އަޅުގަނޑުމެންނަށް އިދިކޮޅުގައި އޮވެގެން މާ ރަނގަޅަށް މަސައްކަތް ކުރެވޭ: ރައީސް ޞާލިހު
މީގެ ކުރިން، އިދިކޮޅު ޕާޓީގެ ގޮތުގައި އޮވެ، އެމްޑީޕީއަށް މާ ރަނގަޅަށް މަސައްކަތް ކުރެއްވިފައިވާ ކަމަށް އެޕާޓީގެ އިސް ލީޑަރ އަދި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
ރިޔާސީ އިންތިހާބުގެ ނާކާމިޔާބީއަށްފަހު ރޭ އެމްޑީޕީން ބޭއްވި ގައުމީ މަޖިލީހުގެ ފުރަތަމަ ޖަލްސާގައި، ރައީސް ޞާލިހު ވިދާޅުވީ، ސިޔާސީ ޕާޓީއެއްގެ ގޮތުގައި އެމްޑީޕީގެ އަމާޒަކަށް ދެން ވާންވީ ޒިންމާދާރު އިދިކޮޅު ޕާޓީއަކަށް ވުން ކަމަށާއި، އިދިކޮޅު ޕާޓީއަކީ ޑިމޮކްރަސީއެއްގައި މުހިއްމު ބާރެއް ކަމަށެވެ.
އަދި އެމްޑީޕީ އަކީ އިދިކޮޅު މަސައްކަތްތަކަށް އާ ޕާޓީއެއް ނޫން ކަމަށާއި، އެ ޕާޓީން އިދިކޮޅުގައި އޮވެ މާ ރަނގަޅު މަސައްކަތްތަކެއް ވެސް ކޮށްފައި އެބަހުރި ކަން ރައީސް ޞާލިހު ފާހަގަކުރެއްވި އެވެ.
އަޅުގަނޑުމެންގެ އަމާޒަކަށް ވާންވާނީ އަނެއްކާވެސް ޒިންމާދާރު އިދިކޮޅުު ޕާޓީއެއްގެ ގޮތުގައި މަސައްކަތް ކުރަން ތައްޔާރު ވުން. ސަރުކާރު ޖަވާބުދާރީ ކުރުވައި، ރައްޔިތުންނަށްޓަކައި އޮޕޮސިޝަނެއްގެ ގޮތުގައި އޮވެ، ކުރަންޖެހޭ މަސައްކަތް ތެދުވެރިކަމާއެކީގައި، ކުރިއަށް ގެންދިޔުން. އަޅުގަނޑު ހިތުން އެމްޑީޕީއަކީ އެކަމަށް އައު ޕާޓީއެއް ނޫން. އަޅުގަނޑުމެންނަށް ބައެއް ފަހަރު, އިދިކޮޅުު ޕާޓީގެ ގޮތުގައި އޮވެ މާ ރަނގަޅު މަސައްކަތް ތަކެއް ކުރެވޭ. އަޅުގަނޑު ހިތުން މިފަހަރުވެސް ރައްޔިތުންނަށް އެކަން ފެނިގެންދާނެ.
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
މިއާއެކު ރައީސް ޞާލިހް ވިދާޅުވީ އެމްޑީޕީއަކީ ވަރުގަދަ އޮޕޯޒިޝަން ޕާޓީއެއްގެ ގޮތުގައި އޮތުމަށް ދޭން ޖެހޭ އެހީތެރިކަން އެމަނިކުފާނުގެ ފަރާތުން ބަރާބަރަށް ލިބިލައްވާނެ ކަމަށެވެ. އަދި އަންނަ އަހަރުގެ ރައްޔިތުންގެ މަޖިލިސް އިންތިހާބު ކާމިޔާބުކުރާށާއި، 2028 ވަނަ އަހަރު އެމްޑީޕީ އަލުން ވެރިކަމަށް ގެނައުމަށްޓަކައި ކޮށްދެވެން ހުރި ހުރިހާ ކަމެއް ކުރުމުގައިވެސް އެމާނިކުފާނުގެ އެއްބާރުލުން ލިބޭނެ ކަމަށް ވިދާޅުވި އެވެ.
މީގެ އިތުރުން ރައީސް ވިދާޅުވީ މިއީ އެމްޑީޕީ ހިންގުމުގެ ތެރެއަށް އާ ވިސްނުމާއި، ޒުވާނުންގެ ޖޯޝާއި ފޯރި އަދި ރޫހު ގެންނަންވީ ވަގުތު ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
