ރައީސް ޔާމީންގެ ކެންޑިޑެސީ މައްސަލައަށް ދައުލަތުން ތަދައްޚުލްވެއްޖެ!

އިދިކޮޅުގެ ރިޔާސީ ކެނޑިޑޭޓުގެ ގޮތުގައި ރިޔާސީ އިންތިހާބުގައި ވާދަކުރުމަށް ކުރީގެ ރައީސް އަބްދުالله ޔާމީން އަބްދުލްގައްޔޫމް ހުށަހެޅި ފޯމު އިލެކްޝަންސް ކޮމިޝަނުން ބަލައިނުގަތުމަށް ނިންމި ނިންމުން ސުޕްރީމް ކޯޓަށް ހުށަހަޅާފައިވާތީ އެ މައްސަލައިގެ ތެރެއަށް ބަންޑާރަ ނައިބުގެ އޮފީހުން ތަދަހުއްލްވެއްޖެ އެވެ.

ސުޕްރީމް ކޯޓަށް ހުށަހަޅާފައިވާ ދުސްތޫރީ މައްސަލައަށް އޭޖީ އޮފީހުން ތަދައްހުލްވާން ޖެހޭކަމަށް ސުޕްރީމް ކޯޓުން ނިންމީ، ކޯޓުތަކުގެ ގާނޫނުން އެ ކޯޓަށް ލިބިދޭ އިހުތިޔާރުގެ ދަށުންނެވެ. އެއީ ކޯޓަށް ހުށަހެޅޭ މައްސަލައެއްގައި މަސްލަހަތު އޮތްކަމަށް ކޯޓަށް ފެންނަ ބަޔަކު ތަދައްހުލުވުމެވެ.

އެކަމާއި ގުޅިގެން ބަންޑާރަ ނާއިބުގެ އޮފީހުން ބުނީ، ރައީސް ޔާމީންގެ ފަރާތްޕުޅުން ސުޕްރީމްކޯޓަށް ހުށަހަޅުއްވާފައިވާ މައްސަލައަށް ސުޕްރީމް ކޯޓުން ދައުލަތް ތަދައްހުލު ކުރުވާފައިވާތީ، އެ މައްސަލައިގައި ބަންޑާރަނައިބުގެ ފަރާތުން ކޯޓަށް ހާޞިރުވުމަށް ނިންމަވާފައިވާ ކަމަށެވެ.

ރައީސް ޔާމީން ގެ ކެންޑިޑެސީ މައްސަލައިގެ ތެރެއަށް އޭޖީ އޮފީހުން ތަދައްހުލު ވެފައިވާއިރު، އެމަނުކުފާނަށް ތާއީދު ކުރައްވާ އެންމެހާ ރައްޔިތުންގެ ޙައްޤުތައް ހިމާޔަތްކޮށްދިނުމަށް ކަމަށް ބުނެ ޕީޕީއެމުންވެސް ވަނީ މައްސަލައިގެ ތެރެއަށް ތަދައްޚުލުވެފައެވެ.

ޕީޕީއެމް ޕީއެންސީ ކޯލިޝަންގެ ކެނޑިޑޭޓެއްގެ ގޮތުގައި ރައީސް ޔާމީންގެ ނަންފުޅު އެކޯލިޝަނުން އިލެކްޝަންސް ކޮމިޝަނަށް ހުށައެޅީ އޮގަސްޓު 1ވަނަ ދުވަހުއެވެ. ހަމަ އެދުވަހު އީސީ އިން ވަނީ އެމަނިކުފާނުގެ ކެނޑިޑެސީ ބަލައި ނުގަންނާނެ ކަމަށް ނިންމައި އެކޯލިޝަނަށް އެކަން އަންގާފައެވެ.

އަދި ކެނޑިޑެސީ ބަލައި ނުގަތް ސަބަބެއް ކަމަށް އީސީ އިން ބުނެފައިވަނީ ރައީސް ޔާމިން ޖަލު ޙުކުމެއް ތަންފީޒު ކުރައްވަމުން ދިޔުމެވެ.

"ޖިނާއީ ކުށެއް ސާބިތުވެ، 12 މަސް ދުވަހަށް ވުރެ ދިގު މުއްދަތެއް (11 އަހަރު) ހުކުމެއް އައިސްފައިވާ މީހަކަށް ވުމާއި އެކު، އެ ހުކުމް، ތަންފީޒުކޮށް ނިމިފައި ނުވާ ކަން، ލިބިފައިވާ ކުށުގެ ރިކޯޑަށް ބެލުމުން އެނގެން އޮންނާތީ، ގާނޫނު އަސާސީގެ 109 ވަނަ މާއްދާގެ (ޅ) ގައި ބަޔާންކުރާ ޝަރުތު އަބްދުالله ޔާމިން އަބްދުލްގައްޔޫމް ކިބައިގައި ފުރިހަމަ ނުވުން" ރައީސް ޔާމީން ގެ ކެންޑިޑެސީ ގަބޫލު ނުކުރި ސަބަބު ހާމަކޮށް އީސީން ބުނެފައިވެއެވެ.

އީސީ އިން އެމަނިކުފާނުގެ ކެނޑިޑެސީ ބަލައި ނުގަތުމުން ރައީސް ޔާމިންގެ ފަރާތްޕުޅުން އެމަނިކުފާނުގެ ވަކީލުން ވަނީ އެމައްސަލަ ސްޕްރީމް ކޯޓަށް ވައްދައިފައެވެ. އަދި އެކޯޓުން ވަނީ އެކޮމިޝަނަށް އެމައްސަލައަށް ޖަވާބުދާރީ ވުމަށް އަންގައިފައެވެ. ސްޕްރީމް ކޯޓުން ވަނީ މިއަދު 3:00 ގެ ކުރިން އެމައްސަލައަށް ޖަވާބުދާރީ ވުމަށް އިލެކްޝަންސް ކޮމިޝަނަށް އަންގައިފައެވެ.

މިމައްސަލައިގެ އަޑު އެހުން މިހާރުވަނީ ހުކުރުދުވަހަށް ތާވަލުކޮށްފައެވެ.