މި އަންނަނީ ހުއްޓިފައިވާ މަޝްރޫޢުތައް ކުރިއަށް ގެންދިއުމަށް: ޑރ މުއިއްޒު

ވެރިކަމަށް އަންނަނީ އެއްވެސް ހާލެއްގައި ފަށައިގެން ކުރިއަށް ގެންދާ މަޝްރޫއުތައް ހުއްޓާލަން ނޫންކަމަށާއި ފަށައިގެބް ކުރިއަށް ނުގޮސް ހުއްޓިފައި ހުރި މަޝްރޫޢުތައްް ކުރިއަށް ގެންގޮސް ނިންމުމަށް ކަމުގައި ޕީޕީއެމް ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒު ވިދާޅުވެއްޖެއެވެ.

ރިޔާސީ އިންތިހާބުގެ ކެމްޕެއިންގައި ތ އަތޮޅަށް ކުރައްވަމުންގެންދަވާ ދަތުރުފުޅުގައި މިއަދު އެ އަތޮޅު ހިރިލަންދޫއަށް ވަޑައިގެން އެރަށުގެ ސަޕޯޓަރުންނާއި ބައްދަލުކުރައްވާ ދެއްކެވި ވާހަކަފުޅުގައި މުއިއްޒު ވިދާޅުވީ، ޕީޕީއެމް/ޕީއެންސީ ވެރިކަމާ ހަވާލުވެއްޖެ ނަމަ މިހާރު ސަރުކާރުން ފަށާފައިވާ މަޝްރޫއުތައް ހުއްޓާލާނެ ކަމަށް ބުނެ އެމްޑީޕީން ދައްކަމުންދާ ވަހަކަތަކަކީ އަސާސެއް ނެތް ވާހަކަތަކެއް ކަމަށާއި އޭނާ ވެރިކަމަށް އަންނަނީ މިހާރު ގިނަ މަޝްރޫއުތަކެއް ހުއްޓިފައި އޮތުމުން އެކަންކަން ކުރިއަށް ގެންދިއުމަށް ކަމަށެވެ.

މުއިއްޒު އިތުރަށް ވިދާޅުވީ، ހިރިލަންދޫގައި ސަރުކާރުން ފަށައިފައިވާ ބިން ހިއްކުމުގެ މަޝްރޫޢު ހިމެނޭހެން އެރަށު ހުރިހާ މަޝްރޫއެއްވެސް ހުއްްޓާނުލާ ކުރިއަށް ގެންދާނެކަމަށާއި އޭނާގެ ވެރިކަމެއްގައި އެ މަޝްރޫއުތައް ރައްޔިތުންގެ ހިޔާލާއެކު މާ ރަނގަޅަށްވެސް އެ މަޝްރޫއުތައް ނިންމަދޭނެ ކަމުގައެވެ.

ރައީސް ޔާމީންގެ ވެރިކަމުގައި މުޅި ރާއްޖޭގެ ތަރައްގީއަށް ބޮޑު ޑިވޮލޮޕްމަންޓް ޕްލޭނެއް ހެދުމަށްޓަކައި ރާއްޖޭގެ އެކި ސަރަހައްދުތަކުން ހިއްކެން ހުރި ފަޅުތައް ބަލައި ދިރާސާއެއް ކޮށް ކެބިނެޓަށް ގެންގޮސް ފާސްކުރިން. އެއީ ދުރުރާސްތާއަށް ވިސްނައިގެން، މިކިޔަނީ ވަރަށް ގިނަ އަހަރުތަކަށް ވިސްނައިގެން ބިން އިތުރުކުރަންޏާމު ކޮބައިތޯ އެކަން އެންމެ ރަނގަޅަށް ކުރެވޭނެ ސަރަހައްދުތަކަކީ

ޑރ މުހައްމަދު މުއިއްޒު

މިއާއި ވިދިގެން މުއިއްޒު ވިދާޅުވީ، މިވަގުތު 25 ހެކްޓަރުގެ ބިން ހިރިލަންދޫގައި ހިއްކިކަމުގައިވިޔަސް އެއީ ނިމުމެއް ނަމަށް ނުބެލުމަށާއި، ތ އަތޮޅާއި މުޅި ރާއްޖެއަށް އޭގެ ފައިދާވާ ކަހަލަ ބިން އިތުރުކުރުމުގެ މަޝްރޫއެއް މި އެ ސަރަހައްދުގައި ގެންދިއުމަކީ މުއިއްޒުގެ ވިސްނުމެއް ކަމުގައި އޭނާ ވިދާޅުވިއެވެ.

މީގެ އިތުރުން މުއިއްޒު ވަނީ ހިރިލަންދޫ މަސްވެރިންނަށް ފަހިވާނެހެން އެރަށު ބަދަރު ތަރައްގީކޮށްދިނުމަށާއި، މަސް ކިރުމަށް ކޯލްޑް ސްޓޯރޭޖް ނިޒާމެއް ގާއިމްކުރުމުގެ އިތުރުން އެރަށުގެ ބޮޑެތި މަގުތައް ޒަމާނީ ފެންވަރަށް ހަދައިދެއްވާނެ ކަމުގައި ވައުދުވެފައެވެ. އަދި މީގެ އިތުރުންވެސް އެ ރަށުގެ ސިއްހީ މަރުކަޒު ރަނގަޅު ފެންވަރަކަށް ތަރައްގީ ކޮށްދެއްވާނެ ކަމުގައިވެސް މުއިއްޒު ވަނީ ވިދާޅުވެފައެވެ.