ޣައްޒާގައި ޝަހީދުވި މީހުންގެ ޢަދަދު 41،200 އަށްވުރެ މައްޗަށް އަރައިފި
ޣައްޒާގައި ޝަހީދުވި މީހުންގެ ޢަދަދު 41،200 އަށްވުރެ މައްޗަށް އަރައިފިއެވެ.
ޣައްޒާގެ ސިއްޙީ ވުޒާރާއިން ހޯމަ ދުވަހު ހާމަކުރި ގޮތުގައި، އިސްރާއީލުގެ ހަމަލާތަކުގައި ފަލަސްތީނުގެ އިތުރު 20 ރައްޔިތުން ޝަހީދުވުމާއެކު، ފާއިތުވި އޮކްޓޯބަރު 7 އިން ފެށިގެން މިހާތަނަށް ޝަހީދުވި މީހުންގެ އަދަދު 41،226 އަށް އަރައިފައިވެއެވެ.
ސިއްޙީ ވުޒާރާގެ ބަޔާނުގައި ވާގޮތުން، މި ހަމަލާތަކުގައި 95،413 މީހުން ޒަޚަމުވެފައިވެއެވެ. އަދި ފާއިތުވި 24 ގަޑިއިރުގެ ތެރޭގައި ޢާއިލާތަކަށް އަމާޒުކޮށް ދިން ތިން "ގަތުލުއާންމު" ތަކުގައި 20 މީހުން މަރުވެ، 76 މީހުން ޒަޚަމުވެފައިވާ ކަމަށް ބަޔާނުގައި ބުނެފައިވެއެވެ.
އދ. ގެ ސަލާމަތީ މަޖިލީހުން ވަގުތުން ހަނގުރާމަ ހުއްޓާލުމަށް ގޮވާލާފައިވީ ނަމަވެސް، އިސްރާއީލުން ވަނީ ފާއިތުވި އޮކްޓޯބަރު 7 ގައި ހަމާސްއިން ދިން ހަމަލާއަށްފަހު ޣައްޒާއަށް ދެމުންދާ އަނިޔާވެރި ހަމަލާތައް ކުރިއަށް ގެންގޮސްފައެވެ. މި ހަމަލާތަކާ ގުޅިގެން، ކާބޯތަކެއްޗާއި، ސާފު ފެނާއި، ބޭސްފަރުވާގެ ދަތިކަން ކުރިމަތިވެފައިވާ ޣައްޒާގެ ގާތްގަނޑަކަށް މުޅި އާބާދީ ހިޖުރަކުރަން މަޖުބޫރުވެފައިވެއެވެ.
ޣައްޒާގައި އިސްރާއީލުން ހިންގަމުންދާ ޢަމަލުތަކާ ގުޅިގެން، ބައިނަލްއަޤްވާމީ ޢަދުލު ކޯޓުގައި އިސްރާއީލާ ދެކޮޅަށް ނަސްލު ފޮހެލުމުގެ ދަޢުވާ އުފުލިފައިވެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
