ނޮޅިވަރަމް ސިއްޚީ މަރުކަޒަށް ކުޑަކުދިންގެ ޑޮކްޓަރަކާއި އަންހެނުންގެ ޑޮކްޓަރެއް ހަމަޖައްސައިދޭނަން
ހދ ނޮޅިވަރަމު ސިއްޚީ މަރުކަޒަށް ކުޑަކުދިންގެ ޚާއްސަ ޑޮކްޓަރަކާއި އަންހެނުންގެ ޚާއްސަ ޑޮކްޓަރެއް ހަމަޖައްސައި ދެއްވާނެ ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.
ރައީސް މިހެން ވިދާޅުވީ ހދ ނޮޅިވަރަމްފަރަށް ކުރެއްވި ޒިޔާރަތުގައި އެރަށު ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައެވެ.
ރައީސް ވިދާޅުވީ ނޮޅިވަރަމް ރައްޔިތުންގެ ކަންބޮޑުވުންތަކެއް އެބަ ހުރި ކަމަށާއި އެކަން ޤަބޫލުފުޅު ކުރައްވާ ކަމަށެވެ. ބައެއް މަސައްކަތްތައް ރައްޔިތުން ބޭނުންވާ ސްޕީޑުގައި ނުދިޔުމުގެ ޝަކުވާތަކެއް އެބަހުރިކަމަށްވެސް ރައީސް ވިދާޅުވިއެވެ.
"އަޅުގަނޑު ތިބޭފުޅުންނަށް ޔަޤީންކޮށް މިއަރުވަނީ އިރާދަކުރެއްވިއްޔާ، ކުރިއަށް އޮތް ދައުރުގައި އަޅުގަނޑުމެން އެންމެ އިސްކަމެއްދޭ ރަށެއްގެ ގޮތުގައި ނޮޅިވަރަމް ހަދާނެވާހަކަ"
ރައީސް އިބްރާހިމް މުޙައްމަދު ޞާލިޙް
މިއަންނަ ދައުރުގައި އެރަށުގައި ކުރަން ނިންމާފައި ހުރި ކަންކަމަށް ޚާއްސަ އިސްކަމެއް ދީ ނޮލިވަރަމަށް ބޮޑު ބަދަލެއް ގެނެސްދެއްވާނެ ކަމަށް ރައީސް ޞާލިޙް ވިދާޅުވިއެވެ.
ރައީސް ވިދާޅުވީ ކުރިއަށް އޮތް ދައުރުގައި ނޮޅިވަރަމަށް ކޮށްދެއްވަން ނިންމަވާފައިވާ ކަންކަމުގެ ތެރޭގައި އެރަށުގެ ރައްޔިތުން އެދޭ ކަންތައްތައް ވާނީ ހިމަނައިފައިކަމަށެވެ.
އޭގެތެރޭގަ ނޮޅިވަރަމުގެ ބޮޑެތި މަގުތައް ތާރު އަޅައި ޒަމާނީ ފެންވަރަށް ހެދުމާއި، ސްކޫލަށް ބޭނުންވާ ކްލާސްރޫމްތައް އިތުރުކުރުމާއި މަލްޓިޕާޕަސް ހޯލް ހެދުމާއި އޮފީސް ޢިމާރާތް ހަދައި އެރަށު ސްކޫލް އެއްދަންފަޅިއަށް ބަދަލުކޮށްދެއްވާނެ ކަމަށް ރައީސް ޞާލިޙް ވިދާޅުވިއެވެ.
މީގެ އިތުރުން ރައީސް ވިދާޅުވީ ޒުވާނުން ބޭނުންވަ ތަފާތު ކުޅިވަރުތައް ކުޅެވޭ ސްޕޯޓްސް ކޮމްޕްލެކްސްއެއް ނޮޅިވަރަމުގައި އަޅައިދެއްވާނެކަމަށް ރައީސް ވިދާޅުވިއެވެ.
"ސިއްޚީ މަރިކަޒުން ދޭ ޚިދްމަތްތައް ރަނގަޅު ކުރުމަށްޓަކައި މިރަށުގެ ސިއްޚީ މަރިކަޒަކީ ހޮސްޕިޓަލް ފެންވަރަށް ދެވޭ ޚިދްމަތް ބަދަލުކޮށް ކުޑަކުދިން ޑޮކްޓަރަކާއި އަންހެނުންގެ ޑޮކްޓަރެއް ސިއްޚީ މަރިކަޒުގައި ޚިދްމަތްދޭގޮތައް އަޅުގަނޑުމެން ބަދަލުކޮށްދޭނަން"
ރަައީސް އިބްރާހިމް މުޙައްމަދު ޞާލިޙް
ރައީސް ވިދާޅުވީ ނޮޅިވަރަމުގައި އަޅާ އައު ޕޮލިސް ސްޓޭޝަނާއި އެކު އެރަށުގައި ފުލުހުންގެ ޚިދްމަތް ފުޅާކޮށްދެއްވާނެ ކަމަށެވެ.
ހދ އަށް ކުރައްވަމުން ގެންދަވާ ދަތުރުފުޅުގައި ރައީސް ޞާލިޙާ އެކު ކޯލިޝަން ޕާޓީތަކުގެ އިސްލީޑަރުންވެސް ދަނީ ބައިވެރިވެ ވަޑައިގަންނަވަމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
