ކޮޕް 27ގައި ރައީސް ނަޝީދު ތަމްސީލްކުރައްވަނީ ލަންކާ

މިޞްރުގެ ޝަރްމުއްޝައިޚްގައި ބާއްވާ އ.ދ.ގެ 2022 ވަނަ އަހަރުގެ ކުލައިމެޓް ޗޭންޖް ކޮންފަރެންސް ( ކޮޕް 27) ގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ތަމްސީލްކުރައްވަނީ އަވަށްްޓެރި ސްރީލަންކާ ކަމަށް ރައްޔިތުންގެ މަޖިލީހުން ހާމަކޮށްފިއެވެ.

ރައްޔިތުންގެ މަޖިލީހުން މިއަދު ބުނީ، މިޞްރުގެ ޝަރްމުއްޝައިޚްގައި ބާއްވާ އ.ދ.ގެ 2022 ވަނަ އަހަރުގެ ކުލައިމެޓް ޗޭންޖް ކޮންފަރެންސް ( ކޮޕް 27) ގައި ބައިވެރިވެވަޑައިގެންނެވުމަށް މިޞްރަށް ކުރައްވާ ދަތުރުފުޅެއްގައި މަޖިލިސް ރައީސް މުހައްމަދު ނަޝީދު މިއަދު ހެނދުނު ފުރާ ވަޑައިގެންފައިވާކަމަށެވެ.

އަދި މި ނޮވެމްބަރު މަހުގެ 4 އިން 9 އަށް ރައީސް ނަޝީދު މިސްރަށް ކުރައްވާ މިިދަތުރުފުޅުގައި ކޮޕް27 ގައި ބައިވެރިވެވަޑައިގަތުމަށް ހަމަޖެހިފައިވަނީ ޑިމޮކްރަޓިކް ސޯޝަލިސްޓް ރިޕަބްލިކް އޮފް ސްރީލަންކާގެ ޤައުމީ ވަފުދު މެމްބަރެއްގެ ގޮތުގައި ކަމަށަވެސް މަޖިިލީހުން ބުނެފައިވެއެވެ.

މީގެ އިތުރުން މަޖިލީހުން ބުނީ، މިމަހުގެ 8 ވަނަ ދުވަހު މިސްރުގައި ބާއްވާ ކްލައިމެޓް ފްރޮސްޕެރިޓީ ޕްލޭންސް ފްލެގްޝިޕް އިވެންޓް، ޕޭވިން ދަ ލޭ ފްރޮމް ވަލްނަރެބިލިޓީ ޓު ޕްރޮސްޕެރިޓީގައި ނަޝީދު ބައިވެރިވެވަޑައިގަންނަވާނެ ކަމަށެވެ.

އެ ހަރަކާތުގައި މޫސުމީ ތަނަވަސްކަމުގެ ގައުމީ ޕްލޭންތައް އެކުލަވާލުމުގައި ގައުމުތަކުން ހޯދާފައިވާ ކުރިއެރުންތައް ދައްކާލުމަށް ހަމަޖެހިފައިވާއިރު އެ ބައްދަލުވުމަކީ ކްލައިމެޓް ވަލްނަރަބަލް ފޯރަމް (ސީވީއެފް) އަދި ވަލްނަރަބަލް ގްރޫޕް އޮފް 20 (ވީ20) އިން ރާވާ އިންތިޒާމު ކުރާ ބައްދަލުވުމެއް ކަމަށް މަޖިލީހުން ބުނެއެވެ.

މަޖިލީހުން ބުނީ މިސްރަށް ކުރައްވާ ދަތުރުފުޅުގައި ސީވީއެފްއާއި ވީ 20 އަދި އެހެނިހެން ގައުމުތަކުގެ އިސް އޮފިޝަލުންނާއި ވެސް ނަޝީދު ބައްދަލުކުރައްވާނެ ކަމަށާއި މިވަގުތު ކްލައިމެޓް ވަލްނަރަބަލް ފޯރަމްގެ (ސީވީއެފް)ގެ ވަލްނަރަބަލް ޓްވެންޓީ (ވީ20) ގްރޫޕުގެ ރިޔާސަތު ގާނާއިން ބަލަހައްޓާއިރު ރާއްޖެއަކީ ވެސް ސީވީއެފްގެ މެމްބަރު ގައުމެއް ކަމަށެވެ.

ކޮޕް 27ގައި ރައީސް ނަޝީދު ލަންކާ ތަމްސީލް ކުރައްވާއިރު، މި ކޮންފަރެންސް ގައި ރާއްޖެ ތަމްސީލް ކުރައްވަނީ ނާއިބު ރައީސް ފައިސަލް ނަސީމެވެ. އެގޮތުން އެމަނިކުފާނާއި ސަރުކާރުގެ މަތީ ފަންތީގެ ވަފްދެއްވެސް ވަނީ މިއަދު ހެނދުނު މިސްރަށް ފުރާވަޑައިގެންފައެވެ.