ޗެއާޕާސަން އިންތިޚާބުގައި ތާއީދު ކުރަނީ މީކާއިލްއަށް؛ ނަޝީދު ނުކުންނެވީ މާފަހުން: ޞާލިހް

ކުރިއަށް އޮތް އެމްޑީޕީ ޗެއާޕާސަން އިންތިޚާބުގައި އެމަނިކުފާނު ތާއީދު ކުރައްވަނީ ގަލޮޅު ދެކުނު ދާއިރާގެ މެންބަރު މީކާއީލް އަހްމަދު ނަސީމް އަށް ކަމުގައި ކުރީގެ ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

އެމްޑީޕީގެ ޗެއާޕާސަން އިންތިޚާބުގެ ކެންޕެއިން ފޯރީގައި ކުރިއަށްދާއިރު، އެންމެ ވާދަވެރީ މީކާއީލް އާއި ކުރީގެ ރައީސް މުޙައްމަދު ނަޝީދު އާ ދެމެދުގައެވެ.

ރައީސް ޞާލިޙްގެ ފެކްޝަނުގެ ގިނަ ބޭފުޅުން ތިއްބެވީ މީކާއީލް އާއި އެކުގައެވެ. ނަމަވެސް އެމަނިކުފާނު ހުންނެވީ ކޮންބޭފުޅަކާއެކުގައިކަން މިހާތަނަށްވެސް ހާމަކުރައްވާފައި ނުވާއިރު، މިރޭ  ނަޝީދު، ޞާލިޙް އަދި ކުރީގެ ރައީސް ޔާމީން އަބްދުލްޤައްޔޫމް ބޭއްވެވި ބައްދަލުވުމުގައި ނޫސްވެރިއަކު ވަނީ  އެ އިންތިޚާބުގައި ޞާލިޙްގެ ތާއީދު އޮތީ ކޮން ކެންޑިޑޭޓަކަށްތޯ ސުވާލު ކޮށްފައެވެ.

އެ ސުވާލަށް ޖަވާބު ދެއްވަމުން ޞާލިޙް ވިދާޅުވީ، ޗެއާޕާސަން މަގާމު ހުސްވުމާއެކު އެ މަގާމަށް ވާދަކުރައްވަން މީކާއިލް ޝައުގުވެރިކަން ފާޅުކުރެއްވި ކަމަށާ، އޭރު އޭނާއަށް ތާއީދު ކުރައްވަން ނިންމެވި ކަމަށެވެ. އަދި ރައީސް ނަޝީދު ވާދަކުރައްވަން ނިންމެވި ނަމަވެސް، އެ ނިންމުން ބަދަލު ނުކުރައްވާ ކަމަށް ވިދާޅުވިއެވެ.

ރައީސް ނަޝީދު މި އިންތިޚާބަށް ނުކުމެވަޑައިގަތީ ތަންކޮޅެއް ފަހުން. މީކާއިލް ތިން މަސް ކުރިން ނުކުމެއްޖެ. ނުކުތުމާއެކު މީކާއިލްއަށް ތާއީދު ކުރާ ކަމަށް އަޅުގަނޑު އޮންނާނީ ބުނެފައި. އެހިސާބުގައި އެކަން އޮތީ. ރައީސް ނަޝީދު މިހާރު ވާދަކުރައްވާ. އެހެން ނަމަވެސް، އަޅުގަނޑުގެ ތާއީދު އޭރު އޮތް ގޮތަށް އޮތީ. އެއަކަށް އަދި ބަދަލެއް ނާދޭ

ރައީސް ޞާލިޙް

ޗެއާޕާސަން އިންތިޚާބުގައި ޞާލިޙްގެ ތާއީދު މީކާއިލް އަށް އޮތްކަމަށް ވިދާޅުވެފައިވާއިރު، އެމަނިކުފާނުގެ ވެރިކަން ފެށިގެން އައިއިރު އާއި އޭގެ މާކުރިންވެސް ނަޝީދުއަކީ ޞާލިޙްގެ ވަރަށް ގާތް ބޭފުޅެކެވެ.

ނަމަވެސް ޞާލިޙްގެ ވެރިކަމުގެ ވަކި ހިސާބަކުން އެމްޑީޕީ ދެ ފެކްޝަނަކަށް ބެހި، ނަޝީދުގެ ފެކްޝަނުގެ ބޭފުޅުން ޕާޓީން ކެންޑިގެން އައު ޕާޓީއެއް އުފައްދައި، ”އިބޫ ނޫން ގޮތެއް“ ހޯދުމަށް ޞާލިޙްގެ ސަރުކާރާ ދެކޮޅަށް ގިނަ މަސައްކަތްތަކެއް ކުރިއެވެ.

ޞާލިޙްގެ ވެރިކަން ވެއްޓި ރައީސް ޑރ މުޙައްމަދު މުޢިއްޒުގެ ވެރިކަން ފެށި ދޮޅު އަހަރުވީއިރު، ނަޝީދުއާއި އެމަނިކުފާނުގެ ފެކްޝަނުގެ ބޭފުޅުން މިހާރު ވަނީ އަލުން އެމްޑީޕީއާ ގުޅިފައެވެ. އަދި ޗެއާޕާަސަން ކަމަށް ނަޝީދު ވާދަކުރައްވަން ނިންމަވައި ކެންޕެއިން ކުރައްވަމުންދާއިރު، އަދިވެސް ޕާޓީ އޮތީ ދެކަފިވެފައެވެ. ނަމަވެސް ނަޝީދާއި ޞާލިޙް ވަނީ ކުރިން ކަންކަން ވީގޮތަށް ދެން ނުވާނެ ކަމުގެ ޔަގީންކަން ދެއްވާފައެވެ.