ސުކޫލު ނިންމާފަ ނިކުންނަ ކޮންމެ ކުައްޖަކީ ހަތިޔާރު އުފުލަން ދަންނަ ކުއްޖަކަށް ވާން ޖެހޭ: އުމަރު
ނެޝަނަލް ސާރވިސް ތައާރަފްކޮށް ސުކޫލު ނިންމާފަ ނިކުންނަ ކޮންމެ ކުއްޖަކީ ހަތިޔާރު އުފުލަން ދަންނަ ކުއްޖަކަށް ވާން ޖެހޭކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެއެވެ.
"ކުރި ޖިހާދު- ކުރަން އޮތް ޖިހާދު" ގެ ނަމުގައި ދިވެހި ނޭޝަނަލް އެކްޝަން (ޑީއެންއޭ) އިން ރޭ ބޭއްވި ޖަލްސާގައި ދިވެހި ގައުމުގެ މިނިވަންކަން ދިފާއުކުރުމަށް މާޒީގައި އަބްތާލުން ކޮށްފައިވާ ވަރުގަދަ ޖިހާދުގެ ޒިކުރާ އާކުރަމުން އުމަރު ނަސީރު ވަނީ ގައުމިއްޔަތު އުފެއްދުމަށް ކުރަން ޖެހިފައިވާ ޖިހާދަށްވެސް އަލިއަޅުވާލައްވާފައެވެ.
އެގޮތުން ކުޑައިރުއްސުރެ ކުދިންގެ ހިތްތަކުގައި ގައުމިއްޔަތު ދިރުވާ އާލާކުރުމަށް ގިނަ މަސައްކަތްތަކެއް ކުރަން ޖެހޭކަމަށް އޭނާ ވިދާޅުވިއެވެ. އެގޮތުން ނެޝަނަލް ސާރވިސް އުފައްދާ ސުކޫލުން ނިކުންނަ ކޮންމެ ދަރިވަރަކީވެސް ހަތިޔާރު އުފުލަން ދަންނަ ކުއްޖަކަށް ހަދަން ޖެހޭކަމަށް އޭނާ ވަނީ ވިދާޅުވެފައެވެ.
"އަޅުގަނޑުމެން އެބަ ޖެހޭ ދިވެހިރާއްޖެއަށް ނެޝަނަލް ސާރވިސް ތައާރަފްކުރަން. ސުކޫލު ނިންމާފައި ނިކުންނަ ކޮންމެ ކުއްޖަކީ ހަތިޔާރު އުފުލަން ދަންނަ ކުއްޖަކަށް ވާން ޖެހޭ"
ކުރީގެ ހޯމް މިނިސްޓަރު އުމަރު ނަސީރު
އުމަރު ވިދާޅުވީ އެއީ ސިންގަޕޫރު ފަދަ ގައުމުތަކުގައިވެސް އެކަން އޮންނަ ގޮތްކަމަށެވެ. އަދި ސުކޫލުން ނިކުންނަ ކޮންމެ ދަރިވަރަކީ ހަތިޔާރު އުފުލަން ދަންނަ، ހަނގުރާމަ ކުރަން ދަންނަ ކުދިންނަށް ހެދުމަށް ގާނޫނަކުން ނެޝަނަލް ސާރވިސް ތައާރަފްކުރަން ޖެހޭކަމަށް އޭނާ ވަނީ ވިދާޅުވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
