އަހަރުގެ މިހާތަނަށް ހިމަބިހީގެ 22 ކޭސް؛ ގިނައީ ދިވެހިން

މި އަހަރުގެ މިހާތަނަށް މާލެ ސަރަހައްދުން ހިމަބިހީގެ ޖުމްލަ 22 ކޭސް ރިޕޯޓުކުރެވިފައިވާއިރު ބައްޔަށް ޕޮޒިޓިވްވި މީހުންގެ ތެރެއިން އެންމެ ގިނައީ ދިވެހިން ކަމަށް އެޗްޕީއޭއިން ހާމަކޮށްފައިވެއެވެ.

އެޗްޕީއޭއިން ބުނެފައިވާ ގޮތުގައި ވޭތުވެދިޔަ ހަފުތާގައި ހިމަބިހީގެ އިތުރު 2 ކޭސް މާލެ ސަރަހައްދުން ފެނިފައިވެއެވެ. ބައްޔަށް ޕޮޒިޓިވްވި މީހުންގެ ތެރެއިން ގިނައީ 18 އަހަރުން މަތީގެ މީހުންނެވެ. ޖުމްލަ 543 ކޮންޓެކްޓުން ފާހަގަކުރެވިފައިވާއިރު އެކްޓިވް 173 ކޮންޓެކްޓުން މޮނިޓާ ކުރެވެމުންދާ ކަމަށް އެ އެޖެންސީން ބުނެފައިވެއެވެ.

ބަލި ފެތުރުން ކޮންޓްރޯލުކުރުމަށް ޚާއްޞަ ވެކްސިން ދިނުމުގެ ޕްރޮގްރާމެއް މިއަދު އާންމުންނަށް ހުޅުވާލައިގެން ފަށާފައިވާ ކަމަށް އެޗްޕީއޭއިން ބުނެފައިވެއެވެ. ފުރަތަމަ ޓާގެޓް ގްރޫޕެއްގެ ގޮތުގައި ޞިއްޙީ ޚިދުމަތްދޭ ފަރާތްތަކާއި 18 އަހަރުން ދަށުގެ ކުދިންގެ ތެރެއިން ވެކްސިން ޑޯޒް ފުރިހަމަ ނުކުރާ ކުދިންނަށް ވެކްސިން ދެވެމުންދާ ކަމަށާއި ދެވަނަ ޓާގެޓް ގްރޫޕެއްގެ ގޮތުގައި 30 އަހަރުން ދަށުގެ ފަރާތްތަކަށް ޖޫން 30 ވަނަ ދުވަހުން ފެށިގެން ވެކްސިން ދޭން ތައްޔާރުވަމުންދާ ކަމަށް ބުނެފައިވެއެވެ.

މީގެ އިތުރުން 49 އަހަރުން ދަށުގެ ވެކްސިން ފުރިހަމަ ނުކުރާ ފަރާތްތަކަށް ތިންވަނަ މަރުހަލާއެއް ކުރިއަށް ގެންދިއުމަށް ވެސް ތައްޔާރުވަމުންދާ ކަމަށް އެޗްޕީއޭއިން ބުނެފައިވެއެވެ.

މިހާތަނަށް 220 ކޮންޓެކްޓުންނަށާއި ފުރަންޓްލައިންގައި މަސައްކަތްކުރާ 1537 ޞިއްޙީ ޚިދުމަތްތެރިންނަށް ވެކްސިން ދީފައިވާ ކަމަށް އެޗްޕީއޭއިން ހާމަކޮށްފައިވެއެވެ.

އަދި ޞިއްޙީ ޚިދުމަތްތެރިންނަށް ތަމްރީނު ސެޝަންތައް ކުރިއަށް ގެންގޮސް ސަވައިލެންސްގެ މަސައްކަތް ހަރުދަނާ ކުރުމާއި މީސް މީޑިއާ ޓީވީ އަދި ރޭޑިއޯ މެދުވެރިކޮށް އާންމުން ހޭލުންތެރިކުރުމުގެ މަސައްކަތް ކުރެވެމުންދާ ކަމަށް ވެސް ބުނެފައިވެއެވެ.