ޕީއެންސީގެ ޕާލަމެންޓްރީ ގްރޫޕުގެ ލީޑަރ ކަމަށް ސިރާޖު!
ރާއްޖޭގެ ވެރިކަންކުރާ މައި ޕާޓީ، ޕީޕަލްސް ނެޝަނަލް ކޮންގްރެސް, ޕީއެންސީގެ ޕާލަމެންޓްރީ ގްރޫޕުގެ ލީޑަރ ކަމަށް ފޮނަދޫ ދާއިރާގެ މެންބަރު މޫސާ ސިރާޖު ހަމަޖައްސަވައިފިއެވެ.
ސިރާޖު ޕީއެންސީގެ ޕީޖީ ލީޑަރ ކަމަށް ހަމަޖައްސަވާފައިވާ ކަން ނިމިދިޔަ ނޮވެމްބަރު މަހުގެ 29 ވަނަ ދުވަހު، އެ ޕާޓީން މަޖިލީހަށް އަންގާފައިވާ ކަމަށް މިއަދުގެ މަޖިލީހުގެ ޖަލްސާގައި މަޖިލީހުގެ ރައީސް މުހައްމަދު އަސްލަމް ވަނީ އިއުލާން ކުރައްވާފައެވެ.
ޕީއެންސީގެ ޕީޖީ ލީޑަރ ކަމަށް އެންމެ ފުރަތަަމަ ހުންނެވީ މިހާރުގެ ލޯކަލް ގަވަމަންޓް މިނިސްޓަރު އަދި ކުރީގެ މަޑުއްވަރީ ދާއިރާގެ މެންބަރު އާދަމް ޝަރީފް ޢުމަރެވެ. ނަމަވެސް އެބޭފުޅާ ސަރުކާރުގެ މަގާމާއި ހަވާލުވެވަޑައިގެންނެވުމަށްޓަކައި މެންބަރު ކަމުން އިސްތިއުފާ ދެއްވުމުން، ދެން ޕީއެންސީގެ ޕީޖީ ލީޑަރ ކަމަށް ހަމަޖެއްސެވުނީ ފެލިދޫ ދާއިރާގެ މެންބަރުން އިބްރާހިމް ފަޒުލް ރަޝީދެވެ.
ފަޒުލް ޕީއެންސީގެ ޕީޖީ ލީޑަރ ކަމަށް ހަމަޖެއްސެވިކަން މަޖިލީހުން އިއުލާން ކުރީ ނޮވެންބަރު 22 ގައެވެ.
އެފަހުން ނިމިދިޔަ ހަފްތާގެ ތެރޭގައި ސަރުކާރުން ވަނީ އާބަންކޯގެ މެނޭޖިންގ ޑިރެކްޓަރ ކަމަށް ފަޒުލް ކަނޑައަޅުއްވާފައެވެ. އެއާއެކު އެބޭފުޅާވެސް ވަނީ މަޖިލީހުން އިސްތިއުފާ ދެއްވާފައެވެ.
މިހާރު މަޖިލީހުގައި ސަރުކާރު ތަމްސީލުކުރާ ޕާޓީ އަކީ ޕީއެންސީ ކަމަށް ވާއޮރު، އެޕާޓީ މެންބަރުންގެ ގޮތުގައި ތިއްބެވީ މެންބަރު ސިރާޖާއި، ތުލުސްދޫ ދާއިރާގެ މެންބަރު އިބްރާހީމް ނަސީމެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
