ދުނިޔޭގެ އެންމެން މިހާރު ދައްކަނީ ބޯޑަރު ހުޅުވުމަށް ރައީސް ދެއްކެވި ހިތްވަރުގެ ވާހަކަ: ޑރ.މައުސޫމް

ދުނިޔޭގެ އެންމެންވެސް މިހާރު ދައްކާ ވާހަކަ އަކީ، ކޮވިޑް އާއި ގުޅިގެން ރާއްޖޭގެ ބޯޑަރު ބަންދު ކުރުމަށްފަހު، އަލުން ބޯޑަރު ހުޅުވުމަށްޓަކައި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ނިންމެވި ހިތްވަރުގަދަ ނިންމެވުމުގެ ވާހަކަ ކަމަށް ޓޫރިޒަމް މިނިސްޓަރު ޑރ. މައުސޫމް ވިދާޅުވެއްޖެެއެވެ.

ފަތުރުވެރިކަމަށް 50 އަހަރުފުރުމާއި އަދި ރާއްޖޭގައި ފުރަތަމަ ފަހަރަށް ފާހަގަކުރަން ފެށުނު ގައުމީ ފަތުރުވެރިކަމުގެ ދުވަސް ފާހަގަ ކުރުމަށް ރޭ ބޭއްވި ޖަލްސާގައި މިނިސްޓަރު ވިދާޅުވީ، ދުނިޔޭގެ އެންމެން މިހާރު ދައްކާ ވާހަކައަކީ ދިވެހިރާއްޖޭގެ ބޯޑަރު ހުޅުވުމުގެ މުހިންމު ކަމުގެ ވާހަކަކަމަށާ އަދި ރަނގަޅު ދަނޑިވަޅުގައި ފަތުރުވެރިކަމަށް ރާއްޖޭގެ ބޯޑަރު ހުޅުވުމަށްޓަކައި ރައީސުލްޖުމްހޫރިއްޔާ ނިންމެވި ހިތްވަރުގަދަ ނިންމެވުމުގެ ވާހަކަކަމަށެވެ.

މިއާއެކު ޑރ. މައުސޫމް ވިދާޅުވީ، ކޯވިޑަށްފަހު ރާއްޖޭގެ ފަތުރުވެރިކަން މިހިސާބަށް އާދެވިފައި އޮތީ އެދުވަހު ފަތުރުވެރިކަމުގެ ސިނާއަތުގެ ފަރާތްތަކާއި ސިއްހީ ދާއިރާގައި ޙަރަކާތްތެރިވާ ބޭފުޅުންނާ ވާހަކަދައްކަވައިގެން ނިންމެވި ނިންމެވުމުގެ ސަބަބުންކަމަށާ އެކަމަށްޓަކައި ރައީސަށް އިހްލާސްތެރިކަމާއެކު ޝުކުރު އަދާކުރައްވާކަމަށެވެ.

ރާއްޖެއަކީ މިއަދު ދުނިޔޭގެ ކަންކޮޅުތަކުން މީހުން ޗުއްޓީ ހޭދަކުރަން އަންނަން އެންމެ ބޭނުންވާ އެއް މަންޒިލްކަން ފާހަގަކުރައްވައި މިނިސްޓަރު ވިދާޅުވީ ރާއްޖެ މަގްބޫލް މަންޒިލަކަށްވީ ސަރުކާރާއި އަމިއްލަ ފަރާތްތަކާއި ގުޅިގެން ކުރެވޭ މަސައްކަތުން ކަމަށެވެ.

"ފަތުރުވެރިކަމާގުޅޭ ބޮޑެތި ކަންކަން ރާވައި ހިންގުމުގައި ކަމާގުޅުންހުރި ފަރާތްތަކުގެ ޚިޔާލާއި މަޝްވަރާ ހޯދުމުގެ ސިޔާސަތު ރައީސުލްޖުމްހޫރިއްޔާ ގެންގުޅުއްވާކަމީ މިއަދު ރާއްޖޭގެ ފަތުރުވެރިކަމަށް ކުރިއެރުން ލިބެމުން އަންނަ މައިގަނޑު އެއް ސަބަބު." މިނިސްޓަރ ވިދާޅުވިއެވެ.

މީގެ އިތުރުން މިނިސްޓަރު ވިދާޅުވީ، މިހާރުގެ މިސްރާބަށް ދަތުރު ކުރާނަމަ، ފަތުރުވެރިކަން ކުރިއަށް ގެންދިއުމަށް ކުރާ މަސައްކަތުގައި ރާއްޖޭގެ ފަތުރުވެރިކަމުގެ މަންފާ ރާއްޖޭގެ ހުރިހާ ރައްޔިތުންނަށް ސާފު ސީދާކޮށް ފޯރާނެ ކަމަށެވެ.

މުސްތަގުބަލުގައި ވެސް ކުރިއަށްދާނީ އެ މިސްރާބަށް ކަމަށާއި އޭގެ ސަބަބުން ރަށްރަށުގެ ގުދުރަތީ ތަރިކައާއި، ތާރީހާއި، ސަގާފަތް ރައްކާތެރި ކުރެވި، އާމްދަނީއަށް މަގުފަހިވާނެ ކަމަށް ވިދާޅުވި އެވެ.

".. ރަށްރަށުގައި އާއިލާއާއެކު ދިރިއުޅެމުން ފަތުރުވެރިކަމުގެ ވިޔަފާރި ކުރެވޭނެ، އަދި ކުރާ ހިތްވާ މަސައްކަތުގެ ދާއިރާއިން ވަޒީފާ ލިބޭނެ. ފަތުރުވެރިކަމުން ފަންނުވެރިންނާއި، ފަންނާނުންނަށާއި، މަސްވެރިންނާއި، ދަނޑުވެރިންނާއި، ރާވެރިންނަށް އާމްދަނީ ހޯދުމުގެ ފުރުސަތު އިތުރަށް ފަހިވާނެ،" މިއަދު ފާހަގަކުރާ ޓޫރިޒަމްގެ ރަންޔޫބީލްގެ މުނާސަބަތުގައި މިނިސްޓަރު ވިދާޅުވި އެވެ.