ނަޝީދަށް ބޮޑުވަޒީރުކަން ހޯދައިދޭން ވެރިކަމުގެ ނިޒާމު ބަދަލެއް ނުކުރެވޭނެ: މޮސްޓާ
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގައި ހުންނެވުމަށް ފަހު އެ ޕާޓީން ވަކިވެވަޑައިގެން މަޖިލީހުގެ ރައީސް މުހައްމަދު ނަޝީދަށް ރާއްޖޭގެ ބޮޑުވަޒީރުކަން ހޯދައިދޭން ވެރިކަމުގެ ނިޒާމު ބަރުލަމާނީއަށް ބަދަލެއް ނުކުރެވޭނެކަމަށް މަޖިލީހުގެ ނޮޅިވަރަމް ދާއިރާގެ މެމްބަރު މުހައްމަދު ނަޝީދު އަބްދުالله (މޮސްޓާ) ވިދާޅުވެއްޖެ އެވެ.
މެމްބަރު ނަޝީދު މިފަދައިން ވިދާޅުވެފައި ދިވެހިރާއްޖޭގައި މިހާރު އޮތް ވެރިކަމުގެ ނިޒާމު ބަދަލުކުރުމާއި ގުޅޭގޮތުން ރައްޔިތުންގެ ޚިޔާލު ހޯދުމުގެ އާންމު ވޯޓު ނެގުމަށް މަޖިލީހުން ފާސްކޮށްފައިވާ ޤަރާރާއި ގުޅޭގޮތުން އިލެކްޝަންސް ކޮމިޝަނުން ފޮނުވާފައިވާ ސިޓީއާއި ގުޅޭ މައްސަލައިގައި ބަހުސް ކުރައްވަމުން ނެވެ.
އެގޮތުން މޮސްޓާ ވިދާޅުވީ ވެރިކަމުގެ ނިޒާމު ބަދަލުކުރާ ވާހަކަ ބަޔަކު ފެށީ ސިޔާސީ ގޮތުން ވަކި ބޭފުޅަކަށް ބާރުވެރިކަން ހޯދައިދިނުމަށް ކަމަށެވެ. އަދި ވަކި ބޭފުޅެއްގެ އަތްޕުޅުން ބާރުތައް ގެއްލި ސިޔާސީ ގޮތުން ބަލިކަށިވުމުން ކަމަށެވެ.
ނަޝީދު އިޝާރާތްކުރެއްވީ މަޖިލީހުގެ ރައީސް މުހައްމަދު ނަޝީދަށެވެ.
"ރިޔާސީ ނިޒާމެއްގެ ފުރަތަމަ ބުރުގައި ރައްޔިތުން ވޯޓުލާފައި، އިންތިޚާބުގެ ދެވަނަ ބުރަކާއި މި ދޭތެރޭން ދިވެހިރާއްޖޭގެ ނިޒާމު ބަދަލުކުރަންށޭ ކިޔައިގެން ސިޔާސީ މަންފާ ހޯދަން ސިޔާސީ ގޮތުން ތިމަންނާއަކީ މަންޑޭލާކަމަށް ހެދިގެން ދައުވާކުރި މީހަކު ސިޔާސީ ބާރުވެރިކަން ހޯދަންވެގެން މި ކުރަން އުޅޭ މަސައްކަތަކީ އަމިއްލަ އަންބޮޑިއަށް ބޮޑުކުރަން ކުރަން އުޅޭ ކަމެއް ފިޔަވައި އިތުރު އެއްވެސް ކަމެއް ނޫން"
މެމްބަރު މުހައްމަދު ނަޝީދު އަބްދުالله
މެމްބަރު ނަޝީދު ވިދާޅުވީ ރައްޔިތުންގެ ވޯޓަކުން ނޫނީ ވެރިކަމުގެ ނިޒާމު ބަދަލު ކުރުމަކީ ކުރެވޭނެ ކަމެއް ނޫން ކަމަށެވެ. އަދި މިހާލަތަށް އެންމެ ރަނގަޅުވާނީ ރައްޔިތުން އިންތިޚާބު ކޮށްފައިވާ ރައީސްއަށް އެއްބާރުލުން ދީގެން ގައުމުގެ ކަންކަން ހަމަމަގަށް އެޅުވުމުގެ މަސައްކަތް ކުރިއަށް ގެންދިއުން ކަމަށެވެ.
އިންތިޚާބީ ރައީސް ޑރ މުހައްމަދު މުއިއްޒަކީ ޤާބިލު ބޭފުޅެއް ކަމަށާއި، އެމަނިކުފާނަކީ ތަރައްގީގެ ބިޔަ މަޝްރޫއުތައް ހިންގަވާފައިވާ ބޭފުޅަކަށް ވުމުން، ރައްޔިތުންގެ ނިންމުމަށް އިޚްތިރާމުކޮށް ޑރ މުއިއްޒަށް ފުރުސަތު ދެއްވުމަށް މެމްބަރު ނަޝީދު ވަނީ ގޮވާލައްވާފަ އެވެ.
އޭގެ އިތުރުން ދައުލަތުގެ ނެތް ފައިސާއަކުން ނިޒާމީ ވޯޓުނެގުމަށް ޚަރަދުކުރަން ބައެއް ފަރާތްތަކުން ބާރުއަޅަމުންދާތީ އެކަމާއި އެތައް ސުވާލެއް އުފެދޭކަމަށް މެމްބަރު ނަޝީދު ވަނީ ވިދާޅުވެފަ އެވެ އަދި އެކަންކަން ހިތުހުރި ގޮތަކަށް ހިންގުމަށް ރައްޔިތުން ފުރުސަތުދީގެން ތިއްބަވާނެކަމަށް ގަބޫލު ނުކުރައްވާކަމަށް ވެސް މެމްބަރު ނަޝީދު ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
