ޕީއެންސީގެ ޓިކެޓަށް ވާދަކުރައްވަނީ ޑރ.މުއިއްޒު އަދި އާދަމް ޝަރީފް

ކުރީގެ ރައީސް އަބްދުالله ޔާމީން އަބްދުލް ޤައްޔޫމަށް ކުރިއަށް އޮތް ރިޔާސީ އިންތިހާބުގައި ވާދަ ނުކުރެއްވިއްޖެނަމަ، ބަދަލުގައި އިދިކޮޅުން ނެރޭ ކެންޑިޑޭޓަކު ހޮވުމަށް ބާއްވާ އިންތިހާބުގައި ވާދަ ކުރައްވަނީ މާލެ ސިޓީގެ މޭޔަރު އަދި ކުރީގެ ހައުސިން މިނިސްޓަރު ޑރ.މުހައްމަދު މުއިއްޒު، އަދި ރައްޔިތުންގެ މަޖިލީހުގެ މަޑުއްވަރި ދާއިރާގެ މެމްބަރު އާދަމް ޝަރީފް އުމަރު ކަމަށް ހާމަވެއްޖެއެވެ.

ކުރިއަށް އޮތް ރިޔާސީ އިންތިހާބުގައި ޕީއެންސީން ވާދަކުރުމަށް އެ ޕާޓީން ދާދި ދެންމެ އަކު ފާސްކޮށްފައިވާއިރު, ރިޔާސީ ޕްރައިމަރީގައި ވާދަކުރައްވަން އާދަމް ޝަރީފުވެސް އަދި ޑރ.މުއިއްޒުވެސް ކެމްޕެއިން ކުރައްވަމުން އަންނަ ކަމަށް މައުލޫމާތު ލިބެއެވެ. އަދި ދެބޭފުޅުން ހިމެނޭހެން އިދިކޮޅުގެ އިސް ބައެއް ފަރާތްތައް މިހާރު ވަނީ ކުށުގެ ރެކޯޑު ސާފުކުރުމަށް ހުށަހަޅާފައިވާ ކަމަށް ވެސް މައުލޫމާތު ލިބެއެވެ.

ޕީއެންސީން ރިޔާސީ އިންތިހާބުގައި ވާދަކުރަން ނިންމާފައި ވަނީ އެ ޕާޓީގެ ސެނެޓުގެ 47 މެންބަރުންގެ ތެރެއިން 44 މެމްބަރުންގެ އިއްތިފާގުންނެވެ. ޕީއެންސީގައި މިވަގުތު 3159 އާންމު މެމްބަރުން ތިބެއެވެ.

އިދިކޮޅު ކޯލިޝަނުން މީގެ ކުރިން ބުނެފައިވާ ގޮތުގައި، ޕީއެންސީ އިން ކެންޑިޑޭޓަކު ނެރުމާއި މެދު ގޮތެއް ނިންމުމުގެ އިޚްތިޔާރު، ޕީޕީއެމް/ޕީއެންސީގެ ލީޑަރ ރައީސް ޔާމީން އަށް ދިނުމަށް ނިންމާފައިވާ ކަމަށާ، ޕީޕީއެމް/ޕީއެންސީ ގެ މުހިންމު ބޮޑެތި ނިންމުންތައް ނިންމުމުގައި ރައީސް ޔާމީންގެ ލަފާ އާއި މަޝްވަރާ ހޯދާނެ ކަމަށެވެ. އެހެންކަމުން އެކަން ކުރިއަށް ދަނީ ރައީސް ޔާމީންގެ ލަފާއާއި އެކުގައި ކަމަށް އެ ކޯލިޝަނުން ބުނެއެވެ.

ރައީސް ޔާމީން މިވަގުތު ހުންނެވީ، ވ. އާރަށް ކުއްޔަށް ދިނުމާއި ގުޅޭ މައްސަލާގައި އެމަނިކުފާނުގެ މައްޗަށް އުފުލާފައިވާ ދައުވާތައް ސާބިތުވާ ކަމަށް ކަނޑައަޅައި ކްރިމިނަލް ކޯޓުން ކޮށްފައިވާ 11 އަހަރުގެ ޖަލު ހުކުމް ތަންފީޒް ކުރައްވަން ޖަލުގައެވެ. އެހެންކަމުން އެމަނިކުފާނުގެ ކެންޑިޑެސީ އާއި މެދު ގިނަ ސުވާލު ތަކެއް ވަނީ އުފެދިފައެވެ.

އަދި އެމަނިކުފާނުގެ ކެންޑިޑެސީ ފޯމު ހުށަހެޅުމުން އީސީން ވަނީ އެ ބަލައި ނުގަންނަން ވެސް ނިންމާފައެވެ. އިދިކޮޅުން މިހާރު އެ މައްސަލަ ސްޕްރީމް ކޯޓަށް ހުށަހަޅާފައިވާއިރު، އެ ކޯޓުން މައްސަލަ ބަލައި ގަނެ، އީސީ އަށް ޖަވާބުދާރީ ވާން ވަގުތު ދީފައި ވެއެވެ.