ވައިކަރަދޫ ސަރަހައްދުގައި ކާގޯ ފެރީގެ ނިޒާމެއް ގާއިމުކުރާނަން: ރައީސް ޞާލިހު

ހދ. ވައިކަރަދޫގެ ދަނޑުވެރިން ހައްދާ ތަކެތި ތާޒާކަމާއެކު ތަންތަނަށް ވިއްކަން ފޮނުވޭގޮތަށް ކާގޯ ފެރީގެ ހިދުމަތް ފައްޓަވާނެކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް ވިދާޅުވެއްޖެއެވެ.

ރިޔާސީ ކެމްޕޭނަށް ހދ. ވައިކަރަދޫއަށް ވަޑައިގެން ބޭއްވި ބައްދަލުވުމުގައި ވާހަކަފުޅުދައްކަވަމުން ރައީސް ޞާލިހު ވިދާޅުވީ ވައިކަރަދޫއަކީ ދަނޑުވެރިކަން ކުރާ ރަށެއް ކަމަށާއި، އެ ރަށު ރައްޔިތުން ބޭނުންވަނޫ ހައްދާ ތަކެތި ތާޒާ ކަންމަތީގައި ވިއްކޭނެ ގޮތް ހެދުން ކަމަށެވެ. އަދި އާރުޓީއެލް އިން އެންމެ އެދެވޭ ގޮތަށް އެކަން ނުވި ނަމަވެސް ކާގޯ ފެރީގެ ހިދުމަތް ފެށުމުން އެކަމަށް ހައްލެއް ލިބިގެންދާނެ ކަމަށްވެސް ވިދާޅުވި އެވެ.

"ދަނޑުވެރިކަމުން އުފައްދާ ތަކެއްޗަށް ލިބޭ ނަފާ އިތުރުކުރުމަށް އެކްސްޕޯޓް އޮރިއެންޓެޑް ވެލިއުޗެއިންއެއް ގާއިމުކޮށް ދިވެހި ދަނޑުވެރިންނަށް ދިވެހި މާރުކޭޓާއި ރިސޯޓުތަކަށާއި ބައިނަލްއަގުވާމީ މާކެޓްތަކާ ގުޅުވާލަދީ ރާއްޖެއިން އެތަކެތި ބޭރުކުރެވޭ ގޮތް އިރާދަ ކުރެއްވިއްޔާ އެކްސްޕޯޓް ކުރެވޭ ގޮތް ހަދައިދޭނަން. އެނގި ވަޑައިގަންނަވާނެ ރާއްޖޭގައި ވަރަށް ރަނގަޅަށް އުފައްދާ އެންމެން ރަނގަޅަށް ބޭނުންވާ ބައެއް ޒާތުގެ މޭވާ އެބަ ހުރި. ފަޅޮލާއި ދޮންކޭލާއި ކަރައާއި މިހިރީ އަނބާއި މި އެއްޗިއްސަކީ މިހާރު ރަނގަަޅު ނިސްބަތަކުން އުފެދިއްޖެކަމަށް ވެއްޖިއްޔާ އެކްސްޕޯޓުގައި ބޭރުގެ މާކެޓްތަކުގައި އަޅުގަނޑުމެންނަށް ވިއްކޭނެ ތަކެތި. ބޭނުންވަނީ މި ދެންނެވިގެން ދަނޑުވެރިންނަަށް މި މަސައްކަތް ކުރެވޭނެ ގޮތްތަކާއި މި ތަކެތި ވިއްކޭނެ ފަސޭހަ މާކެޓްތައް ހޯދައިދިނުން. ކުރިއަށް އޮތް ތަނުގައި އަޅުގަނޑުމެންގެ ސަރުކާރުން އެ މަސައްކަތް ކުރާނަން"

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު

ރައީސް ޞާލިހް އިތުރަށް ވިދާޅުވީ އެމަނިކުފާނުގެ މައިގަނޑު ސިޔާސަތަކީ އެއްވެސް ރަށެއް ބާކީ ނުކޮށް ފަށާފައިވާ މަސައްކަތްތަކާއެކު ކުރިއަށް ވަޑައިގަތުން ކަމަށެވެ. އިގްތިސާދީ ބޮޑު ބަދަލެއް ގެންނަ އިރުގައި އޭގެ އަމާޒަކީ ފަތުރުވެރިކަމާއި، މަސްވެރިކަމާއި ދަނޑުވެރިކަމަށް ބަދަލު ގެނައުން ކަމަށެވެ. އެގޮތުން މައިކްރޯ ސްކީމަށް ފައިނޭންސް ހޯދޭނެ ގޮތް ހަމަޖައްސައި ދެއްވާނެ ކަމަށާއި، އިންޓްރެސްޓް ރޭޓް ކުޑަ ލޯން ހަމަޖައްސައިދެއްވާނެ ކަމަށެވެ. އަދި ލޯކަލް މާރުކޭޓާއި ރިސޯޓްތަކާއި ބޭރަށް އެތަކެތި ބޭރުކުރެވޭނެ ގޮތް ހައްދަވާނެ ކަމަށެވެ. އަދި ކުރިއަށް އޮތްތަނުގައި އެކަން ސަރުކާރުން ކުރައްވާނެ ކަމަށް ރައީސް ވިދާޅުވިއެވެ.

ވައިކަރަދޫ އަށް އިތުރަށް ކޮށްދެއްވާނެ ކަމަށް ވަޢުދުވެވަޑައިގެންނެވި ކަންކަން؛

1) ބޯހިޔާވަހިކަމަށް ރޯހައުސް އަޅައިދިނުން

2) ބޮޑެތި މަގުތައް ޒަމާނީ ފެންވަރަށް ތަރައްގީކޮށް ތާރުއެޅުން.

3) ބަނދަރުގެ މައްސަލަ ހައްލު ކުރުމަށް އޮއިދެމޭގޮތަށް ބަދަލު ގެނެސް މޫދަށް އެރޭނެ ތަނެއް ގާއިމްކޮށްދިނުން.

4) ސްކޭޓް ޕާކެއް ހެދުން

5) ޖާގަ ތަނަވަސް މިސްކިތެއް އެޅުންޕ

6) ފަތުރުވެރިކަމަށް ތަރައްގީކުރާ އެނދުތަކުގެ ތެރެއިން ވައިކަރަދޫގައި ވެސް އޭގެ ބައެއް ގާއިމް ކުރުން