ސަރުކާރަށް ތާއީދުކުރާ އެމްއާރްއެމްގެ 11 މެންބަރަކު އިސްތިއުފާ ދެއްވައިފި

އެމްއާރްއެމްގެ އެކްސްކޯ މެންބަރުންނާއި، އެ ޕާޓީގެ ނާއިބު ރައީސް އަދި ތަރުޖަމާނު ހިމެނޭހެން، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް ތާއީދު ކުރައްވާ އެޕާޓީގެ 11 މެންބަރަކު ޕާޓީން އިސްތިއުފާ ދެއްވައިފިއެވެ.

އެމްއާރްއެމްގެ މެންބަރުންގެ ތެރެއިން ސަރުކާރަށް ތާއީދުކޮށް ޕާޓީން ވަކިވިކަން އިޢުލާން ކޮށްފައިވަނީ؛

ޝަޒައިލް ޝިޔާމު-- ޕާޓީގެ ނައިބު ރައީސް

ތަޒްމީލް އަބްދުއްސަމަދު-- މެމްބަރު

މުހައްމަދު ރާއިދު-- އެކްސްކޯ މެމްބަރު

މުހައްމަދު ނަދީމް-- އެކްސްކޯ މެމްބަރު

އަފްރާތު އިބްރާހިމް-- އެކްސްކޯ މެމްބަރު

އިބްރާހިމް ފަރުހާދު-- ޒުވާނުންގެ ކައުންސިލް ރައީސް

އަހުމަދު ސަފްޥާނު-- އެކްސްކޯ މެމްބަރު

އަބްދުލް ހަމީދު އަހުމަދު-- މެމްބަރު

މުހައްމަދު ފައިސަލް-- މެމްބަރު

އިސްމާއިލް ނާއިލް ނަޝީދު-- ތަރުޖަމާނު

އަލީ ފަޞީލް-- އެކްސްކޯ މެމްބަރު

އެ މެންބަރުން އިސްތިއުފާ ދެއްވައި ނެރުއްްވި ބަޔާން "ވޮއިސް" އަށް ލިބިފައިވާއިރު, އެ ބަޔާނުގައި އިސްތިއުފާ ދެއްވާ ސަބަބެއް ކަމުގައި ހާމަކޮށްފައިވަނީ، ޕާޓީ އުފެއްދެވި ރައީސް މައުމޫނު ގެންގުޅުއްވި، އެންމެހާ އަސާސް ތަކާއި ފަލްސަފާތަކެއް ފަނޑުވަމުން ގޮސް، ވޭތުވެދިޔަ ދުވަސް ތަކުގެ ތެރޭގައި، ވަކި ބަޔަކު ބޭނުންވާ މަޤުޞަދުތަކެއް ހާޞިލުކުރުމަށް ގެންގުޅޭ ހަތިޔާރަކަށް އެ ޕާޓީ ވެފައިވުން ކަމަށެވެ.

އަދި އެ ޕާޓީން 2023 ވަނަ އަހަރުގެ ރިޔާސީ އިންތިހާބުގައި އަމަލުކުރާނެ އުސޫލެއް އަވަހަށް ކަނޑައެޅުމަށް ޕާޓީގެ ރައީސް ފާރިސް މައުމޫނުގެ އަރިހުން އެދިލެއްވުމުން އެކަމުގައި ފާރިސް އަމަލު ކުރެއްވީ ވަރަށް ފަރުވާކުޑަ ގޮތަކަށް ކަންވެސް އެ މެންބަރުން ފާހަގަ ކުރެއްވިއެވެ.

މީގެ އިތުރުންވެސް، ސަރުކާރުގެ ކޯލިޝަންގެ ބައިވެރިއެއްގެ ގޮތުގައި އޮވެ، ޗާގޯސް މައްސަލާގައި ސަރުކާރާއި ދެކޮޅަށް ބޭއްވި ނޫސްވެރިންގެ ބައްދަލުވުމުގައި އެ ޕާޓީގެ މެންބަރުން ބައިވެރިކަން ފާހަގަކުރައްވައި އެއީ ކޮށްގެން ނުވާނެ ކަމެއް ކަމަށް އެ މެންބަރުން ދެކޭ ކަމަށްވެސް ބަޔާނުގައި ވެއެވެ.

އަދި ޕާޓީން އިސްތިއުފާ ދެއްވަން ނިންމެވީ 2023 ވަނަ އަހަރުގެ ރިޔާސީ އިންތިހާބުގައި ރައީސް އިބްރާހިމް މުހައްމަދު ޞާލިހަށް ތާއީދު ކުރައްވަން ނިންމަވާފައިވާތީ ކަމަށްވެސް ބުނެފައިވެއެވެ.