ގްރަނާޑާ އަތުން މޮޅުވެ، ރެއާލް މެޑްރިޑް އަލުން އެއްވަނައަށް

ސްޕެނިޝް ލަލީގާގައި ހޮނިހިރު ދުވަހުގެ ރޭ އަމިއްލަ ދަނޑުގައި 2-0 ގެ ނަތީޖާއަކުން ގްރަނާޑާ އަތުން މޮޅުވެ ރެއާލް މެޑްރިޑް އަލުން ލީގު ތާވަލުގެ އެއްވަނައަށް ކުރިއަށް ޖެހިލައިފިއެވެ.

ރެއާލްގެ ސެންޓިއާގޯ ބެރްނަބޭއޯގައި ކުޅެވުނު މިމެޗުގެ ފުރަތަަމަ ހާފުގައި އެޓީމުން ގިނަވަގުތު ބޯޅަ ހިފަހައްޓައިގެން ކުޅެ މެޗު ޑޮމިނޭޓުކުރި ނަމަވެސް ގްރަނާޑާގެ ގޯލާއި އަމާޒުކޮށް މިހާފުގައި ރެއާލަށް ފޮނުވާލެވުނީ މަދު ހަމަލާއެކެވެ.

ނަމަވެސް އޭގެ ތެރެއިން އެއް ފުރުސަތެއްގައި އެޓީމުން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ. މިލަނޑު އެޓީމަށް ކާމިޔާބުކޮށްދިނީ ފޯވާޑް ބްރަހީމް ޑިއާޒް އެވެ. މިއީ އެޓީމުގެ ތަޖުރިބާކާރު މިޑްފިލްޑަރު ޓޯނީ ކްރޫސް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ރެއާލް މެޑްރިޑް ކުރީގައި އޮވެގެންނެވެ.

މެޗުގެ ދެވަަނަ ހާފުގައި ރެއާލް މެޑްރިޑުން ވަނީ އެޓީމުގެ ކުޅުން އިތުރަށް ރަގަޅުކޮށް އެޓޭކުތައް ވަރުގަދަކޮށްފައެވެ. ނަތީޖާއެއްގެ ގޮތުން ދެވަނަ ހާފުގެ 57 ވަނަ މިނެޓުގައި އެޓީމުގެ ބްރެޒިލް ފޯވާޑް ރޮޑްރީގޯ ވަނީ ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްދީފައެވެ.

މިއީ އެޓީމުގެ އިގިރޭސި މިޑްފީލްޑަރު ބެލިންހަމް ގްރަނާޑާގެ ޕެނަލްޓީ އޭރިއާ ތެެރޭގައި މުޅިން ހުސްކޮށް ހުރެ ފޮނުވާލި ބާރު ހަމަލާ ކީޕަރު ދިފާއުކޮށްފި ބޭރަށް ނެރުނު ވަގުތު މުޅިން ހުސްކޮށް ހުރެ ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. އަދި މިއީ މިސީޒަނުގައި ލީގުގައި ކުޅުނު 15 މެޗުގައި އޭނާ ކާމިޔާބުކުރި 6 ވަނަ ލަނޑެވެ.

މީގެ އިތުރުން ވެސް މިހާފުގައި ރެއާލް މެޑްރިޑްގެ ފޯވާޑް ހޯސެލޫ ގެ އިތުރުން ބެލިންހަމް އަށް ވެސް ވަނީ ލަނޑުޖަހާނެ ރަގަޅު ހުސް ފުރުސަތުތަކެއް ލިބި ބޭނުން ނުކުރެވިފައެވެ. މިއާއެކު މެޗުގެ ކުޅުން ނިމިގެންދިޔައީ 2-0 ގެ ނަތީޖާއަކުން ރެއާލް މެޑްރިޑް ކުރީގައި އޮވެގެންނެވެ.

މިމެޗުން ލިބުނު ތިން ޕޮއިންޓާއެކު ލީގުގައި ކުޅުނު 15 މެޗުން ރެއާލް މެޑްރިޑަށް 38 ޕޮއިންޓް ލިބިފައިވާއިރު، ދެވަނަގައި އޮތް ޖިރޯނާއަށް ވެސް 15 މެޗުން ވަނީ 38 ޕޮއިންޓް ލިބިފައެވެ. ނަމަވެސް ރެއާލް މެޑްރިޑަށް ލީގު ތާވަލުގެ ކުރި ލިބެނީ ލީގުގައި މިދެޓީމުގެ ކުރިމަތިލުންތަކުން މިވަގުތު ރެއާލް އަށް ކުރި ލިބޭތީއެވެ.

މިދެޓީމު ޖިރޯނާގެ ދަނޑުގައި ކުޅުނު މެޗު 3-0 ގެ ނަތީޖާއަކުން ރެއާލް މެޑްރިޑް ކާމިޔާބުކޮށްފައިވާއިރު، ރެއާލް މެޑްރިޑްގެ ދަނޑުގައި މިދެޓީމު ވާދަކުރާ ދެވަނަ މެޗު ކުޅުމަށް ހަމަޖެހިފައިވަނީ އަންނަ އަހަރުގެ ފެބުރުއަރީ މަހުގެ 11 ވަނަ ދުވަހުއެވެ.