ރާއްޖޭގައި މަރުވާ މީހުންގެ 17 ޕަސެންޓަކީ ކެންސަރުގެ ބަލިމީހުން

ރާއްޖޭގައި މަރުވާ މީހުންގެ 17 ޕަސެންޓް މީހުންނަކީ ކެންސަރު ބަލީގައި މަރުވާ މީހުން ކަމަށް ޑަބްލިޔުއެޗް އޯ އިން ބުނެފިއެވެ.

ބައިނަލް އަޤްވާމީ ގޮތުން ފާހަގަ ކުރަމުންދާ ކެންސަރުގެ ދުވަހާއި ގުޅިގެން ހެލްތް ޕްރޮޓެކްޝަން އޮތޯރިޓީ (އެޗްޕީއޭ) އިން ނެރެފައިވާ ބަޔާނެއްގައި ބުނެފައިވަނީ ކެންސަރު ބައްޔަކީ ހަށިގަނޑުގެ ތެރޭގައި ސެލްތައް އުފެދޭ އުފެދުން ކޮންޓްރޯލުން ނެއްޓި އާދަޔާ ހިލާފަށް ގިނައިން ސެލް އުފެދެން ފެށުމުން ޖެހޭ ބަލިބަލީގެ ތެރެއިން ހިމެނޭ ބައްޔެއް ކަމަށެވެ.

އަދި މިއީ ހަށިގަނޑުގެ ކޮންމެ ތަނެއްގައި އުފެދިދާނެ އަދި ކެންސަރު އުފެދިފައިވާ ސަރަހައްދުގެ ޓިޝޫތަކާއި ސެލްތައް ކޮންޓްރޯލެއް ނެތި ބޮޑުވެ، އަދި ބަލި ދުރާލާ ދެނެގަނެ ފަރުވާ ނުހޯދިއްޖެނަމަ ނޫނީ ފަރުވާ ކޮންޓްރޯލް ނުކުރެވިއްޖެނަމަ، ހަށިގަނޑު އެހެން ބައިތަކަށް ފެތުރިގެންދާ ބައްޔެއް ކަމަށް ބުނެފައި ވެއެވެ.

މި އަހަރުގެ  ކެންސަރު ދުވަހަށް ކަނޑައަޅާފައިވާ ޝިއާރަކީ "ފަރުވާގެ ފަރަގު ކުޑަކުރަމާ" އެވެ.

އެޗްޕީއޭ އިން ބުނީ، ރާއްޖޭގައި އެންމެ ގިނައިން މީހުން މަރުވާ ތިން ސަބަބުތަކުގެ ތެރޭގައި ކެންސަރު ހިމެނޭ ކަމަށެވެ. ޑަބްލިވްއެޗްއޯގެ 2020 ވަނަ އަހަރު ތަފާސް ހިސާބުތަކުން ދައްކާ ގޮތުގައި ރާއްޖޭގައި އަހަރަކު މަރުވާ މީހުންގެ 17 އިންސައްތަ މީހުން މަރުވަނީ ކެންސަރު ބަލީގައެވެ.

އެޗްޕީއޭ އިން ބުނީ، ރާއްޖޭގައި ފިރިހެނުންނަށް އާންމުކޮށް ޖެހޭ ކެންސަރުގެ ވައްތަރުތަކުގެ ތެރޭގައި ފުއްޕާމޭ، ޕްރޮސްޓޭޓް، ކޮލޮރެކްޓަލް، ބަނޑާއި، ފުރަމޭގެ ކެންސަރު ހިމެނޭ ކަމަށެވެ.

ރާއްޖޭގައި އެންމެ ގިނައިން އަންހެނުން ފަރުވާ ހޯދަނީ އުރަމަތީގެ ކެންސަރަށެވެ.