މުޅި ސޯޝަލް ސެކިއުރިޓީގެ ނިޒާމުން ގިނަ މައްސަލަތަކެއް ފާހަގަކުރެވިފައިވޭ: މިއުވާން

ޖުމްލަކޮށް މުޅި ސޯޝަލް ސެކިއުރިޓީގެ ނިޒާމް ހަރުދަނާ ކުރުމަށް ވަރަށް ގިނަ މަސައްކަތް ތަކެއް މިހާރުވެސް ކުރެވިފައިވާ ކަމަށް ރައީސް އޮފީހުގެ ތަަރުޖަމާން މުހައްމަދު މިއުވާން ވިދާޅުވެއްޖެއެވެ.

މިއުވާން މިހެން ވިދާޅުވީ އިއްޔެ ރައީސް އޮފީހުގައި ބޭއްވުނު ނޫސްވެރިންގެ ބައްދަލުވުމެއްގައެވެ. މިއުވާން މިހެން ވިދާޅުވީ އާސަންދައިގެ ޚިދްމަތާއި ގުޅޭ ގޮތުން ނުސްވެރިޔަކު ކުރި ސުވާލަކަށް ޖަވާބު ދެއްވަމުންނެވެ.

އެގޮތުން މިއުވާން ވިދާޅުވީ ރައްޔިތުންނަށް ހިލޭ ބޭސްފަރުވާ ކޮށްދޭ ޤައުމީ ހެލްތް އިންޝުއަރެންސް ސްކީމް، އާސަންދައިގެ ހަރަދުތައް ކުޑަ ކުރުމަށް ކުރަމުންދާ މަސައްކަތްތައް ނިމުމުން، އާސަންދައިން ކުރާ ހަރަދު ވަރަށް ބޮޑުތަނުން ކުޑަ ކުރެވޭނެ ކަމަށެވެ. އަދި މުޅި ސޯޝަލް ސެކިއުރިޓީ ނިޒާމަކީ ފެށުނީއްސުރެވެސް ހަރަދު ބޮޑު ނިޒާމެއް ކަމަށާއި، އަދި މީގެ ތެރެއިން ވަރަށް ގިނަ މައްސަލަތަކެއް ފަހަގަ ކުރެވިފައިވާ ކަމަށް މިއުވާން ވިދާޅުވިއެވެ.

އެހެން ނަމަވެސް ހަރަދު ކުޑަ ކުރުމަށާއި، މި މައްސަލަ ހައްލު ކުރުމަށް މީގެ ކުރިން މާބޮޑެތި މަސައްކަތަަކެއް ކުރެވިފައެއް ނެތް ކަމަށާއި، އެހެން ނަމަވެސް އާސަންދަ އިން ކުރާ ހަރަދުތައް ކުޑަ ކުރުމަށް ސަރުކާރުން މިއަހަރު ތެރޭގައި މަސައްކަތްތަކެއް  ކުރިއަށް އެބަ ގެންދާ ކަމަށް މިއުވާން ވިދާޅުވިއެވެ.

އެގޮތުން ޖުމްލަކޮށް މުޅި ސޯޝަލް ސެކިއުރިޓީގެ ނިޒާމް ހަރުދަނާ ކުރުމަށް ވަރަށް ގިނަ މަސައްކަތްތަކެއް މިހާރުވެސް ކުރެވިފައިވާ ކަަމަށާއި، އޭގެ ތެރެއިން ސޯޝަލް ކައުންސިލަށްވެސް ބައެއް ކަންކަން ހުށަހެޅިފައިވާ  ކަމަށް މިއުވާން ވިދާޅުވިއެވެ.

"އެ ކަންތައްތަކާއި މެދު ބަހުސް ކުރެވި ކަމާއި ގުޅޭ އިދާރާތަކުގެ މެދުގައި މަޝްވަރާ ކުރުމަށްފަހު، މާ ގިނަ ދުވަސްތަކެއް ނުވެ އެ ބަދަލުތައް އިމްޕްލިމެންޓް ކުރެވިގެން ދާނެ، އަދި އިމްޕްލިމެންޓް ކުރެވިގެން ދިޔައީމަ އާސަންދައިން ކުރާ ހަރަދު ވަރަށް ބޮޑުތަނުން ކުޑަ ކުރެވޭނެ" މިއުވާން ވިދާޅުވިއެވެ.

އާސަންދައަށް ހަރަދުކުރަން މިއަހަރު ބަޖެޓް ކުރި 1.04 ބިލިޔަން ރުފިޔާގެ ތެރެއިން މިހާރު ބާކީ އޮތީ 237.8 މިލިޔަން ރުފިޔާ ކަމަށް އާންމުކޮށްފައިވާ ތަފާސް ހިސާބުތަކުން ހާމަވެފައި ވެއެވެ. އެހެންކަމުން  މިއަހަރު މިހާރު އާސަންދަ އަށް 807.2 މިލިއަން ރުފިޔާ ހަރަދު ވެއްޖެއެވެ.