ރައީސް ޔާމީން އާއި ފާރިސް ބައްދަލުކުރެއްވި ކަމަށް ބުނެ ފަތުރަނީ ދޮގު ވާހަކަތަކެއް: އިދިކޮޅުު

އަމިއްލަ ގޮތުން ރިޔާސީ އިންތިހާބުގައި ވާދަކުރައްވާ ފާރިސް މައުމޫނާއި، އޭނާގެ ބޮޑުބޭބޭފުޅު އަދި ކުރީގެ ރައީސް ޢަބްދުالله ޔާމީން އަބްދުލްގައްޔޫމްގެ ބައްދަލުކުރެއްވި ކަމަށް ބުނެ މީޑިއާތަކުގައި ފަތުރަމުން ދަނީ ދޮގު ޚަބަރެއް ކަމަށާ، އެއީ ޕާޓީގެ މެންބަރުން ބައި ބައި ކުރުމަށް ހިންގާ ޖަރީމާއެއް ކަމަށް އިދިކޮޅުު ޕީޕީއެމް/ޕީއެންސީ ކޯލިޝަނުން ބުނެފިއެވެ.

ފާރިސް އާއި ޔާމިން ބައްދަލު ކުރައްވައި، ކުރިއަށް އޮތް ރިޔާސީ އިންތިހާބުގައި ޔާމިންގެ ތާއީދު އޮތީ ފާރިސް އަށް ކަމަށް ބުނެ ފަތުރަމުންދާ ވާހަކަތައް ދޮގު ކޮށް އިދިކޮޅުުން ނެރުނު ނޫސްބަޔާނެއްގައި ބުނީ އެ ކޯލިޝަންގެ ފަރާތުން ރިޔާސީ އިންތިޚާބުގައި ވާދަކުރައްވާ ދިވެހީންގެ ރިޔާސީ ކެންޑިޑޭޓް ޑރ. މުޙައްމަދު މުޢިއްޒަށް ރައީސް ޢަބްދުالله ޔާމީން ޢަބްދުލްޤައްޔޫމްގެ ތާއީދު އޮތްކަމަށެވެ.

އަދި ދިވެހި އެންމެހާ ރައްޔިތުން ޑރ. މުޢިއްޒަށް ވޯޓު ދެއްވުމަށްވެސް ރައީސް ޔާމީން އެދިވަޑައިގެންފައިވާ ކަމަށެވެ.

"އެއީ (ފާރިސް އާއި ޔާމިން ބައްދަލު ކުރި ޚަބަރަކީ) މިކޯލިޝަންގެ ފަރާތުން ރިޔާސީ އިންތިޚާބުގައި ވާދަކުރައްވާ ދިވެހީންގެ ރިޔާސީ ކެންޑިޑޭޓް ޑރ. މުޙައްމަދު މުޢިއްޒަށް ރައީސް ޔާމީން ޢަބްދުލްޤައްޔޫމްގެ ތާއީދު އޮތްކަމަށާއި، ދިވެހި އެންމެހާ ރައްޔިތުން ޑރ. މުޢިއްޒަށް ވޯޓު ދެއްވުމަށް އެދިވަޑައިގެންފައިވާތީ، އެކަން ހަޖަމު ނުވެގެން މިކޯލިޝަންގެ މެންބަރުން ބައިބައިކޮށް ފިތުނަ އުފެއްދުމުގެ ބޭނުމުގައި ބަޔަކު ފަތުރަމުން ގެންދާ ދޮގޮ ޚަބަރެކެވެ. އަދި މިޚަބަރު ފެތުރުމުގެ އަޑިގައި އިބްރާހީމް މުޙައްމަދު ޞާލިޙާއި އޭނާގެ ބައިވެރިން ހިމެނޭކަމުގައި ދެކުމުގެ ފުރުޞަތުވެސް އެބައޮތެވެ." އިދިކޮޅު ކޯލިޝަންގެ ބަޔާނުގައި ބުނެފައިވެއެވެ.

އެހެންކަމުން އެފަދަ ފިތުނައިގައި ދިވެހި ރައްޔިތުން ޖެހިވަޑައިނުގަތް ރައީސް ޔާމީން އެންޑޯޒް ކުރައްވާފައިވާ ދިވެހީންގެ ރިޔާސީ ކެންޑިޑޭޓް، ކެންޑިޑޭޓް ނަންބަރު 4، ޑރ. މުޙައްމަދު މުޢިއްޒާއި އެކު ސާބިތުވެ ތިއްބެވުމަށް އިދިކޮޅުުން ވަނީ އެދިފައެވެ.

"އަދި اللهގެ އިރާދަފުޅާއެކު ސެޕްޓެމްބަރ 9 ވަނަ ދުވަހުގެ އިންތިޚާބު އެއްބުރުން ޑރ، މުޙައްމަދު މުޢިއްޒަށް ކާމިޔާބުކޮށްދެއްވުމުގައި ތިޔަ އެންމެ ބޭފުޅުންގެ ވޯޓު އެމަނިކުފާނަށް ދެއްވުންވެސް އެދެމެވެ." އިދިކޮޅުގެ ބަޔާނުގައި ބުނެފައިވެއެވެ.

ފާރިސް އާއި ޔާމީން ބައްދަލު ކުރެއްވި ކަމަށް ދެކެވޭ ވާހަކަ، ކަރެކްޝަންސްއިން ވެސް ވަނީ ދޮގު ކޮށްފައެވެ.