އިންފްލޭޝަން މައްޗަށް ދާއިރު މުސާރަ ބޮޑުކުރުމަކީ ރަނގަޅު ފިޔަވަޅެއް: ޝަރީފު

އިންފްލޭޝަން މައްޗަށްދާ ދުވަސްވަރެއްގައި މުސާރަ ބޮޑު ކުރުމަކީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވަރަށް ރަނގަޅަށް އެޅުއްވި ފިޔަވަޅެއްކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހީމް ޝަރީފު ވިދާޅުވެއްޖެެއެވެ.

ޝަރީފު މިފަދައިން ވިދާޅުވެފައިވަނީ އިންފްލޭޝަން ކޮންޓްރޯލު ކުރުމަށް ސަރުކާރުން އެކަށީގެންވާ ހަރުދަނާ ފިޔަވަޅުތަކެއް އެޅުމުގެ ބަދަލުގައި މުސާރަ ބޮޑުކުރަން ނިންމި ނިންމުމާއި ގުޅިގެން އަމާޒުވަމުންދާ ފާޑުކިޔުންތަކަށް ޓްވީޓާގައި ރައްދުދެއްވަމުން ނެވެ.

ޝަރީފު ވިދާޅުވީ ފަޑުކިޔާ ފަރާތްތަކަށް ކަމުދާ އެއްގޮތެއްވެސް ނޯންނަ ކަމަށެވެ. އެގޮތުން މުސާރަ ބޮޑު ނުކޮށްގެން މީގެ ކުރިން ފާޑުކިޔަމުންދިޔަ ފަރާތްތައް މިހާރު ފާޑުކިޔަނީ މުސާރަ ބޮޑުކޮށްގެންކަމަށް އޭނާ ވިދާޅުވިއެވެ.

އެއާއެކު ޝަރީފު ވިދާޅުވީ އިންފްލޭޝަން މައްޗަށްދާ މި ދުވަސްވަރާއި ދިމާކޮށް މުސާރައަށް ހެޔޮ ބަދަލުތަކެއް ގެނައުމުގެ ވިސްނުންފުޅަކީ އަދި އެފަދައިން ނިންމެވުމަކީ ރައީސް ޞާލިހު ވަރަށް ރަނގަޅަށް ނިންމެވި ނިންމެވުމެއްކަމަށް ގަބޫލު ކުރައްވާކަމަށެވެ.

"މުސާރަ ބޮޑުކުރިޔަސް ކަމަކު ނުދޭ. އޮތްވަރަށް ބޭއްވިޔަސް ކަމަކު ނުދޭ. ޝަކުވާއަށް ހުއްޓުމެއް ނެތް. އެހެންވިޔަސް އިންފްލޭޝަން މައްޗަށްދާ ޒަމާނެއްގައި މުސާރަ ބޮޑުކުރުން އެއީ ރައީސް ޞާލިހު ރަނގަޅަށް އެޅުއްވި ރަނގަޅު ފިޔަވަޅެއްކަމަށް އަޅުގަނޑު ގަބޫލުކުރަނީ"

މަރަދޫ ދާއިރާގެ މެމްބަރު އިބްރާހީމް ޝަރީފު

އިންފްލޭޝަން ކޮންޓްރޯލު ކުރުމަށް ސަރުކާރުން ހަރުދަނާ ފިޔަވަޅުތަކެއް ނާޅާ މުސާރަ ބޮޑުކުރަން ނިންމުމާއި ގުޅިގެން އިދިކޮޅުންވެސް ވަނީ ބޮޑެތި ފާޑުކިޔުންތަކެއް އަމާޒުކޮށްފަ އެވެ.

އެގޮތުން އިދިކޮޅު ކޯލިޝަންގައި ހިމެނޭ ޕީއެންސީގެ ނައިބުރައީސް އަދި ކުރީގެ އިކޮނޮމިކް މިނިސްޓަރު މުހައްމަދު ސައީދު ވިދާޅުވީ އިންފްލޭޝަން މަތިވެގެން ދިޔައީ ދެ ފަހަރު މަތިން ދިވެހި ފައިސާ ޗާޕުކޮށް އިގްތިޞާދަށް ނެރުމުން ކަމަށެވެ.

ނިމިދިޔަ ޑިސެމްބަރު މަހު އިންޓަނޭޝަނަލް މަނިޓަރީ ފަންޑު (އައިއެމްއެފް) އިން ވެސް ވަނީ ދިވެހި ފައިސާ ޗާޕުކުރުން ހުއްޓާލުމަށް ސަރުކާރަށް އަންގާފަ އެވެ.

އައިއެމްއެފްގެ ޗާޓަރާ އެއްގޮތްވާ ގޮތުގެ މަތިން ދިވެހި ސަރުކާރާއެކު ހަދަންޖެހޭ އެގްޒެކެޓިވް ބޯޑުގެ ކޮންސަލްޓޭޝަން ނިންމައި އެ އިދާރާގެ ވެބްސައިޓުގައި ޝާއިއުކޮށްފައިވާ ބަޔާނުގައި އައިއެމްއެފް އިން ވަނީ އިންފްލޭޝަން ކޮންޓްރޯލް ކުރުމަށާއި، ފައިސާގެ އަގު ދަށްވެ ނުދީ ހިފެހެއްޓުމަށް ފައިސާ ޗާޕުކުރުން ނިމުމަކަށް ގެނައުމަށް ސަރުކާރަށް ގޮވާލާފައެވެ. އަދި ފައިސާ ޗާޕުކުރުން ހުއްޓާ ނުލައިފިނަމަ ދިވެހިރާއްޖެއަށް އިގްތިސާދީ ގޮތުން ދަތިތަކާއި ކުރިމަތިލާން ޖެހޭނެ ކަމަށް ބުނެފައިވެއެވެ.

އެގޮތުން ހަކަތައިގެ އަގުތަކާއި، ކާބޯތަކެތީގެ އަގުތައް އުފުލެމުން ދިިޔުމާއި، އަންނަ އަހަރު ބާއްވާ ރިޔާސީ އިންތިޚާބާއެކު ޚަރަދުކުރުންތައް އިތުރުވާނެތީ، އިންފްލޭޝަން ރޭޓު 4.9 އިންސައްތައަށް އަރާނެ ކަމަށް އައި.އެމް.އެފްއިން ލަފާކޮށްފައި ވެއެވެ.