މި ފެށުނީ ޕާޓީއަކީ އެންމެ ވަރުގަދަ ޕާޓީއަށް ހެދުމުގެ މަސައްކަތް: ހަސަން ލަތީފް

މި ފެށުނީ ޑިމޮކްރެޓްސްއަކީ ރާއްޖޭގައި އޮތް އެންމެ ވަރުގަދަ ސިޔާސީ ޕާޓީއަށް ހެދުމުގެ މަސައްކަތް ކަމުގައި ޑިމޮކްރެޓްސްގެ ގެ ރައީސްކަމަށް އަލަށް އިންތިހާބުވެ ވަޑައިގެން ހަސަން ލަތީފް ވިދާޅުވެއްޖެއެވެ.

މިދިޔަ ހޮނިހިރު ދުވަހު ކުރިއަށް ދިޔަ އެ ޕާޓީގެ އެތެރޭގެ އިންތިހާބު ކާމިޔާބު ކުރެއްވި ހަސަން ލަތީފް ކުރެއްވި ޓުވީޓެއްގައިވަނީ، ޕާޓީގެ ރައީސްގެ މަގާމަށް އެބޭފުޅާއަށް ވޯޓު ދެއްވި އެންމެހައި މެމްބަރުންނަށް ފަށްފަށުން ޝުކުރު ދަންނަވާ ކަމުގައި ވިދާޅުވެފައެވެ.

މީގެ އިތުރުން ހަސަން ލަތީފުގެ ޓުވީޓުގައި ވިދާޅުވީ، މިފެށެނީ ޕާޓީގެ މިސްރާބު ހިފަހައްޓައި އެންމެން ޝާމިލުވާ ސިޔާސީ ހަރަކާތެއްގެ ތެރެއިން ޑިމޮކްރެޓްސްއަކީ އެންމެ ވަރުގަދަ ޕާޓީއަށް ހެދުމުގެ މަސައްކަތްކަމުގައެވެ.

މާތް ﷲ ގެ ހެޔޮ ރަޙްމަތްފުޅުން މިފެށެނީ ޕާޓީގެ މިސްރާބު ހިފަހައްޓައި, އެންމެން ޝާމިލުވާ ސިޔާސީ ހަރަކާތެއްގެ ތެރެއިން މިޕާޓީއަކީ އެންމެ ވަރުގަދަ ޕާޓީއަށް ހެދުމުގެ މަސައްކަތް.

ހަސަން ލަތީފް

މިދިޔަ ހޮނިހިރު ދުވަހު ބޭއްވި ދަ ޑިމޮކްރެޓްސްގެ ގެ އެތެރޭގެ އިންތިހާބުގައި އެ ޕާޓީގެ ރައީސްކަަމަށް ހަސަން ލަތީފްގެ އިތުރުން ދެން ވާދަކުރެއްވީ މިދިޔަ ރިޔާސީ އިންތިހާބުގައި އެ ޕާޓީގެ ރިޔާސީ ކެނޑިޑޭޓް ލަބީބްގެ ރަނިންމޭޓެއްގެ ގޮތުގައި ނިކުންނެވި ހުސައިން އަމްރުއެެވެ.

ރޭ އިއުލާންކުރި ޑިމޮކްރެޓްސްގެ ގެ އެތެރޭގެ އިންތިހާބުގެ ވަގުތީ ނަތީޖާ ދައްކާގޮތުން ޖުމުލަ 1704 ވޯޓާއި އެކު ހެންވޭރު ހުޅަނގު ދާއިރާގެ މެންބަރު ހަސަން ލަތީފުވަނީ ކުރިހޯއްދަވާފައެވެ.

މީގެ އިތުރުން ހަސަން ލަތީފުއާއި ވާދަކުރެއްވި އެސްޓީއޯގެ ކުރީގެ މެނޭޖިން ޑިރެކްޓަރު ހުސައިން އަމްރު މުހައްމަދު ރަޝާދަށް ލިބިފައި ވަނީ 1300 ވޯޓެވެ.