ފަލަސްތީނުގެ 17 އަހަރުން ދަށުގެ ގައުމީޓީމް ރާއްޖޭގައި ކޭމްޕް ކުރަނީ

ފަލަސްތީނުގެ 17 އަހަރުން ދަށުގެ ގައުމީ ފުޓްބޯޅަ ޓީމު ތަމްރީނު ކޭމްޕެއް ފުރިހަމަކުރުމަށް މި މަހުގެ 27 ވަނަ ދުވަހު ރާއްޖެ އައުމަށް ހަމަޖެހިއްޖެއެވެ.

ފަލަސްތީނުގެ ޒުވާންޓީމް ރާއްޖޭގައި ކޭމްޕްކުރަން ކުރާ މި ދަތުރަކީ ކުރިއަށްއޮތް އޭއެފްސީ 17 އަހަރުން ދަށުގެ އޭޝިއަން ކަޕް ކޮލިފިކޭޝަނަށް ތައްޔާރުވުމުގެ ގޮތުންނެވެ.

މި ތަމްރީނު ކޭމްޕްގައި ފަލަސްތީނު ޓީމު ގާއިމުވެ ތިބުމަށް ހަމަޖެހިފައިވަނީ ކ. ގުރައިދޫގައެވެ. މި ދަތުރުގެ ތެރެއިން ރާއްޖޭގެ 17 އަހަރުން ދަށުގެ ގައުމީ ޓީމާ ދެކޮޅަށް އެކުވެރިކަމުގެ ދެ މެޗެއް ކުޅުމަށް ވަނީ ރޭވިފައެވެ. މި މެޗުތައް އޮންނާނީ މި މަހުގެ 30 ވަނަ ދުވަހާއި، އަންނަ ނޮވެމްބަރު މަހުގެ 2 ވަނަ ދުވަހު މާލޭގެ ގައުމީ ފުޓްބޯޅަ ދަނޑުގައެވެ.

މި ތަމްރީނު ކޭމްޕަކީ އޭޝިއަން ކަޕް ކޮލިފިކޭޝަނަށް ދެ ގައުމުގެ ޓީމުތައް ތައްޔާރުވުމަށް ލިބޭ މުހިންމު ފުރުސަތެކެވެ. މީގެ އިތުރުން، މިއީ ފަލަސްތީނާއި ދިވެހިރާއްޖެއާ ދެމެދު އޮންނަ ޒަމާންވީ އަޚުވަންތަ ގުޅުން އިތުރަށް ބަދަހިވެ، ކުޅިވަރުގެ ދާއިރާއިން ދެ ގައުމުގެ އެއްބާރުލުން އިތުރުވެގެންދާނެ ކަމެކެވެ.

ފަލަސްތީނުގެ ޒުވާންޓީމް މިދިޔަ އަހަރުގެ ނޮވެމްބަރުމަހުވެސް ރާއްޖެއަށް ވަނީ ޒިޔާރަތްކޮށްފައެވެ. އެފަހަރު ޤައުމީޓީމާއެކު ކުޅުނު އެކުވެރިކަމުގެ މެޗް ފަލަސްތީނުން ކާމިޔާބުކުރީ 6-0 ގެ ނަތީޖާއިންނެވެ.