އިތުރު ދައުރެއް ނުދެއްވައިފި ނަމަ، ރާއްޖެ ވެއްޓޭނީ އަނދަވަޅަކަށް: ރައީސް ޞާލިހު

ރާއްޖޭގެ ރަށްރަށުގައި އަދި އެޅުނީ ތަރައްޤީގެ ބިންގާ ކަމަށާއި ފަށައިފައިހުރި މަސައްކަތްތައް ނިންމަން އިތުރުދައުރެއް ބޭނުންވާ ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ރައީސް ޞާލިޙް މިހެން ވިދާޅުވީ ހދ ނޮޅިވަރަންފަރަށް ކުރެއްވެވި ޒިޔާރަތުގައި އެރަށު ރައްޔިތުންނާއި ބައްދަލުކުރައްވައި ވާހަކަދައްކަވަމުންނެވެ.

ރައީސް ޞާލިޙް ވިދާޅުވީ  އެމްޑީޕީ އާއި ގުޅިފައިއޮތް ކޯލިޝަނުން މިއޮތީ ރައްޔިތުންނަށް ޚިދްމަތްކުރުމަށް ޓަކައި ކަމަށާއި ރައްޔިތުންގެ ހައްޤުގައި މަސައްކަތް ކުރުމަށް ކަމަށެވެ. އަދި އެކޯލިޝަންގެ އެހެން އެއްވެސް ބޭނުމެއް ނެތްކަމަށް ރައީސް ޞާލިޙް ވިދާޅުވިއެވެ.

"މިފަށާފައިހުރި މަސައްކަތްތައް ނިންމުމަށްޓަކައި އަދި ރައްޔިތުން ބޭނުންވާ އިތުރު މަސައްކަތްތައް ކުރުމަށް ޓަކައި އިތުރު ދައުރެއް އެބަ ބޭނުންވޭ، އެހެން ނޫންނަމަ އަނެއްކާވެސް ރާއްޖެ ވެއްޓިގެންދާނީ އަޅުގަނޑު މިދަންނަވާ އަނދަވަޅަށް"

ރައީސް އިބްރާހިމް މުޙައްމަދު ޞާލިޙް

ރައީސް ވިދާޅުވީ ފެނާއި ނަރުދަމާގެ ނިޒާމުނެތް އެތައްރަށަކަށް އެޚިދްމަތް ދެވިއްޖެ ކަމަށާއި ބަނދަރުނެތް ކިތަންމެ ރަށަކަށް އެދަތި ފިލުވައި ދެވިއްޖެ ކަމަށެވެ. އާރްޓީއެލްގެ ޚިދްމަތުން ރަށްތައް ގުޅައި ލެވިއްޖެ ކަމަށާއި މިނިމަމް ވޭޖް ކަނޑައެޅިއްޖެ ކަމަށް ރައީސް ވިދާޅުވިއެވެ.

"އަޅުގަނޑުމެންނަށް އަދިކިރިޔާ މިއެޅުނީ ރަށްރަށުގައި ތަރައްޤީގެ ބިންގާ، އަދި ކިރިޔާ ރައްޔިތުން ދިރިއުޅޭފަދަ ތަންތަނަކަށް ރަށްރަށް ބަދަލުކުރެވިގެން މިދަނީ"

ރައީސް އިބްރާހިމް މުޙައްމަދު ޞާލިޙް

ނޮޅިވަރަންފަރު ރައްޔިތުންނާއި ބައްދަލުކުރައްވާ ވާހަކަދައްކަވަމުން ރައީސް ވިދާޅުވީ އެރަށުގެ އާސްކޫލްގެ ބިންގާ އަޅުއްވައި ދެއްވާނެ ކަމަށާއި، މަލްޓި ޕާޕަސް ހޯލެއް އަޅުއްވައިދެއްވާނެ ކަމަށެވެ.

މީގެއިތުރުން ނޮޅިވަރަންފަރުގެ މަގުތައް ޒަމާނީ ފެންވަރަށް ހަދައިދީ ތާރު އަޅައިދެއްވާނެ ކަމަށް ރައީސް ވިދާޅުވިއެވެ. އަދި އެރަށު ސިއްޚީ މަރުކަޒުގެ ވަޞީލަތްތައް އިތުރުކޮށް އެމަރުކަޒުންދޭ ޚިދްމަތްތައް ފުޅާކޮށް ރަނގަޅު ކުރާނެ ކަމަށް ވެސް ރައީސް ޞާލިޙް ވިދާޅުވިއެވެ.

ޒުވާނުންނަށް ޚާއްސަކޮށް އެކި ކުޅިވަރުތައް ކުޅެވޭނެ ތަނަކާއި ބޮޑު ޓާފް ދަނޑެއް އަޅުއްވައިދެއްވާނެ ކަމަށްވެސް ރައީސް ވިދާޅުވިއެވެ.

ނޮޅިވަރަންފަރުގެ ނެރަށް ދިމާވެފައިވާ މައްސަލަ ވީއެންމެ އަވަހަކަށް ހައްލުކޮށްދެއްވައި އެރަށުގެ ގިރާ ސަރަހައްދު ހިމާޔަތް ކޮށްދެއްވާނެ ކަމަށްވެސް ރައީސް ވިދާޅުވިއެވެ.

މީގެ އިތުރުން ރައީސް ޞާލިޙް ވިދާޅުވީ އެރަށަށް އެހެމް ރަށްރަށުން ބަދަލުވި މީހުންނަށް އަޅައިފައިވާ ގެތަކުގެ ކުލި ކުޑަކުރުމަށް ވިސްނަވަމުން ދާކަމަށާއި ރައްޔިތުން އެދެފަދަ ލުއި ބަދަލެއް އެއަށް ގެނެސްދެއްވާނެ ކަމަށެވެ.