މައިގަނޑު ދެތިން ކަމެއްގައި އެއްބަސްވުމަކަށް ނާދެވުނު ނަމަވެސް، ބައެއް ކަންކަމުގައި ކުރިއެރުން ލިބުނު: އީރާން

އެންމެ ދުވަހެއްގެ މަޝްވަރާއަކުން އިރާނާއި އެމެރިކާއާ ދެމެދު އެއްބަސްވުމަކަށް އާދެވޭނެ ކަމަށް ޤަބޫލުކޮށްގެން ނުވާނެ ކަމަށާ، އެއްބަސްވުމަކަށް އާދެވޭނީ އެމެރިކާއިން ކުރަމުންދާ ނުހައްގު ޑިމާންޑްތައް ހުއްޓާލުމުން ކަމަށް އިރާނުން ބުނެފިއެވެ.

ޕާކިސްތާނުގެ ވެރިރަށް އިސްލާމްއާބާދުގައި އެމެރިކާއާއި އީރާނާ ދެމެދު އިއްޔެ 21 ގަޑިއިރަށް ކުރިއަށްދިޔަ މަޝްވަރާތައް އެއްވެސް އެއްބަސްވުމަކާ ނުލައި ވަނީ ނިންމާލައިފައެވެ.

އީރާނުގެ ޚާރިޖީ ވުޒާރާގެ ތަރުޖަމާނު އިސްމާޢީލް ބަގާއީ އާދީއްތަ ދުވަހު އީރާނުގެ ދައުލަތުގެ ޓީވީއަށް ދެއްވި ބަސްދީގަތުމެއްގައި ވިދާޅުވީ، މި މަޝްވަރާތައް ކުރިއަށްދިޔައިރު ދެގައުމުގެ ދެމެދު އިތުބާރު ނެތުމުގެ މައްސަލަތައް ގިނަ ކަމަށެވެ. އަދި އޮތީ ކަންކަން ބޮޑު ޝައްކާއި ވަހުމެއްގެ ތެރޭގައި ކަމަށެވެ.

”މިއީ އެމެރިކާއާއި އިސްރާއީލުން އީރާނާ ދެކޮޅަށް ފެށި 40 ދުވަހުގެ ހަނގުރާމައަށްފަހު ބޭއްވުނު ފުރަތަމަ ބައްދަލުވުން، އެއް ބައްދަލުވުމަކުން ނަތީޖާއެއް ނުކުންނާނެ ކަމަށް އެއްވެސް ފަރާތަކުން އުންމީދު ނުކުރާނެ“ އޭނާ ފާހަގަކުރެއްވިއެވެ.

ބަގާއީ ވިދާޅުވި ގޮތުގައި މަޝްވަރާތައް އުނދަގޫވީ އެޖެންޑާގައި ހުރި މައްސަލަތަކުގެ ނާޒުކުކަމުންނެވެ.

”ވަކިން ޚާއްޞަކޮށް ހޯމޫޒް ކަނޑުއޮޅިއާ ގުޅޭ ކަންކަމާއި ސަރަޙައްދީ މަސްލަހަތުތަކާ ގުޅޭގޮތުން ދެބަސްވުންތަކެއް ހުރި. ބައެއް ކަންކަމުގައި ކުރިއެރުންތަކެއް ލިބުނު ނަމަވެސް، މައިގަނޑު ދެތިން ކަމެއްގައި އެއްބަސްވުމަކަށް ނާދެވުމުން، އެމެރިކާއެކު އެއްބަސްވުމެއްގައި ސޮއިކުރެވޭ ގޮތް ނުވީ.“ އޭނާ އިތުރަށް ވިދާޅުވިއެވެ.

މިކަމާ ގުޅޭގޮތުން ބަގާއީ އެކްސްގައި ކުރެއްވި ޕޯސްޓެއްގައި ވިދާޅުވެފައިވާގޮތުގައި، ވޭތުވެދިޔަ 24 ގަޑިއިރުގެ ތެރޭގައި ނިއުކްލިއަރ މައްސަލައާއި، އީރާނަށް އަޅާފައިވާ ދަތިކުރުމުގެ ފިޔަވަޅުތައް އުވާލުމާއި، ހަނގުރާމައިގެ ބަދަލު ހޯދުމުގެ އިތުރުން ސަރަޙައްދީ ހަނގުރާމަ މުޅިން ހުއްޓާލުމާ ގުޅޭގޮތުން ފުޅާ ދާއިރާއެއްގައި ވާހަކަދެކެވުނެވެ.

”މި ޑިޕްލޮމެޓިކް މަސައްކަތް ކާމިޔާބުވާނީ އަނެއް ފަރާތް (އެމެރިކާ)އިން އިޚްލާޞްތެރިކަން ދައްކައި، އީރާނުގެ ގާނޫނީ ހައްގުތަކަށް އިހުތިރާމްކޮށް، ނުހައްގު ޑިމާންޑްތައް ކުރުން ހުއްޓާލުމުން“ އޭނާ ވިދާޅުވިއެވެ.

ޕާކިސްތާނުގެ މެދުވެރިވުމާއެކު ބޭއްވި މި މަޝްވަރާތަކަށް އެ ގައުމުން ވެދިން އެހީތެރިކަމަށް އީރާނުން ވަނީ ޝުކުރު އަދާކޮށްފައެވެ. އީރާނުގެ މެހެރް ނިއުސް އެޖެންސީން ރިޕޯޓްކޮށްފައިވާ ގޮތުގައި އީރާނުގެ ވަފުދު މިހާރު ވަނީ ޕާކިސްތާނުން ފުރާފައެވެ.

ޖުމްލަ 21 ގަޑިއިރަށް ދެމިގެންދިޔަ މި މަޝްވަރާތަކުގެ އިތުރު ބުރެއް ކުރިއަށް އޮތް ތަނުގައި ބާއްވާނެ ކަމެއް ނުވަތަ ނޫންކަން އީރާނުން އަދި ހާމައެއް ނުކުރެއެވެ.