ރާއްޖޭގެ ކަނޑުގެ ސަރަހައްދުން ބައެއް ގެއްލުމުގެ ޒިންމާ ސަރުކާރުގެ އިސްވެރިން ނަގަން ޖެހޭ: އަލީ ހުސެއިން

ރާއްޖޭގެ ދެކުނުން ކަނޑުގެ ސަރަހައްދެއް ގެއްލިގެން ދިއުމުގެ ޒިންމާ މި ސަރުކާރުގެ އިސްވެރިން ނަންގަވަން ޖެހޭކަމަށް ފޯޅަވަހި މައްސަލައާއި ގުޅިގެން ގުޅިފައިވާ ފަރާތްތަކުން ބޭއްވި ޕްރެސް ކޮންފަރެންސްގައި އެ ޕާޓީ ތަމްސީލު ކުރެއްވި ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު އަލީ ހުސެއިން ވިދާޅުވެއްޖެ އެވެ.

ފޯޅަވަހި މައްސަލައިގައި ސަރުކާރުން އަމަލުކޮށްފައިވާ ގޮތާއި ގުޅިގެން ކަންބޮޑުވުން ފާޅުކުރާ ފަރާތްތަކުން ގުޅިގެން ބޭއްވި ޕްރެސް ކޮންފަރެންސްގައި ޖުމްހޫރީ ޕާޓީގެ ސްޓޭންޑް ހާމަކުރައްވާ އަލީ ހުސެއިން ވިދާޅުވީ ސަރަހައްދުގެ މައްސަލައަކީ ޖުމްހޫރީ ޕާޓީން ގައުމީ މައްސަލައެއްގެ ގޮތުގައި ޤަބޫލުކުރާ ކަމެއް ކަމަށެވެ.

ފޯލަވަހި މައްސަލައިގައި ސަރުކާރުން އަމަލުކޮށްފައިވާ ގޮތުން ރާއްޖޭގެ ރައްޔިތުންގެ ހައްޤުތަކެއް ގެއްލިގެން ގޮސްފައިވާ ކަމަށާއި، ރާއްޖޭގެ ކަނޑުގެ ސަރަހައްދުން ބައެއް ގެއްލިގެން ދިއުމުގެ ޒިންމާ މިއަދު ސަރުކާރުގެ އިސް ސަފުގައި ތިބި ފަރާތްތައް ނަގަން ޖެހޭކަމަށް ޖުމްހޫރީ ޕާޓީން ޤަބޫލުކުރާ ކަމަށެވެ.

އެގޮތުން ކޯޓުގައި ވަކާލާތު ކުރިއިރު ދިވެހިންނަށް މަންފާވާ ގޮތަށް ދިވެހި ސަރުކާރު ތަމްސީލު ކުރި ޓީމުން ވަކާލާތުވެސް ކޮށްފައި ނުވާކަން އޭނާ ފާހަގަކުރެއްވި އެވެ.

"އަޅުގަނޑުމެން ދައްކަން ޖެހޭ ވާހަކައަކީ މީ ޒަމާނުއްސުރެ މަސްވެރިކަން ކުރާ ޤައުމެއްކަން. މި ޤައުމަށް އިސްކަން ދޭން ޖެހޭނެކަން. އަޅުގަނޑުމެންނަކީ މިހާރުގެ ގޮތުން ނަމަ ތިމާވެއްޓާއި އެންމެ ރައްޓެހިކޮށް މަސްވެރިކަން ކުރާ ޤައުމުކަން، މި ޤައުމަށް އިސްކަންދޭން ޖެހޭނެކަން. ދެން ތިވާހަކަ ދައްކާ ހިސާބަކާއި، ހިސާބެއްގެ ކައިރީގައިވެސް މިނިވަން ދައުލަތެއް ނެތްކަން. މި ހުރިހާ ވާހަކައެއް އަޅުގަނޑުމެން ދައްކަން ޖެހޭނެ. މިއިން އެއްވެސް ވާހަކައެއް ނުދައްކާ މެދު ލައިނުން ބަހާ ވާހަކަ ދެއްކީމާ ޖުމްހޫރީ ޕާޓީން އަޅުގަނޑުމެން ގަބޫލުކުރަނީ ހަގީގައތުގައި މިއަދު ރާއްޖޭގައި ވެރިކަން ކުރަން ތިއްބެވި ބޭފުޅުން އެ ވަނީ ރާއްޖޭގެ ޤާނޫނު އަސާސީއާއި ބޮޑުތަނުން ޚިލާފުވެފަ. އެބޭފުޅުން އެކަމުގެ ޒިންމާ ނަގަން ޖެހޭނެ"

ކެންދޫ ދާއިރާގެ މެމްބަރު އަލީ ހުސެއިން

އަލީ ހުސެއިން އިތުރަށް ވިދާޅުވީ ސަރަހައްދާއި ގުޅުންހުރި މި މައްސަލައިގައި ރައްޔިތުންގެ ފަރާތުން ވަކާލާތު ކުރުމަށް ޖުމްހޫރީ ޕާޓީ ތައްޔާރަށް އޮތް ކަމަށެވެ.

އެގޮތުން އެ ޕާޓީގެ ސްޓޭންޑަކީ ސިޔާސީ ގޮތުން ޚިޔާލު ތަފާތުވުންތައް އޮތްކަމުގައި ވީ ނަމަވެސް، އެ ޚިޔާލު ތަފާތުވުންތައް އެއް ފަރާތްކޮށް ފޯޅަވަހި މައްސަލައިގައި ގުޅިގެން މަސައްކަތްކުރުންކަން އޭނާ ހާމަކުރެއްވި އެވެ.