އިންތިޚާބީ ނައިބުރައީސް ޕީޕީއެމް ދޫކުރައްވައި ޕީއެންސީ އަށް

އިންތިޚާބީ ނައިބުރައީސް ހުސެއިން މުޙައްމަދު ލަތީފް ޕީޕީއެމް ދޫކުރައްވައި ޕީއެންސީ އާއި ގުޅިވަޑައިގެންފިއެވެ.

ރައްޔިތުންގެ މަޖިލީހުގެ މިއަދުގެ ޖަލްސާ ފައްޓަވަމުން ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވަނީ އެކަން އިޢްލާނު ކުރައްވައިފައެވެ.

ރައީސް ނަޝީދު ވިދާޅުވީ އިންތިޚާބީ ނައިބު ރައީސް ރިޔާސީ އިންތިޚާބުގައި ޕީއެންސީގެ ކެންޑިޑޭޓުގެ ރަނިންމޭޓުގެ ގޮތުގައި ވާދަކުރެއްވީ ޕާޓީ ބަދަލުކުރެއްވުމަށްފަހު ކަމަށެވެ.

ހަމައެއާއެކު އެމަނިކުފާނު ޕާޓީ ބަދަލުކުރެއްވިކަން މަޖިލީހުގެ އިދާރާއަށް މިހާރު އަންގަވާފައިވާ ކަމަށާއި، އިލެކްޝަންސް ކޮމިޝަނުން ވެސް ލިޔެކިޔުންތައް މަޖިލީހަށް ހުށަހަޅާފައިވާ ކަމަށް ރައީސް ނަޝީދު ވިދާޅުވިއެވެ.

ރައްޔިތުންގެ މަޖިލިހުގައި ޕާޓީތަކަށް މެންބަރުން ނިސްބަތްވާ ގޮތަށް ބަލާއިރު، އެމްޑީޕީގައި 56 މެންބަރުން، ދަ ޑިމޮކްރެޓްސް ގައި 13 މެމްބަރުން، ޕީޕީއެމްގައި 4 މެންބަރުން، ޕީއެންސީގައި 4 މެންބަރުން، އެމްއެންޕީގައި 3 މެންބަރުން، ޖުމްހޫރީ ޕާޓީގައި 2 މެންބަރުން، އެމްޑީއޭގައި 2 މެންބަރުން ތިއްބެވިއިރު، ވަކި ޕާޓީއަކަށް ނިސްބަތްނުވާ 3 މެންބަރުން ތިއްބަވައެވެ.