ނަޝީދާއި މެދު އިޔާޒު ނުރުހުމަކީ، ނަޝީދަށް ވޯޓު ދޭނެ ސަބަބެއް: ހަސަން ލަތީފު

އެމްޑީޕީގެ ރިޔާސީ ޓިކެޓު އެމްޑީޕީގެ ރައީސް އަދި މަޖިލީހުގެ ރައީސް މުހައްމަދު ނަޝީދަށް ލިބިވަޑައިގެންފާނެތީ އަދާލަތު ޕާޓީގެ އިސްއެކްޓިވިސްޓް، އަދި ރައީސް ސޯލިހަށް ސޯޝަލް މީޑިއާގައި ހުޝާމަދުކުރައްވަމުން ގެންދަވާ ޑރ މުހައްމަދު އިޔާޒު ކަންބޮޑުވުން ފާޅުކުރެއްވުމަކީ ނަޝީދަށް އޮތް ތާއީދު އިތުރުވެގެންދާނެ ކަމެއްކަމަށް އެމްޑީޕީގެ ކުރީގެ ޗެއަރ ޕާރސަން އަދި ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެންބަރު ޙަސަން ލަތީފު ވިދާޅުވެއްޖެއެވެ.

ހަސަން ލަތީފު މިފަދައިން ވިދާޅުވެފައިވަނީ އެމްޑީޕީގެ ރިޔާސީ ޓިކެޓު ހޯދުމަށް ބައްވާ ޕްރައިމރީގައި ނަޝީދު ބައިވެރިވެ ވަޑައިގަތުމަށް ނިންމެވުމާއި ގުޅިގެން، ނަޝީދަށް ވޯޓު ނުދިނުމަށް ގޮވާލާ ޑރ އިޔާޒު ކުރެއްވި ޓްވީޓަކަށް ރައްދުދެއްވަމުންނެވެ.

އެމްޑީޕީގެ އެތެރޭހެ އިންތިޚާބަކާއި ގުޅިގެން އަދާލަތު ޕާޓީގެ ދީނީ އިލްމުވެރިއެއްކަމަށްވާ ޑރ އިޔާޒު ވަނީ، އެ އިންތިޚާބުގައި ނަޝީދާއި ދެކޮޅަށް ތެދުވެފައެވެ. ނަޝީދަށް އެމްޑީޕީގެ ރިޔާސީ ޓިކެޓު ދޭން "ހެޔޮނުވާނެ" ކަމަށް ޑރ އިޔާޒު ވިދާޅުވިއެވެ.

"ދެދުވަހު އެކައްޗެއް ނުކިޔާ މީހަކަށް ރިޔާސީ ކެނޑިޑޭޓުކަން ދޭން ހެޔޮނުވާނެ. ރޭގައި ބުނީ ނިޡާމު ބަދަލުކޮށްގެން ނޫނީ ޕްރައިމަރީ ބާއްވަން ޤަވާޢިދު ތަންނުދެޔޭ، މިއަދު އެހުރީ އެބުނާ ތަންނުދޭ ޕްރައިމަރީ އަށް ވޯޓު ހޯދަން ނިކުމެ"

އަދާލަތުގެ ދީނީ އިލްމުވެރިޔާ ޑރ އިޔާޒް

ޑރ އިޔާޒުގެ އެ ޓްވީޓަށް ރައްދުދެއްވަމުން ހަސަން ލަތީފު ވިދާޅުވީ ރައީސް ނަޝީދު އެމްޑީޕީގެ ޕްރައިމަރީގައި ވާދަކުރައްވާތީ ޑރ އިޔާޒު ކަންބޮޑުވެލައްވާނަމަ، އަދި ނަޝީދަކީ ޑރ އިޔާޒު ގަޔާވާ މީހަކަށް ނުވާނަމަ، އެއީ އެމްޑީޕީ މީހުން ނަޝީދަށް ވޯޓު ދޭނެ ސަބަބެއް ކަމަށެވެ.

ޑރ އިޔާޒު ގަޔާވާ މީހަކަށް ވޯޓުދީގެން އެމްޑީޕީއަށް ވެދާނެ ދެރަ ގޮތާއި މެދު އެމްޑީޕީގެ އާންމު މެމްބަރުން ވިސްނާނެކަމަށް ހަސަން ލަތީފު ވަނީ ވިދާޅުވެފައެވެ.

"އައްދެ! ރައީސް ނަޝީދު ޕްރައިމަރީގައި ވާދަކުަރައްވާތީ އިޔާޒް ހާދަ ކަންބޮޑުވީ! ރ.ނަޝީދާ ހުރެ އިޔާޒް ތިޔަހާ ކަންބޮޑުވަންޏާ އެމްޑީޕީގެ މެންބަރުން ދެކޭނީ އެއީވެސް ސަބަބެއްކަމަށް ރ.ނަޝީދަށް ވޯޓުދޭން އޮތް.އިޔާޒް މާ ގަޔާވާ މީހަކަށް ވޯޓުދީގެން އަނެއްކާ  އަށް އެމްޑީޕީއަށް ވެދާނެ ދެރަ ގޮތަކާމެދު ވިސްނާނެ"

އެމްޑީޕީގެ ކުރީގެ ޗެއަރ ޕާރސަން ހަސަން ލަތީފު

އެމްޑީޕީގެ ރިޔާސީ ޕްރައިމަރީގައި ޕާޓީގެ ދެ ލީޑަރުން ވާދަކުރައްވާނެކަން އިއުލާނު ކުރައްވާފައިވާއިރު، ސަރުކާރު ކޯލިޝަންގައި ތިއްބެވި ބައެއް ސިޔާސީ ޕާޓީތަކުގެ ލީޑަރުންވެސް ގެންދަވަނީ މި އިންތިޚާބުގައި ނުސީދާ ކެންޕެއިން ކުރައްވަމުންނެވެ.

އެގޮތުން އަދާލަތު ޕާޓީއާއި އެ ޕާޓީގެ އިސް ބޭފުޅުން ރައީސް ސޯލިހުގެ ފަހަތްޕުޅުގައި ތިއްބެވިކަން އެ ބޭފުޅުންގެ ވާހަކަތަކުން ޔަގީން ކުރެވެއެވެ.