ޖަވާބުދާރީވަމުން އީވާ ކިޔައިދެއްވީ އެމްޑީޕީން އޭނާއަށް 'އަދަބު' ދިން ސަބަބުތައް!

ރައްޔިތުންގެ މަޖިލީހުގެ ނާއިބު ރައީސްގެ މަގާމުން ވަކި ކުރައްވައި، އެމްޑީޕީން 'އަދަބު' ދީ ފައިވާ ކަމަށް ވިދާޅު އެފަދައިން އަދަބު ދިން ސަބަބުތައް، މިއަދު އެ މަގާމުން އިސްތިއުފާ ދެއްވި މަޖިލީހުގެ ގަލޮޅު އުތުރު ދާއިރާގެ މެންބަރު އީވާ އަބްދުالله ކިޔައި ދެއްވައިފިއެވެ.

މިއަދު މަޖިލީހުގައި ކުރިއަށް ދިޔަ އީވާގެ އިތުބާރު ނެތް ކަމުގެ މައްސަލައިގެ ގަރާރަށް، ޖަވާބުދާރީވުމަށް އޭނާއަށް ފުރުސަތު ދެއްވުމުން، ވާހަކަދައްކަވަމުން ވިދާޅުވީ، އޭނާއަކީ މަޖިލީހުގެ ނާއިބު ރައީސް ކަމުގެ މަގާމަށް ނާގާބިލް ބޭފުޅެއް ކަމަށް އެއްވެސް ޕާޓީއެއްގެ މެންބަރަކަށް ނުބުނެވޭނެ ކަމަށެވެ. އަދި އެ މަގާމު އަދާކުރެއްވުމުގައި ގާނޫނު އަސާސީ އާއި، މަޖިލީހުގެ ގަވާއިދާއި އަދި ސްޕްރީމްކޯޓުގެ ހުކުމާއި ވެސް ޚިލާފް ވެވަޑައިގެންފައި ނުވާނެ ކަމަށް އޭނާ ވިދާޅުވި އެވެ.

"ހަގީގަތަކީ، ނާގާބިލް، ކިބުރުވެރި ސަރުކާރަކާއި ދިމާއަށް އަޅުގަނޑު ނާގާބިލް ކިބުރުވެރި ސަރުކާރެކޭ ބުނީ. ހަގީގަތަކީ އެ ސަރުކާރުން މާ ބޮޑަށް އަޅުގަނޑާ ނުރުހުނީ. އަދި އަޅުގަނޑުވެސް އެ ސަރުކާރާ މާ ބޮޑަށް ނުރުހުނީ. އެމްޑީޕީ ސަރުކާރާ އަޅުގަނޑު ނުރުހުގެން އަޅުގަނޑު ބަސް ބުނެގެން ހަގީގަތުގައި އަޅުގަނޑަށް ދޭ އަދަބު މިއީ. މިއީ އެމްޑީޕީ ސަރުކާރުގެ ވެރިކަން ގެއްލުނީމާ އަދަބު އަޅުގަނޑަށް ދިނީ."

މަޖިލީހުގެ ގަލޮޅު އުތުރު ދާއިރާގެ މެންބަރު އީވާ އަބްދުالله

ނާއިބު ރައީސް ކަމުގެ މަގާމުން އީވާ ދުރުކޮށް، އޭނާ އަށް 'އަދަބު' ދިނުމަށް އެމްޑީޕީން ނިންމި ސަބަބުތަކުގެ ތަފްސީލް ހާމަ ކުރައްވައި ވާހަކަދައްކަވަމުން އީވާ ވަނީ، އޭގެ ތެރޭގައި އޭނާ މަޖިލީހަށް ހުށަހަޅާފައިވާ ގަރާރު ތައްވެސް ހިމެނޭ ކަމަށެވެ.

ނިމިދިޔަ ސަރުކާރުން ކުރި އެންމެ ބޮޑު ވައްކަން، ވެންޓިލޭޓަރގެ ވައްކަން. އެ ކަން އަޅުގަނޑު ހުށަހެޅި ގަރާރަކުން، އޮޑިޓާ ޖެނެރަލް ހިންގެވި ތަހުގީގަކުން އެ ވައްކަން ހާމަވި ފުރަތަަމަ ދުވަހު އަޅުގަނޑަށް އެނގޭ މަނިކުފާނުގެ ސަރުކާރުން އަޅުގަނޑަށް މި އަދަބު ދޭނެކަން. ވައުދުވީ ފަދައިން އެމްޑީޕީން ދައުލަތުގެ ދަރަނި އަލުން އެކުލަވައި ނުލީމާ، އެކަމާއި މަޖިލީހުގައި އިހްތިޖާޖު ކޮށް، އެކަމަށް މަޖިލީހަށް ގަރާރެއް ހުށަހެޅި ދުވަހު، އަޅުގަނޑަށް އެނގޭ ސަރުކާރުން އަޅުގަނޑާ ދިމާކުރާނެ ކަން. ދައުލަތުގެ ފޮރިން ޔޫސަބަލް ރިޒާވް ހުރީ ކިހާވަރަކަށްތޯ މާލީ ވަޒީރަށް ދަންނަވައި ސުވާލު ކުރި ދުވަހު، އަދި މާލީ ވަޒީރު އެ މައުލޫމާތު ހާމަ ނުކުރެއްވީމާ އަޅުގަނޑުމެން މިތާ އިހްތިޖާޖު ކުރި ދުވަހު އަޅުގަނޑަށް އެނގޭ މަނިކުފާނުގެ ޕާޓީންނާ ސަރުކާރުން އަޅުގަނޑާ ދިމާކުރާނެ ކަން. ތިން އަހަރު ވަންދެން އެމްއެމްޕީއާރުސީގެ ޚިޔާނާތުގެ މައްސަލަތައް ރައީސުލްޖުމްހޫރިއްޔާ ގެ މޭޒު ކޮޅުގައި އޮވެ އެކަމަށް އަޅާނުލީމާ އެ ވާހަކަ މަޖިލީހުގައި ދެއްކުމުން އަޅުގަނޑަށް އެނގޭ އިއްޔެގެ ސަރުކާރު އަޅުގަނޑާ ދިމާކުރާނެ ކަން. ބަލާން ބުނި އެއްވެސް މަރެއް ނުބެލީމާ، އެ ވާހަކަ ދައްކަން ފެށީމާ އަޅުގަނޑަށް އެނގޭ އިއްޔެގެ ސަރުކާރު އަޅުގަނޑާ ދިމާކުރާނެ ކަން. މާލޭގެ ރައްޔިތުންނަށް ދޭން ބުނި ބޯހިޔާވަހިކަން ސުން ގަޑި ހަމަވިއިރު ވެސް ނުދީނީމާ އެވާހަކަ ދެއްކުމުން އަދި ބޮޑެތި ރޭޕް ކޭސްތަކާއި ޖިންސީ ގޯނާގެ މައްސަލަތައް ގާތް މީހުންވީމާ އޮބަހައްޓައިގެން ތިބުމުން އެވާހަކަ ދެއްކުމުން އަޅުގަނޑަށް އެނގޭ އިއްޔެގެ ސަރުކާރު އަޅުގަނޑާ ދިމާކުރާނެ ކަން.

މަޖިލީހުގެ ގަލޮޅު އުތުރު ދާއިރާގެ މެންބަރު އީވާ އަބްދުالله

އީވާ ވިދާޅުވީ އެމްޑީޕީ އަކީ ސިޔާސަތު ތަކަކާއި އެކީގައި އުފެދުނު ޕާޓީއެއް ކަމަށެވެ. އެގޮތުން، ވައްކަމާއި ދެކޮޅަށް ވަކާލާތުކޮށް، އިންސާފުވެރިކަން ގާއިމްކޮށް، އިންސާފުވެރި ޝަރީއަތެއް ހިންގުމަށް ގޮވާލައި، ހައްގުތައް ރައްކާތެރިކުރުން ފަދަ ކަންކަމަކީ އެޕާޓީ އުފެދުނު ސަބަބު ތަކުގެ ތެރޭގައި ހިމެނޭ ކަންކަން ކަމަށެވެ.

އެހެންނަމަވެސް، ކުރީގެ ރައީސް އިބްރާހިމް މުހައްމަދު ޞާލިހުއަށް ވެރިކަން ލިބިވަޑައިގެންނެވި ހިސާބުން ފެށިގެން އެމްޑީޕީން ވަނީ އެ އަސާސްތައް ހަނދާން ނައްތާލާފައި ކަމަށް އީވާ ވިދާޅުވި އެވެ.

އެގޮތުން ޚިޔާނާތާއި ދެކޮޅު ޕާޓީއަކަށް ވުމުގެ ބަދަލުގައި ވައްކަމަށް ޖާގަދޭ ޕާޓީއަކަށް އެމްޑީޕީ ހަދައި، އެމްޑީޕީއާ މުޅިން ބީރަށްޓެހި ބަޔަކު ގެނެސް، އެމްޑީޕީ ހިސޯރު ކުރިޔަ ދީ، އެމްޑީޕީގެ އާއްމު މެންބަރުންނަށް އެ ޕާޓީން ކެހި ދީފައިވާ ކަމަށް އީވާ ވިދާޅުވި އެވެ.

"ހަގީގަތަކީ އެ ވައްކަމުގެ ހާލީގައި އަޅުގަނޑު ތާށި ނުކުރެވުނީ. ހަގީގަތަކީ އެ ވައްކަމުގެ ހާލިއަށް އަޅުގަނޑު ގަންބާ ނުލެވުނީ. އެއީ އެމްޑީޕީން މިއަދު އަޅުގަނޑަށް ދޭ އަދަބަކީ."

މަޖިލީހުގެ ގަލޮޅު އުތުރު ދާއިރާގެ މެންބަރު އީވާ އަބްދުالله

އީވާ ވިދާޅުވީ، އެމްޑީޕީގެ ސަރުކާރުގެ ކޮރަޕްޝަނާއި، އެ ސަރުކާރުގެ ދަރަނީގެ ވާހަކަ ދެއްކެވުމުން އޭނާއަށް އަދަބު ދިން ނަމަވެސް، އެމްޑީޕީއަށް ވެރިކަން ގެއްލުނީ މީހަކު ދެއްކި ވާހަކަ އަކުން ނޫން ކަމަށެވެ. އެހެނެއް ކަމަކު ވެރިކަން ގެއްލުނީ އެ ޕާޓީން ކަން ކުރި ގޮތުން ކަމަށެވެ.