ރައީސް ޔާމިނުގެ ކެނޑިޑެސީ މައްސަލައިގެ އަޑުއެހުން ހުކުރު ދުވަހަށް ތާވަލުކޮށްފި

ޕީޕީއެމްގެ ރިޔާސީ ކެންޑިޑޭޓު ރައީސް އަބްދުالله ޔާމީން އަބްދުލްގައްޔޫމުގެ ކެނޑިޑެސީ އިލެކްޝަންސް ކޮމިޝަނުން ބަލައިނުގަތް މައްސަލަ ސުޕްރިމް ކޯޓުގައި އިސްތިއުނާފުކޮށްފައި ވާއިރު، އެ މައްސަލައިގެ އަޑުއެހުން ހުކުރު ދުވަހަށް ތާވަލުކޮށްފި އެވެ.

ރައީސް ޔާމިނުގެ ކެނޑިޑެސީ ފޯމު ޕީޕީއެމުން އިލެކްޝަންސް ކޮމިޝަނަށް ހުށައެޅީ އޮގަސްޓު 1 ގަ އެވެ. ހަމަ އެދުވަހު އީސީން ވަނީ ރައީސް ޔާމިނުގެ ކެނޑިޑެސީ ފޯމު ބަލައިނުގަތުމަށް ނިންމާފަ އެވެ. ސަބަބެއްކަމަށް އީސީން ބުނެފައިވަނީ އެމަނިކުފާނަކީ މިވަގުތު ޖަލު ހުކުމެއް ތަންފީޒު ކުރައްވަމުން ގެންދަވާ ފަރާތަކަށް ވުމެވެ.

އެފަހުން ރައީސް ޔާމިނުގެ ފަރާތްޕުޅުން ވަނީ އީސީގެ ނިންމުން ސުޕްރިމް ކޯޓުގައި އިސްތިއުނާފުކޮށްފަ އެވެ. އަދި އެ ކޯޓުން ވަނީ އެ މައްސަލަ ބަލައިގަނެ އިލެކްޝަންސް ކޮމިޝަނުން ޖަވާބުދާރީވުމަށް އަންގާފަ އެވެ.

އެ މައްސަލައާއި ގުޅިގެން މިއަދު 3:00 ގެ ކުރިން ސުޕްރިމް ކޯޓަށް ޖަވާބު ފޮނުވާނެކަމަށް އީސީން ވަނީ ބުނެފައެވެ.

ސުޕްރިމް ކޯޓަށް ހުށައަޅާފައިވާ އިސްތިއުނާފު މައްސަލައާއި ގުޅިގެން ރައީސް ޔާމީނުގެ ޤާނޫނީ ޓީމުގައި ހިމެނިވަޑައިގަންނަވާ އަބްދުالله ޝިޔާޒު ކުރެއްވި ޓްވީޓެއްގައި ވިދާޅުވީ ރިޔާސީ އިންތިހާބުގައި ބައިވެރިވުމަށް ޢަބްދުالله ޔާމީން ޢަބްދުލްޤައްޔޫމް ހުށަހެޅި ކެންޑިޑެސީ އިލެކްޝަންކޮމިޝަނުން ބަލައިނުގަތުމާއި ގުޅިގެން ސުޕްރީމްކޯޓަށް ހުށަހެޅި މައްސަލައިގެ އަޑުއެހުމެއް 4 އޯގަސްޓުވާ ހުކުރު ދުވަހުގެ މެންދުރު ފަހު 14:30 އަށް ސުޕްރިމްކޯޓުގައި ތާވަލުކޮށްފައިވާކަމަށެވެ.

ދިވެހިރާއްޖޭގެ ޤާނޫނީ ނިޒާމު އޮތް ގޮތުން ރައީސް ޔާމިނުގެ ކެނޑިޑެސީގައި އެއްވެސް މައްސަލައެއް ނޫޅޭކަމަށް އެމަނިކުފާނުގެ އިސް ޤާނޫނީ ވަކީލު އަދި ރަނިންމޭޓު ޑރ މުޙައްމަދު ޖަމީލު އަހުމަދު ވަނީ ވިދާޅުވެފަ އެވެ.

އަދި ސުޕްރިމް ކޯޓުން ރައީސް ޔާމިނުގެ އިންތިޚާބީ ހައްޤު ކަށަވަރުވެގެންދާނެ ކަމުގެ ފުރިހަމަ ޔަގީންކަން އޮތްކަމަށް ވެސް ޑރ ޖަމީލު ވަނީ ވިދާޅުވެފަ އެވެ.

ރައީސް ޔާމިނުގެ ކެނޑިޑެސީއާއި ގުޅިގެން ސުޕްރިމް ކޯޓުން ނިންމާ ނިންމުން ވެގެންދާނީ ގިނަބައެއްގެ ޝައުގުވެރިކަން އޮންނާނެ ނިންމުމަކަށެވެ. އަދި އެއީ ރިޔާސީ އިންތިޚާބުގެ ކުރިމަގު ބިނާވެގެންދާނެ ފަދަ ބޮޑު ނިންމުމަކަށް ވާނެކަމަށް ސިޔާސީ މުފައްކިރުން ވިދާޅުވެއެވެ.