކުތް ނަމަވެސް ތަންފީޒް ކުރާނީ ޕީޕީއެމްގެ ސިޔާސަތު. އެ ސިޔާސަތު އަޅުގަނޑުމެންނަށް ވަރަށް ސާފު. އެއްވެސް ކަމެއް ސަރުކާރަކަށް އެ ދުވަހަކު ނުކުރެވޭ ހިޔާލު ތަފާތުވާ މީހަކު ޖަލުގައި ބައިންދައިން ނޫނީއްޔާ. ބިރުވެރިކަމެއްގައި ރައްޔިތުން ތިބެން ޖެހުނީ. އަނގައިން ބުނާ ކޮންމެ މީހަކު، ކޮންމެ ނޫސްވެރިއަކު، ކޮންމެ ޓީވީ ޗެނަލެއް ޖޫރިމަނާ ކުރަމުން ދިޔައީ،"
ރައީސް އިބްރާހިމް މުހައްމަދު ޞާލިހު
ރައީސް ޞާލިހު ވިދާޅުވީ އެހެން ބަޔަކު ވެރިކަމަށް އަތުވެއްޖެނަމަ ދެން ވާނެ ގޮތެއް ރައްޔިތުން ވިސްނަން ޖެހޭ ކަމަށެވެ. އެގޮތުން މިހާރު ފެށިފައި ހުރި ހުރިހާ މަޝްރޫއެއް ހުއްޓުމަކަށް އަންނާނެ ކަމަށާ، ޕީޕީއެމްގެ ސިޔާސަތަކީ މީހުންނާއި، ބާރުތައް އެއްތަނަކަށް ޖަމާކުރުން ކަމަށް ރައީސް ވިދާޅުވި އެވެ.
އެހެންކަމުން ކުރިއަށް އޮތް ރިޔާސީ އިންތިހާބުގައި މިހާރު ޓެސްޓުކޮށް ނިންމާފައި އޮތް ސަރުކާރަށް ވޯޓު ދިނުމަށް ރައީސް ޞާލިހު ވަނީ އެދިވަޑައިގެންފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
