ރ. އަތޮޅު ދެކުނު ބިތުގައި އެއާޕޯޓު ހަދާނެ ރަށެއް އަދި ނުނިންމޭ: އަސްލަމް
ރ. އަތޮޅު ދެކުނު ބިމުގައި އިތުރު އެއާޕޯޓެއް އެޅުމުގެ ވާހަކަ ސަރުކާރުން ދެކެވެމުން އައި ނަމަވެސް އެއާޕޯޓް ތަރައްގީ ކުރާނެ ރަށެއް އަދި ކަނޑައެޅިފައިނުވާ ކަމަށް ޕްލޭނިންގ މިނިސްޓަރ މުހައްމަދު އަސްލަމް ވިދާޅުވެއްޖެއެވެ.
މިނިސްޓަރ އަސްލަމް މިހެން ވިދާޅުވެފައިވަނީ މިއަދު ރައްޔިތުން މަޖިލީހުގެ ބައްދަލުވުމުގައި، އެމްޑީޕީ ސަރުކާރުން ރ. އަތޮޅު ދެކުނު ބިތުގައި އަޅާނެ ކަމަށް ވިދާޅުވެފައިވާ އެއާޕޯޓްގެ މަސައްކަތް ކުރިއަށްދާ ގޮތާއިމެދު މަޑުއްވަރީ ދާއިރާގެ މެންބަރު އާދަމް ޝަރީފް ކުރެއްވި ސުވާލަށް ޖަވާބު ދެއްވަމުންނެވެ.
އެގޮތުން މިނިސްޓަރ ވިދާޅުވެފައިވަނީ ރ. އަތޮޅުގައި އިތުރު އެއާޕޯޓެއް އެޅުމުގެ ވާހަކަ ސަރުކާރުން އާންމުކޮށް އިއުލާނުކޮށްފައިވާ ކަމަށާއި ފަހަކަށް އައިސް އެވާހަކަ ތަންކޮޅެއް ގިނައިން ދެކެވިފައިވާ ކަމަށެވެ.
އަދި ވޭތުވެދިޔަ ސަރުކާރުން ފައިނުގައި އެއަޕޯޓް އަޅަންވެގެން ކޮންމެސް ވަރަކަށް މަސައްކަތް ކުރި ނަމަވެސް އެކަން ކުރިއަށް ގޮސްފައިނުވާ ކަމަށެވެ.
"ދެން ދެކެވޭ އޮޕްޝަންތަކުގެ ތެރޭގައި ދެތަނެއްގެ ވާހަކަ ދެކެވުނު. އޭގެ ތެރެއިން އެއް ތަނަކީ ބެރިއަންފަރު. ބެރިއަންފަރުގަ އެއަޕޯޓެއް އެޅުމަށް އަޅާނީ ކިހިނެއްތޯ؟" އަސްލަމް ވިދާޅުވިއެވެ.
މީގެ އިތުރުން މީގެ މަހެއްހާ ދުވަސް ކުރިން ސަރުކާރުން ރ. އަތޮޅުގެ ބައެއް ރަށްރަށުގެ އަތޮޅު ކައުންސިލްގެ ބޭފުޅުންނާއިއެކު އެއާޕޯޓް އަޅާނެ ތަނަކާއިމެދު މަޝްވަރާ ކުރެވުނު ކަމަށް މިނިސްޓަރ އަސްލަމް ވިދާޅުވިއެވެ.
"އާންމު ގޮތެއްގައި އަޅުގަނޑު މިހާރު ގަބޫލްކުރާ ގޮތުގައި އެއާޕޯޓެއް އަޅަން އަތޮޅުގެ ތަރައްގީއަށް ވިސްނާފި ކަމަށް ވެއްޖިއްޔާ އެންމެ ރަނގަޅީ މީހުން ދިރިއުޅޭ ރަށަކާ ގުޅިގެން އެޅެންޏާ އެޅުމޭ އަސްލު. އެހެންނަމަވެސް އެއީ އެކަން ކުރެވެން ހުންނާނެ ތަންތަނުގައި." އަސްލަމް ވިދާޅުވިއެވެ.
މިގޮތަށް ރަށެއްގައި އެއާޕޯޓް އެޅުމަކީ އެރަށެއްގެ ރައްޔިތުންނަށް އެކަމުގެ އިގްތިޞާދީ ފައިދާތައް ވާނެ ކަމަށް މިނިސްޓަރ ވަނީ ފާހަގަކުރަައްވާފައެވެ.
މިއާއިއެކު މިނިސްޓަރ ވިދާޅުވީ ބަނދަރު އަޅަންނުޖެހުމާއި، ފެނާއި ކަރަންޓާއި ނަރުދަމާގެ ނިޒާމްގެ އިތުރުން އެކޮމޮޑޭޝަން ވަކިން އަޅަން ނުޖެހުމަކީ މަސައްކަތުގެ އަގުވެސް ކުޑަ ވެގެން ދާނެ ކަމެއް ކަމަށެވެ.
"އެހެންވީމަ ވަކިން އެއާޕޯޓްއެއް ހެދީމަ ފަޅު ރަށެއްގަ އުޅޭހެން އުޅެންޖެހޭނީ. އެހެންނަމަވެސް ފަހަރެއްގަ ރ. އަތޮޅުގަ އެ އޮޕްޝަން ނޯވެދާނެ. އަޅުގަނޑަށް މިހާ ތަނަށް ބެލި ބެލުމުން އެނުއެއް ފެނޭ. ސީދާ މިވެނި ތަނެއް ކަމުގައި ކަނޑައަޅާ ނިންމާފަކާއެއް ނެތް." އަސްލަމް ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
