މީހުންގެ ޒާތީކަންކަން އެކުލެވޭތީ، ޕީޖީ ޝަމީމް ހާޒިރުކުރި ކޮމިޓީ ބައްދަލުވުން ސިއްރުކޮށްފި

މީހުންގެ ޒާތީކަންކަން އެކުލެވޭތީ، ޕްރޮސިކިއުޓާ ޖެނެރަލް ހުސައިން ޝަމީމް މަގާމުން ވަކިކުރަން ހުށަހަޅާފައިވާ މައްސަލާގައި އޭނާ މިއަދު ހާޒިރުކުރި ޖުޑިޝަރީ ކޮމިޓީގެ ބައްދަލުވުން ސިއްރުކޮށްފި އެވެ.

ޕީޖީ ޝަމީމް މަގާމުން ވަކިކުރަން މަޖިލީހަށް ހުށަހެޅުމަށް ސަރުކާރު ހިންގާ ޕީއެންސީގެ ޕާލިމަންޓްރީ ގްރޫޕުގެ ޑެޕިއުޓީ ލީޑަރު އަދި ހުޅުދޫ ދާއިރާގެ މެންބަރު މުހައްމަދު ޝާހިދު ހުށަހެޅުއްވިއިރު، ޖަވާބުދާރީވުމަށް މިއަދު 10:30 އަށް ޝަމީމް ޖުޑިޝަރީ ކޮމިޓީ އަށް ހާޒިރު ކުރުމަށް ތާވަލްކުރިއެވެ.

ކޮމިޓީގެ މި ޖަލްސާ ސިއްރު ނުކޮށް، ޢާންމުންނަށް ހުޅުވާލައިގެން ބާއްވަވައި ދެއްވުމަށް ޕީޖީ ޝަމީމް އެދިވަޑައިގަންނަވާކަމަށް ޕީޖީ އޮފީހުން ބުނި ނަމަވެސް ކޮމިޓީގެ ބައްދަލުވުން ފަށަމުން ތުލުސްދޫ ދާއިރާގެ މެންބަރު އިބްރާހިމް ނަސީމް ވަނީ ޕީޖީ ޝަމީމަށް ކުރެވޭ ތުހުމަތުތަކުގައި އެހެން ބައެއް މީހުންގެ ޒާތީ ކަންކަން ހިމެނޭތީ، ޕީޖީއަށް އިހުތިރާމުކުރުމުގެ ގޮތުން ކޮމިޓީ ސިއްރުކޮށްދޭން ހުށަހަޅުއްވައިފައެވެ.

"އަޅުގަނޑުމެން އެބަ ޖެހޭ އިހްތިރާމް ކުރަން އަދި މިނިވަން މުއައްސަސާތަކުގައި ތިއްބަވާ ބޭފުޅުން އެދިވަޑައިގަންނަވާ ގޮތަށް ފުރިހަމަ އަށް އިހްތިރާމް ކޮށްގެން އަޅުގަނޑުގެ ނަޒަރުގައި ކޮމިޓީ ސިއްރު ކުރުމަކީ އެންމެ ރަނގަޅު ގޮތް،"

ނަސީމް ވިދާޅުވިއެވެ.

މި ހުށަހެޅުއްވުމަށް ފޭދޫ އުތުރު ދާއިރާގެ މެންބަރު އިސްމާއިލް ނިޒާރު ވެސް ތާއީދު ކުރެއްވިއިރު، ކޮމިޓީ ސިއްރުކުރަން އެދި ހުށަހެޅި ހުށަހެޅުމަށް ވޯޓަށް އެހުމަށް ފަހު ކޮމިޓީ ސިއްރުކުރަން ވަނީ ނިންމައިފައެވެ.

ޕީޖީ ޝަމީމް މަގާމުން ވަކިކުރަން ޖެހޭކަމަށް ވިދާޅުވެ ޝާހިދު ހުށަހެޅުއްވި ސިޓީގައި މައިގަނޑު އަށް ކަމެއް ވަނީ ފާހަގަކުރައްވައިފައެވެ. އެއީ:

1) ރޭޕުގެ ތުހުމަތުކުރެވުނު ކުރީގެ ޓޫރިޒަމް މިނިސްޓަރު އަލީ ވަހީދުގެ މައްސަލަ ފައިލްކުރުން

2) ކުރީގެ ޔޫތު މިނިސްޓަރު އަހުމަދު މަހުލޫފުގެ މައްސަލަ ފައިލްކުރުން

3) ސަފާރީ ރޭޕް ކޭސް މައްސަލައިގައި ދަށު ކޯޓުން ނިންމި ނިންމުން އިސްތިއުނާފު ނުކުރަން ނިންމުން

4) މިލަންދޫ ދާއިރާގެ ކުރީގެ މެންބަރު އަލީ ރިޒާގެ މައްޗަށް ކްރިމިނަލް ކޯޓަށް ހުށަހެޅި ހިއުމަން ޓްރެފިކިން ދައުވާ އަނބުރާ ގެނައުން

5) ބަނގުރާ ބުއިމުގެ 77 މައްސަލައެއް އަނބުރާ ގެނައުން

6) އެއްޖިންސުން ގުޅުން ހިންގުމުގެ 13 މައްސަލައެއް އަނބުރާ ގެނައުން

7) ޕީޖީ އޮފީހުގެ ޕްރޮސިކިއުޓަރު އަދި ތަރުޖަމާނު އަހުމަދު ޝަފީއުއަށް ކުރެވޭ އެއް ޖިންސުން ގުޅުން ހިންގުމާއި، މަސްތުވާތަކެތި ބޭނުންކުރުމާއި، ރަސޫލާއަށް ފުރައްސާރަ ކުރުމުގެ ތުހުމަތުތަކުގެ މައްސަލަ ބަލަން ދެކޮޅު ހެދުން

8) ވެންޓިލޭޓަރު މައްސަލައިގައި ދައުވާ ނުކުރަން ނިންމުން

މިދިޔަ މަހުގެ އެއްވަނަ ދުވަހު ވެސް އާންމުންގެ ބައެއް މީހުން ވަނީ ޕީޖީ ޝަމީމު މަގާމުން ވަކިކުރަން ގޮވާލައި މަޖިލީހުގެ އިދާރާ ކައިރީ މުޒާހަރާކޮށްފައިވާކަން ފާހަގަކޮށްލަން ޖެހެއެވެ.