ރައީސް ނަޝީދާއި އީވާ މަޖިލިސް ހިޞާރުކޮށްގެން ޑިމޮކްރެސީގެ ނަމުގައި ފަތުރަނީ ފިތުނަ: ރޮޒައިނާ
ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި ނާއިބު ރައީސް އީވާ އަބްދުالله ޑިމޮކްރެސީގެ ނަމުގައި ފަތުރަމުންދަނީ ފިތުނަ ކަމަށް މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވިދާޅުވެއްޖެއެވެ.
ބްރޯޑްކޮމްގެ މެމްބަރުންގެ މުއްދަތު ހަމަވާތީ އެ ކޮމިޝަނުން ފޮނުވާފައިވާ ސިޓީއެއްގެ ފޮޓޯ ހިއްސާ ކުރައްވައި، ރޮޒައިނާ ކުރައްވާފައިވާ ޓުވީޓެއްގައި ވިދާޅުވީ، އިލެކްޝަންސް ކޮމިޝަނުގެ މެމްބަރެއްގެ މުއްދަތު ޖުލައި މަހުގެ 24 ވަނަ ދުވަހަށް ހަމަވެފައިވާކަމަށެވެ. އަދި، ރިޔާސީ އިންތިހާބު ބޯމަތިވެފައިވާއިރު، އެ އިންތިހާބާއި ކުރިމަތިލާންޖެހެނީ އިލެކްޝަންސްގެ މެމްބަރެއް މަދުކޮށްކަންވެސް އޭނާ ފާހަގަކުރެއްވިއެވެ.
މިއާއެކު އޭނާ ވިދާޅުވީ ބްރޯޑްކޮމް އިންވެސް މެމްބަރުންގެ މުއްދަތު ހަމަވަމުންދިއުމާއިއެކު ސިޓީ ފޮނުވަމުންދާކަމަށެވެ.
ރޮޒައިނާ އިތުރަށް ވިދާޅުވީ، އެ ހުރިހާ ކަމެއްވެސް ކުރިމަތިވެފައިވަނީ 'އިތުބާރު ނެތް' މަޖިލީހުގެ ރައީސް އަދި ނައިބު ރައީސް މަޖިލީހުގެ ކޮމިޓީތައް ހުއްޓުވާފައި އޮތުމުންކަމަށެވެ.
"އިތުބާރު ނެތް މަޖިލީހުގެ ރައީސް އަދި ނާއިބު ރައީސް މަޖިލީސް ކޮމިޓީތައް ހުއްޓުވާފައި، މަޖިލިސް ހިސޯރުކޮށްގެން ތިއްބަވައިގެން ޑިމޮކްރެސީގެ ނަމުގައި ފިތުނަ ފަތުރަނީ." ރޮޒައިނާ ވިދާޅުވި އެވެ.
ރޮޒައިނާ ވިދާޅުވީ، އެ ދެ ބޭފުޅުންގެ ސަބަބުން ރައްޔިތުންގެ މަޖިލީހުން ދޭންޖެހޭ ހިދުމަތްތައް ދިނުމުގައި ގޮންޖެހުންތައް ކުރިމަތިވެފައިވާކަމަށާ، ހިދުމަތް ނުދެވި ތަންތަނުން ފޮނުވަމުންދާ ސިޓީތަކަށް ބަލަހައްޓައިގެން މެންބަރުން ތިބެންޖެހިފައިވާކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
