ޕޮލިސް ބަޔާން ނެރެ ސްޓޯރީ ނިންމާލައިފި: އިމްތިޔާޒް
18 ސެޕްޓެމްބަރު ގައި ހުޅުމާލެއިން ގެއްލުނު އަޒުހާނުގެ މައްސަލަ އާއި ގުޅިގެން ފުލުހުން ބަޔާނެއް ނެރެ ސްޓޯރީ ނިންމާލާފައިވާކަމަށް މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި) ވިދާޅުވެއްޖެއެވެ.
އިންތި މިފަދައިން ވިދާޅުވެފައިވަނީ އަޒުހާނު ހޯދުމަށް ފުލުހުން އިހުމާލުވެފައިވާކަން ފާހަގަކުރައްވާ ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު އާދަމް ޝަރީފު ހުށައެޅުއްވި ކުއްލި މައްސަލައަށް ބަހުސްކުރައްވަމުންނެވެ.
އިންތި ވިދާޅުވީ ޒުވާނާ ގެއްލުނު ހާދިސާއާއި ގުޅިގެން ފުލުހުން ބަޔާނެއް ނެރެ ސްޓޯރީ ނިންމާލާފައިވާކަމަށެވެ. އަދި އެއީ ވަރަށް ކަންބޮޑުވާކަމެއްކަމަށް އިންތި ވިދާޅުވިއެވެ.
"މުހައްމަދު އަޒުހާނު ގެއްލުނު މި މައްސަލައިގައި އަޅުގަނޑުގެ އެންމެ ބޮޑު ކަންބޮޑުވުމަކީ އިއްޔެ ފުލުހުންގެ ފަރާތުން ބަޔާނެއް ނެރުއްވާ ސްޓޯރީ ނިންމަވާލެއްވީމަ
މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ
އިންތިގެ ވާހަކައިގައި ވަނީ ފުލުހުންގެ ބަޔާނުގައި ފާހަގަކޮށްފައިވާ ކަންކަން ސާފުނުވާކަމަށް ވިދާޅުވެފައެވެ.
އެގޮތުން ބަޔާން ފައްޓަވަމުން ހުޅުމާލެއިން ފެނުނީ ކަނޑައެޅިގެން އަޒުހާނުގެ ހަށިގަނޑުކަން ފުލުހުން ކަށަވަރުކޮށްދީފައި ނުވާއިރު، އަޒުހާނުގެ ފޯނު ފެނިއްޖެ ކަމަށާއި، އޭނާ މަރާލާފައި ވާ ކަމުގެ އެއްވެސް ހެއްކެއް ނެތްކަމަށް ފުލުހުން ބުނުމުން ގިނަ ސުވާލުތަކެއް އުފެދޭކަމަށް އިންތި ވިދާޅުވިއެވެ. އަދި އެ ބަޔާނަކީ އެ މައްސަލައިގެ ތަހުގީގު ފުރިހަމަ ނުވަނިސް ނެރެފައިވާ ބަޔާނެއްކަންވެސް އިންތި ފާހަގަކުރެއްވިއެވެ.
" އަޅުގަނޑު ކަންބޮޑުވަނީ ތަހުގީގެއްގެ ފުރިހަމަ ހިސާބަކަށް ނުދަނީސް މިހާ އަވަހަށް ސްޓޯރީ ނިންމަވާލެއްވީތީވެ. އެބާވަތުގެ އިބާރާތެއް އައިސްގެނެއް ނުވާނެ މީހަކު މަރާލާފަ ނުވަތަ ގެއްލުވާލާފައި ވާއިރުގައި އޭގެ ހަގީގަތަކާއި ހަމަޔަށް ނުދެވެނީސް މިހާ އަވަހަށް ސްޓޯރީ ނިންމާލާފއިވާތީ ހަގީގަތުގައި ކަންބޮޑުވޭ"
މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ
އިންތި އިތުރަށް ވިދާޅުވީ މި ހާދިސާއާއި ގުޅިގެން ހަނދާނަށް އަންނަނީ ހުޅުމާލެއިން މިނިވަން ނޫހުގެ ނުސްވެރިޔާ އަހުމަދު ރިލުވާނު ވަގަށް ގެނި ހާދިސާ ތަހުގީގުކުރުމަށް ފުލުހުން އަމަލުކޮށްފައިވާ ކަންކަމެވެ.
"އަހުމަދު ރިލުވާނު ވަގަށް ނެގި ކަންތައްތަކުގައިވެސް އާއިލާގެ ފަރާތުންނާއި ހެޔޮ އެދޭ މީހުން އަމިއްލަޔަށް މުޅި ސަރަހައްދު ބަލައި އަދި ފުލުހުންގެ ސަމާލުކަމަށް ގެނެސް ހުރި ކަންބޮޑުވުންތައް ފާހަގަކުރީމަ އަދި ޕްރައިވެޓު އިނގިރޭސި ވިލާތުގެ ތަހުގީގީ ބަޔަކާއި ގުޅިގެން ހިންގި ތަހުގީގުގައި ދެއްކި ހަގީގަތްތަކެއް ހަނދާނަށް އަންނަނީ"
މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ
އެވާހަކަ އިންތި ފާހަގަކުރައްވާފައިވަނީ ރިލުވާނު ހޯދުމުގައިވެސް ފުލުހުން އެކަށީގެންވާ ތަހުގީގެއް ހިންގާފައި ނުވާކަން ސިފަކުރެއްވުމަށެވެ.
އެއާއެކު އިންތި ވިދާޅުވީ ފުލުހުންގެ ބޮޑު އިހުމާލު އޮތް އިރު މިއަދާއި ހަމަޔަށް އެއްވެސް ފިޔަވަޅެއް އަޅާފައި ނުވާކަންވެސް އިންތި ފާހަގަކުރެއްވިއެވެ. އަދި ހަމަ އެ ބާވަތުގެ އިތުރު މައްސަލައެއް ފެންމަތިވެފައިވާއިރު ތަހުގީގު ރަނގަޅަށް ހިންގާނެ ކަމާމެދު މިހާރު ސުވާލު އުފެދިފައިވާކަމަށް އިންތި ވަނީ ވިދާޅުވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
