ޣައްޒާގެ ޤަތުލުޢާންމާ ދެކޮޅަށް އަޑުއުފުލުމަށް އަޔަލެންޑްގެ ކީޕަރު ސްކޮޑުން ވަކިވިއިރު، ޓީމުން އިސްރާއީލާ ދެކޮޅަށް ނުކުތީ ކަޅު ބޭންޑުގައި

ހަންގޭރީގެ ނަގްޔެރްދޭ ސްޓޭޑިއަމްގައި އިއްޔެ ކުޅުނު ޔުއެފާ ނޭޝަންސް ލީގުގެ މެޗުގައި، އިސްރާއީލުން ޣައްޒާގައި ހިންގަމުންދާ ލާއިންސާނީ ޤަތުލުޢާންމާ ދެކޮޅަށް އަޔަލެންޑްގެ ޤައުމީ ފުޓްބޯޅަ ޓީމުން ހިމޭން އިހުތިޖާޖެއް ކޮށްފިއެވެ.

މި މެޗު ފެށުމުގެ ކުރިން އާންމުކޮށް ބާއްވާ ރަސްމިއްޔާތުގެ ބައެއް ކަންކަމުގައި އަޔަލެންޑްގެ ކުޅުންތެރިން ބައިވެރިއެއް ނުވެއެވެ. އެގޮތުން، ދެ ޓީމުގެ ކެޕްޓަނުންގެ މެދުގައި ބަދަލުކުރާ ޕެނަންޓް (ރަމްޒީ ދިދަ) ބަދަލުކުރުމަށް އަޔަލެންޑްގެ ކެޕްޓަން ދާރާ އޯޝޭ ވަނީ ދެކޮޅު ހަދާފައެވެ.

މީގެއިތުރުން، ފަލަސްޠީނުގެ ޣައްޒާގައި ޝަހީދުވަމުންދާ ކުށެއްނެތް ރައްޔިތުންގެ ހަނދާނުގައި އަޔަލެންޑްގެ ކުޅުންތެރިން މެޗު ކުޅެފައިވަނީ ކަޅުކުލައިގެ ބޭންޑް އަޅައިގެންނެވެ.

މި މެޗު 3-0 ކާމިޔާބު ކުރީ އަޔަލޭންޑްގެ ޓީމުންނެވެ.

މި މެޗު ކުޅުމާ ދެކޮޅަށް އިހުތިޖާޖުކުރުމުގެ ގޮތުން އަޔަލެންޑް ޓީމުގެ އެއްވަނަ ގޯލްކީޕަރު ގެވިން ބަޒޫނޫ ވަނީ ސްކޮޑުން ވަކިވެ، މެޗު ނުކުޅެން ނިންމާފައެވެ. ސޯޝަލް މީޑިއާގައި އޭނާ ހާމަކުރި ގޮތުގައި، ކުށެއްނެތް އާންމު ރައްޔިތުން ޤަތުލުކުރުމާ އޭނާ ދެކޮޅު ކަމަށާއި، އަމިއްލަ ޟަމީރު ޤަބޫލުނުކުރާތީ އިސްރާއީލާ ދެކޮޅަށް ކުޅެން ބޭނުންނުވީ ކަމަށެވެ.

ފުޓްބޯލް އެސޯސިއޭޝަން އޮފް އަޔަލެންޑް (އެފްއޭއައި) ގެ ސީއީއޯ ޑޭވިޑް ކޯރެލް ވިދާޅުވީ، ޣައްޒާގައި ހިނގަމުންދާ ޤަތުލްއާއްމުގައި ގެއްލިގެންދާ ފުރާނަތަކުގެ ހައްޤުގައި އަޑުއުފުލުމަކީ މުހިންމު ކަމެއް ކަމަށެވެ. އަދި މި މެޗުންނާއި ކުރިއަށް އޮތް މެޗުތަކުން ކުޅުންތެރިންނަށް ލިބޭ އެލަވަންސްތަކުން ޚާއްޞަ ޗެރިޓީ އެހީއެއް ފޯރުކޮށްދިނުމަށް ކުޅުންތެރިން ނިންމާފައިވާ ކަމަށްވެސް އޭނާ ވިދާޅުވިއެވެ.

އަޔަލެންޑް ސަރުކާރުގެ ތަރުޖަމާނަކު ވިދާޅުވީ، އިސްރާއީލުން ހިންގާ ޖަރީމާތަކާ ގުޅިގެން ބައިނަލްއަޤްވާމީ ފުޓްބޯޅަ މުބާރާތްތަކުން އެ ޖަމާއަތް ބޭރުކުރުމަށް އަޔަލެންޑުން ޔުއެފާގައި އެދިފައިވާނެ ކަމަށެވެ. ނަމަވެސް އެ ނިންމުން ފާސްނުވުމުން، މެޗު ކުޅެން މަޖުބޫރުވީ ކަމަށެވެ.