"އަބަދު ތެޔޮ އެތެރެކޮށްގެން ހަކަތައިގެ ކަންތައްތައް ހަމަޖައްސާ ގައުމެއްގެ ގޮތުގައި އޮވެވޭކަށްނެތް"

ދާއިމީގޮތެއްގައި ތެޔޮ އެތެރެކޮށްގެން ހަކަތައިގެ ކަންތައްތައް ހަމަޖައްސާ ގައުމެއްގެގޮތުގައި އޮތުމަކީ ކުރެވޭނެ ކަމެއް ނޫންކަމަށް، ރައީސުލްޖުމްހޫރިއްޔާ ޑރ. މުހަންމަދު މުއިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ވެރިކަމާ ހަވާލުވެވަޑައިގަތް ފަހުން ގައުމުން ބޭރަށް ކުރެއްވި ފުރަތަމަ ދަތުރުފު ނިންމަވާލެއްވުމަށްފަހު އަނބުރާ ރާއްޖެ ވަޑައިގެން، ވެލާނާ އިންޓަނޭޝަނަލް އެއާޕޯޓުގައި ނޫސްވެރިންނާ ބައްދަލުކުރައްވައި ވާހަކަ ދައްކަވަމުންނެވެ.

ސަރުކާރުގެ އަމާޒަކީ ކުރިއަށް އޮތް ފަސް އަހަރުގެ ތެރޭގައި ކަރަންޓުގެ 33 އިންސައްތަ ފުއްދައިދޭނެ އިޢާދަކުރަނިވި ހަކަތައިގެ ނިޒާމެއް ޤާއިމުކުރެއްވުން ކަމަށް، ދުބާއީގައި ކުރިއަށްދިޔަ ކޮޕް28 ސަމިޓްގައި ވާހަކަ ދައްކަވަމުން މީގެ ކުރިން ރައީސް ވަނީ ވިދާޅުވެފައެވެ.

މިއަދު ނޫސްވެރިނަންނާ ބައްދަލުކުރައްވާ ވާހަކަފުޅު ދައްކަވަމުން ރައީސް ވިދާޅުވީ، މިމަޝްރޫއާއި ގުޅިގެން ގިނަ ގައުމުތަކެއްގެ އިސްވެރިންނާއި، އެކިއެކި ވިޔަފާރިވެރިންނާއި ބައްދަލުކޮށް މަޝްވަރާ ކުރެވިފައިވާކަމަށާއި، އަދި މި މަޝްވަރާ ބައްދަކުވުންތައް ކުރިއަށް ގޮސްފައިވަނީ ވަރަށްވެސް ރަނގަޅަށް ކަމަށެވެ.

"މިހާރުވެސް އެންވަޔަރަންމަންޓް މިނިސްޓަރ އެހުންނެވީ އެކޮޅުގަ، ކުރިއަށް އޮތް ހަފްތާއެއްހާ ދުވަހު މަޑުކުރައްވާނެ، މިކަމާގުޅޭ އެކިއެކި ފުރުސަތުތައް ފަހިކުރުމަށްޓައި،"

ރައީސް ޑރ. މުއިއްޒު

ރައީސް ވިދާޅުވީ، ބަޖެޓުން އަހަރަކު 750 މިލިއަން ޑޮލަރު ހަރަދު ކޮށް، އަބަދު ތެޔޮ އެތެރެކޮށްގެން ހަކަތައިގެ ކަންތަތްތައް ހަމަޖައްސައިގެން އޮންނަ ގައުމަކަށް ވެގެންއޮތުމަކީ ކުރެވޭނެ ކަމެއް ނޫންކަމަށާއި، ދެމެހެއްޓެނިވި ތަރައްގީއަށް ދިއުމަށްޓަކައި ދެމެހެއްޓެނިވި ހަކަތައިގެ ނިޒާކަމަކަށް ދާންޖެހޭކަމަށެވެ.

"ރިނިއުބަލް އެނާޖީ އަކީ އަޅުގަނޑުމެންގެ ކުރިއަށް އޮތްތަނުގެ ރާސްތާ ބައްޓަންވާނެދިމަ"

ރައީސް ޑރ. މުއިއްޒު

އިތުރަށް ވާހަކަފުޅު ދައްކަވަމުން ރައީސް ވިދާޅުވީ، މިހާރު 4 އިންސައްތައި ހުރި ރިނިޔުބަލް އެނާޖީ 33 އިންސައްތައަށް ކުރިއަށް އޮތް ފަސް އަހަރުގެ ތެރޭގައި ބަދަލުކުރެވޭނެ ކަމުގެ ފުރިހަމަ ޔަގީންކަން އެބައޮންނެވިކަމަށެވެ.