އިޒްރާއީލުން ހިންގަނީ ނިރުބަވެރި އަމަލުތަކެއް. ޖަވާބުދާރީ ކުރުވަންޖެހޭ: ރައީސް މުއިއްޒު

ފަލަސްތީނު ރައްޔިތުންނާ ދެކޮޅަށް އިޒްރާއީލުން ހިންގަމުންގެންދަނީ، ނިރުބަވެރި އަމަލުތަކެއް ކަމަށާއި، ބައިނަލްއަޤްވާމީ މުޖުތަމައުއިން އިޒްރާއީލް ޖަވާބުދާރީ ކުރުވަން ޖެހޭކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

އެމެރިކާގެ ނިއުޔޯކުގައި ކުރިއަށްދާ އދ.ގެ ޢާންމު މަޖިލީހުގެ 79 ވަނަ އާއްމު މަޖިލީހުގައި މިރޭ ތަގުރީރު ކުރައްވަމުން ރައީސް ޑރ.މުއިއްޒު ވަނީ، އިޒްރާއީލުން ފަލަސްތީނުގެ ރައްޔިތުންނަށް އަމާޒުކޮށް ހިންގަމުންގެންދާ ހަނގުރާމައިގެ ޖަރީމާތަކަށް ވަރަށް ފާޅުކަން ބޮޑުގޮތެއްގައި ފާޑުވިދާޅުވެ ވާހަކަފުޅު ދައްކަވާފައެވެ.

ރައީސް ވިދާޅުވީ އިޒްރާއީލުން ފަލަސްތީނުގެ ސްކޫލްތަކާއި، ހޮސްޕިޓަލްތަކާއި އަދި އިންސާނީ އެހީދޭ ވަސީލަތްތަކަށް ހަމަލާދިނުމާއި އަދި ކުށެއްނެތް ފަލަސްތީނުގެ އަންހެނުންނާއި، ފިރިހެނުންގެ އިތުރުން ކުޑަކުދިންނަށް އަމާޒުކޮށް ހިންގަމުންދާ ނިރުބަވެރި އެ އަމަލުތަކަށް އިޒްރާއީލް ޖަވާބުދާރީ ކުރުވަން ޖެހޭކަމަށެވެ.

މީގެ އިތުރުން އިޒްރާއީލް ސިފައިންދަނީ ނޫސްވެރިންނަށާއި، އިންސާނީ އެހީދޭ ފަރާތްތަކަށްވެސް އަމާޒުކޮށް ހަމަލާތައްދެމުންކަންވެސް ރައީސް ފާހަގަކުރެއްވިއެވެ. މީގެ ތެރޭގައި ފަލަސްތީނުގެ އިތުރުން ލުބްނާން އަދި އަލްޖަޒީރާގެ ނޫސްވެރިންނަށް އަމާޒުކޮށް ހަމަލާތައް ދެމުން އަންނަކަމަށް ރައީސް ވިދާޅުވިއެވެ. މިއިން އަންގައިދެނީ އިޒްރާއީލުން ހިންގަމުން ގެންދާ ޖަރީމާތައް ބައިނަލްއަޤްވާމީ ފަރާތްތަކަށް ފެންނަމުންދާދިއުން ހުއްޓުވުންކަމަށް ރައީސް ވިދާޅުވިއެވެ. އިޒްރާއީލްގެ މި އަމަލުތަކުން ނެގޭނެ އިތުރު މާނައެއް ނެތްކަމަށްވެސް ރައީސް ވިދާޅުވިއެވެ.

ރައީސް ވިދާޅުވީ މި ހުންނަނީ ބައިނަލްއަޤްވާމީ ޤާނޫނުތަކާއި އެކުވެރިދައުލަތްތަކުގެ ޗާޓަރާ ހިލާފްވުމުން އިޒްރާއީލް ޖަވާބުދާރީ ކުރުވަން ޖެހޭކަމަށާއި، 1967 ވަނަ އަހަރު އދ އެކުލަވާލާފައިވާ ފަލަސްތީނުގެ މިނިވަން ދައުލަތް ބަލައިގަންނަން ޖެހޭކަމަށެވެ. މިމޭރުމުން ވާހަކަދައްކަވަމުން ރައީސް ޑރ.މުއިއްޒު ވަނީ އދ އިން ފަލަސްތީނު ފުރިހަމަ މިނިވަން ދައުލަތެއްގެ ގޮތުގައި ބަލައިގަންނަން ޖެހޭކަމަށް ގޮވާލައްވާފައެވެ.