އަޅުގަނޑުމެން ކޮށްދިން މަސައްކަތުގެ ވާހަކަ ވަރަށް އަވަހަށް ރައްޔިތުން ދައްކަން ފަށާނެ: ރައީސް ޞާލިހު

ފާއިތުވެދިޔަ 5 އަހަރު ތެރޭގައި އެމްޑީޕީގެ މި ކޯލިޝަން ސަރުކާރުން ދިވެހި ރައްޔިތުންނަށްޓަކައި ކޮށްދީފައިވާ ކަންކަމުގެ ވާހަކަ، އެ ރައްޔިތުން، ވަރަށް އަވަހަށް ދައްކަން ފަށާނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.

ރައީސް ޞާލިހް މިފަދައިން ވިދާޅުވީ ރިޔާސީ އިންތިހާބުގެ ނާކާމިޔާބީއަށްފަހު ރޭ އެމްޑީޕީން ބޭއްވި ގައުމީ މަޖިލީހުގެ ފުރަތަމަ ޖަލްސާގައި ވާހަކަ ދައްކަވަމުންނެވެ.

އެގޮތުން ރައީސް ޞާލިހްގެ ވިދާޅުވީ، މި ވޭތުވެދިޔަ ފަސް އަހަރުގެ ތެރޭގައި މުޅި ދިވެހިރާއްޖޭގެ ތަރައްގީއަށް ގިނަ މަސައްކަތް ތަކެއް ކޮށްދެވިފައިވާ ކަމަށެވެ. އަދި އެކަންކަން ރައްޔިތުން ބަލައިގަންނަށް ދެން މާ ގިނަ ދުވަސްތަކެއް ނުނަގާނެ ކަމަށްވެސް ވިދާޅުވި އެވެ.

އަޅުގަނޑު ގަބޫލުކުރާ ގޮތުގައި ދިވެހި ރައްޔިތުންނަށް އަދި، މާ ލަސްތަކެއްނުވެ އަޅުގަނޑުމެންގެ ސަރުކާރުން ކޮށްދީފައިހުރި ކަންތައްތައް ބަލައިގަނެ، އެ ކަންތައްތަކުގެ ވާހަކަ ދައްކަން ފަށާނެ. މުޅި ރާއްޖޭގެ ތަރައްގީއަށްޓަކައި ސަރުކާރުން ގިނަ މަސައްކަތް ތަކެއް ކުރެއްވިއްޖެ.

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު

މިއާއެކު ރައީސް ޞާލިހު ވިދާޅުވީ، ރައްޔިތުންނަށްޓަކައި އެކަންކަން ކޮށްދެއްވާފައިވާއިރު، އެކަން އެ ރައްޔިތުންގެ ވޯޓުން ފެނިގެން ނުގޮސް އިންތިޚާބުން ބަލިވީ، ސަރުކާރާއި ގުޅޭގޮތުން "ވަރަށް ގިނަ ދޮގުތަކެއް" "ބައެއް ފަރާތްތަކުން" ފަތުރަމުން ދިޔުމާއި ގުޅިގެން ކަމަށް އެމަނިކުފާނު ވިދާޅުވި އެވެ.

އެހެންނަމަވެސް އަޅުގަނޑު މި ދެންނެވިހެން ލަސްތަކެއްނުވެ އޭގެ ހަގީގަތްތައް ހާމަވެ ރައްޔިތުންނަށް އަޅުގަނޑުމެން މި ކޮށްދިން މަސައްކަތްތައް އިހުސާސް ކުރެވެން ފަށާނެ.

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު

ރޭގެ ބައްދަލުވުމުގައި ރައީސް ސާލިހުވަނީ އެ ޕާޓީގެ ކުރިއަށް އޮތް އަމާޒަކީ ރައްޔިތުންގެ މަޖިލީހުގެ ގޮޑިތައް ޕާޓީއަށް ކާމިޔާބު ކޮށްދިނުމަށް މަސައްކަތް ކުރެއްވުން ކަމަށް ވިދާޅުވެފައެވެ. އަދި މަޖިލީހުގައި މިހާރު ބަހުސް ކުރެވެމުންދާ ބަރުލަމާނީ ނިޒާމާގުޅޭ ގަރާރަށް ތާއީދު ނުކުރަން އެމްޑީޕީގެ މުޅި ގައުމީ މަޖިލީހުން ފާސްކޮށްފައިވާއިރު، ރައީސް ޞާލިހު ވަނީ ރާއްޖޭގައި ރިޔާސީ މިޒާމު ދަމަހައްޓަން ކުރެވެން ހުރި މަސައްކަތްތައް އެމަނިކުފާނު ކުރައްވާނެ ކަމަށް ވިދާޅުވެފައެވެ.