ނާލާފުށީގެ ކޯޒްވޭ އާއި ފެނާ ނަރުދަމާގެ މަސައްކަތް އަވަހަށް ނިންމަވައިދެއްވުމަށް އެދެފި

މ.ނާލާފުށީގެ ކޯޒްވޭ އާއި ފެނާ ނަރުދަމާގެ މަސައްކަތް އަވަހަށް ނިންމަވައިދެއްވުމަށް އެރަށުގެ ކައުންސިލުން، ރައީސުލްޖުމްހޫރިއްޔާ ޑރ.މުހައްމަދު މުއިއްޒު ގެ އަރިހުން އެދެފިއެވެ.

ނާލާފުށި ކައުންސިލުން މިފަދައިން އެދިފައި މިވަނީ ރައީސް ޑރ.މުއިއްޒު ދ، މ އަދި ވ އަތޮޅުގެ ބައެއް ރަށްތަކަށް ކުރައްވާ ދަތުރުފުޅުގެ ތެރެއިން މިއަދު ހެނދުނު ނާލާފުށީ ފެނަކަ އޮފީހުގައި އެރަށުގެ ކައުންސިލް އަދި އަންހެނުންގެ ތަރައްޤީއަށް މަސައްކަތްކުރާ (އ.ތ.މ) ކޮމިޓީއާ އެކު އެމަނިކުފާނު ބޭއްވެވި ބައްދަލުވުމުގެ ތެރެއިންނެވެ.

މިބައްދަލުވުމުގައި ރައީސް ޑރ.މުއިއްޒު ވަނީ ރަށުގެ ތަރައްޤީގެ އެންމެ މުހިންމު ކަންކަމާ ގުޅޭގޮތުން ރަށުގެ ކައުންސިލާއި އެކު މަޝްވަރާކުރައްވާފައެވެ.

ކޯޒްވޭގެ މަސައްކަތާއި ފެނާ ނަރުދަމާގެ މަސައްކަތް އަވަހަށް ނިންމަވައިދެއްވުމަށް އެދުމުގެ އިތުރުންވެސް ކައުންސިލުން ވަނީ ރަށުގައި  އާ ބަނދަރެއް އަވަހަށް ހަދައިދިނުމަށާއި، ސްކޫލުގެ އާ އިމާރާތުގެ މަސައްކަތް ހުއްޓިފައި ހުރިކަން ފާހަގަކޮށް، އެ މަސައްކަތް ވެސް ކުރިއަށް ގެންގޮސްދެއްވުމަށް  ރައީސް މުއިއްޒު ގެ އަރިހުން އެދިވަޑައިގެންފައެވެ.

މީގެ އިތުރުންވެސް، ކައުންސިލް އިދާރާގެ ޖާގައިގެ ދަތިކަމާއި، ކުނި ކޮށްޓެއް ނެތުމުން ކުރިމަތިވާ ގޮންޖެހުންތައް ފާހަގަކޮށް ކައުންސިލުން ވަނީ ކުޅިވަރުގެ ދާއިރާ އަދި މަސްވެރިކަމުގެ ސިނާޢަތާއި ސިއްހީ ދާއިރާ ކުރިއެރުވުމަށް ބޭނުންވާ ކަންކަން ވެސް ރައީސް ޑރ.މުއިއްޒާއި ހިއްސާ ކުރައްވާފައެވެ.

ކައުންސިލްގެ އިތުރުން ރަށުގެ އ.ތ.މ ކޮމިޓީން ވެސް ވަނީ އެ ކޮމިޓީގެ ކަންބޮޑުވުންތައް ވެސް ރައީސް ޑރ.މުއިއްޒާއި ހިއްސާކުރައްވާފައެވެ. އޭގެތެރޭގައި، މަސައްކަތް ކުރާނެ މާހައުލެއް ނެތުމުން ކުރިމަތިވާ ގޮންޖެހުންތަކާއި 5000 ރުފިޔާއަށް ވުރެ މަދުނުވާވަރުގެ އެލަވެންސެއް ހަމަޖައްސައިދިނުމަށް ވެސް ވަނީ އެދިފައެވެ.

މި ބައްދަލުވުމުގައި ވާހަކަފުޅު ދައްކަވަމުން ރައީސް ޑރ.މުއިއްޒު ވިދާޅުވީ، ކައުންސިލް އިދާރާގެ އާއިމާރާތްތައް އެޅުމަށް މަސައްކަތް ސަރުކާރުން ކުރައްވަމުންދާ ކަމަށާއި، ކައުންސިލުން ފާހަގަކުރި ކަންތައްތައް ހަމަޖެހިގެންދާނެ ކަމަށެވެ. އަދި އެމަނިކުފާނު ވަނީ މި ބައްދަލުކުރެއްވުމުގައި ބައިވެރިވެވަޑައިގެންނެވި ވަޒީރުން މެދުވެރިކުރައްވައި ކައުންސިލުން ފާހަގަކުރި ކަންކަމުގައި ސަރުކާރުން ކުރައްވަމުން ގެންދަވާ މަސައްކަތްޕުޅުތަކުގެ އެންމެ ފަހުގެ މަޢުލޫމާތު ވެސް ހިއްސާކުރައްވާފައެވެ.