މި ފަސް އަހަރު ނިމޭއިރު ހައްދުންމަތި އޮންނާނީ ރާައްޖޭގެ ތަރައްގީގެ އެންމެ އުހުގައި: އަބްދުއްރަހީމް

ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ވެރިކަމުގެ ފަސް އަހަރު ނިމޭއިރު ހައްދުންމަތި އޮންނާނީ ތަރައްގީގެ އެންމެ އުހުގައި ކަމަށް ސްޕެޝަލް އެޑްވައިޒަރ ޓު ދަ ޕްރެސިޑެންޓް އަބްދުއްރަހީމް އަބްދުالله، އަދުރޭ ވިދާޅުވެއްޖެއެވެ.

ރައީސް ލ. ފޮނަދޫ ރައްޔިތުންނާއި ބައްދަލުކުރެއްވުމަށް މިރޭ ބޭއްވި ޖަލްސާގައި ވާހަކަ ދައްކަވަމުން އަދުރޭ ވަނީ ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި ލ އަތޮޅުގެ ހަތަރު ދާއިރާއަށް ޕީއެންސީގެ ޓިކެޓްގައި ވާދަކުރައްވާ ކެންޑިޑޭޓުން ހޮވުމަށް އެދިވަޑައިގެންފައެވެ. އަދި އެފަދައިން ކަން ކުރެއްވި ނަމަ، އެ ކެންޑިޑޭޓުން ވާނީ ހައްދުންމައްޗަށް ބޮޑު ބަދަލެއް ގެނެސްދޭނެ ކެންޑިޑޭޓުންނަށް ކަމަށް އޭނާ ވިދާޅުވިއެވެ.

އަޅުގަނޑު ކަށަވަރުކަން މިދެނީ ހައްދުންމަތީ ރައްޔިތުންނަށް. އިރާދަކުރެއްވިޔާ ހައްދުންމައްޗަށް ބޭނުންވާ ކުރިއެރުމާ ތަރައްގީ އަޅުގަނޑުމެން ގެނެސްދޭނަން. ތިބޭފުޅުންގެ ހިތްހަމަޖެހޭ ފެންވަރަށް އަޅުގަނޑުމެން މިކަން ކޮށްދޭނަން. ރައީސް ޑރ މުހައްމަދު މުއިއްޒުގެ ވެރިކަމުގެ ފުރަތަމަ ފަސް އަހަރު ނިމިގެންދާއިރު ހައްދުންމަތި އޮންނާނީ ދިވެހިންގެ ރާއްޖޭގެ ތަރައްގީގެ އެންމެ އުހުގައި. ސުވާލުވެސް އުފައްދަވާނެ ކަމެއް ނެތް. މުޅި ހައްދުންމައްޗަށް އެކީގައި އަަޅުގަނޑުމެން ތަރައްގީ ގެންނަން މި މަސައްކަތް ކުރަނީ

ސްޕެޝަލް އެޑްވައިޒަރ ޓު ދަ ޕްރެސިޑެންޓް އަބްދުއްރަހީމް އަބްދުالله

އަދުރޭގެ ވާހަކަފުޅުގައި އޭނާ ވަނީ، ހައްދުންމައްޗަކީ ރާއްޖޭގެ އަތޮޅު ތަކުގެ ތެރެއިން އެންމެ ފުރުސަތުތައް ބޮޑު އަތޮޅުކަން ގަބޫލުކުރައްވައި، ދައުރުގެ ކުރީ ކޮޅުގައި ހައްދުންމަތީގެ ތަރައްގީގެ މަޝްރޫއުތައް ފެއްޓެވިކަމަށްޓަކައި ރައީސްުލްޖުމްހޫރިއްޔާ އަށް ޝުކުރު އަދާކުރައްވާފައެވެ.

އަދުރޭ އިތުރަށް ވިދާޅުވިގޮތުގައި، ވާދަވެރިން ފާޑުކިޔައި ހެދި ނަމަވެސް، ސަރުކާރު އޮތީ ނުގުޑާފަދަ އަޒުމެއްގައި ކަމަށެވެ. އަދި ރައީސް މުޢިއްޒުގެ ވެރިކަމަށް އަންނަ ކޮންމެ ގޮންޖެހުމަކާއިވެސް ކުރިމަތިލާނީ ކެރިގެން ހިތްވަރާއި އެކީގައި ކަމަށެވެ.

މަނިކުފާނުގެ ވެރިކަން ދިފާއުކުރުމަށްޓަކައި އެކަކު ސާބިތުވެ ހުރިއްޔާ އެމީހަކީ އަޅުގަނޑު. މުޅި ހައްދުންމަތިވެސް މިއޮތީ އެ ގޮތުގައި.

ސްޕެޝަލް އެޑްވައިޒަރ ޓު ދަ ޕްރެސިޑެންޓް އަބްދުއްރަހީމް އަބްދުالله

މީގެ އިތުރުންވެސް އަދުރޭ ވިދާޅުވި ގޮތުގައި ހައްދުން މައްޗަށް ތަރައްގީ ގެނެވޭނެ ކަމީ ޝައްކު ކުރައްވާ ކަމެއް ނޫން ކަމަށާ އެހެން ނަމަވެސް ތަރައްގީ ގެނެވޭނީ ރައްޔިތުން ބޭނުން ވެގެންނެވެ. އެހެންކަމުން، އެކަމަށްޓަކައި ރައީސް މުއިއްޒަށް ވެރިކަން ކުރެއްވުމުގެ މަގު ފަހި ކޮށްދެއްވައި، މަޖިލީހުގެ މެޖޯރިޓީ ސަރުކާރަށް ހޯދައި ދެއްވުމަށް އަދުރޭ ވަނީ އެދިވަޑައިގެންފައެޗެ.