އަންނަ އަހަރުގެ ޖުމްހޫރީ ދުވަހަށް ވިޔަފާރި ބަނދަރު ތިލަފުއްޓަށް ބަދަލުކުރާނެ

އަންނަ އަހަރުގެ ޖުމްހޫރީ ދުވަހުގެ ނިޔަލަށް ވިޔަފާރި ބަނދަރު ތިލަފުއްޓަށް ބަދަލުކުރާނެ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވިދާޅުވެެއްޖެ އެވެ.

ރިޔާސީ ބަޔާން އިއްވަވަމުން ރައީސުލްޖުމްހޫރިއްޔާ ވިދާޅުވީ މާލެ ވިޔަފާރި ބަނދަރު ތިލަފުއްޓަށް ބަދަލުކުރުމުގެ މަަސައްކަތް ކުރަމުންދާ ކަމަށެވެ. އެ މަސައްކަތުގެ އަދާހަަމަ އެމަނިކުފާނު ވަނީ ހިއްސާ ކުރައްވާފަ އެވެ.

އެގޮތުން މި މަސައްކަތުގެ ފުރަތަމަ ފިޔަވަހީގެ އެންމެ މުހިންމު މަސައްކަތް ކަމަށްވާ 125 މީޓަރުގެ އިންޓަނޭޝަނަލް ކީވޯލްގެ މަސައްކަތް އެމްޕީއެލް އިން މިއަދު ބަޔަކާ ހަވާލުކުރާނެ ކަމުގައި ރައީސް ވިދާޅުވި އެވެ. އަދި ވިދާޅުވީ ޑޮމޮސްޓިކް ޕޯޓް ބަދަަލުކުރަން ބޭނުންވާ ދެ ކިލޯ މީޓަރުގެ ކީވޯލާއި ޕޭވޯލާއި އިމާރާތްކުރުމުގެ މަސައްކަތްތަކާއި މެޝިނަރީސް ހޯދުމުގެ މަސައްކަތް މި އަހަރުގެ މެދުތެރޭގައި ކުރެވޭނެ ކަމުގައި ވިދާޅުވި އެވެ.

"މި ހުރިހާ މަސައްކަތެއް ނިންމާ, އިރާދަކުރެެއްވިއްޔާ 11 ނޮވެންބަރު 2027 ވަނަ ދުވަހު މާލޭގެ ވިޔަފާރި ބަނދަރު ތިލަފުއްޓަށް ބަދަލު ކުރާނަން," ރައީސް ވިދާޅުވި އެވެ.

ރައީސް ވިދާޅުވި ގޮތުގައި ވިޔަފާރި ބަނދަރު ތިލަފުއްޓަށް ބަދަލުކުރުމުން ބޮޑު ފަސޭހައަކާއި ފައިދާތަކެއް ރައްޔިތުންނަށް ވާނެ އެވެ. އެގޮތުން މި ބަދަލާއެކު ހަތް ދުވަހުން ހުސްކުރެވޭ ބޯޓް 24 ގަޑިއިރުގެ ތެރޭގައި ހުސްކޮށް ނިންމާލެވޭނެ ކަމުގައި ވިދާޅުވި އެވެ.

އެކަން އެހެން ވުމުން މުދަލުގެ އަގު ހެޔޮވާނެ ކަމަށް ވިދާޅުވި އެވެ.

އެމަނިކުފާނު އިތުރަށް ވިދާޅުވި ގޮތުގައި މާލޭގައި މިހާރު ހިންގާ ހޯލްސޭލް ވިޔަފާރި އެކީގައި ތިލަފުއްޓަށް ބަދަލު ކުރެވޭނެ އެވެ. އަދި މުދާ އުފުލާ ބޯޓްތަކަށް ތިލަފުށީ ބަނދަރުން ހިދުމަތް ހޯދަން ފަސޭހަވެ އަތޮޅުތަކަށް މުދާ ގެންދިއުމަށް ފަސޭހަވާނެ ކަމުގައި ވިދާޅުވި އެވެ.

އެ ބަދަލާއެކު މާލޭގެ އެންމެ ކާރުބާރު ބޮޑު ސަރަހައްދު, ދުއްވާ މީހުންނާއި ހިނގާ ބިނގާވެ އުޅޭ މީހުންނަށް ފަސޭހަ ސަރަހައްދަކަށް ވާނެ ކަަމަށް ރައީސް ވިދާޅުވި އެވެ.