އާސަންދަ މެދުވެރިކޮށް ދައުލަތުގެ ބަޖެޓުން އާއްމު މީހާއަށް ކުރާ ޚަރަދު، މަޖިލިސް މެންބަރުންނަށްވުރެ އިތުރު: ފަލާޙު

ރައްޔިތުންގެ މަޖިލީހުގެ މެންބަރުންނަށް ހަމަޖައްސާފައިވާ ހެލްތު އިންޝުއަރެންސް ޕެކޭޖަށް އާސަންދައިން ކުރާ ޚަރަދަށްވުރެ، އާސަންދަ ނިޒާމުގެ ތެރެއިން އާންމު ރައްޔިތަކަށް ދައުލަތުގެ ބަޖެޓުން ކުރާ ހޭދަ މާ ބޮޑު ކަމަށް ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރު އަދި މެޖޯރިޓީ ލީޑަރު އިބްރާހިމް ފަލާޙު ވިދާޅުވެއްޖެއެވެ.

ފަލާޙު މިހެން ވިދާޅުވީ، ރައްޔިތުންގެ މަޖިލީހުގެ މެންބަރުންނާއި އެ ބޭފުޅުންގެ އާއިލާތަކަށް ދައުލަތުގެ ބަޖެޓުން ދެމުން އަންނަ ޚާއްސަ ހެލްތު އިންޝުއަރެންސް އުވާލައި، އާންމު ރައްޔިތުންނެކޭ އެއްފަދައިން އާސަންދަ ޚިދުމަތް ލިބޭ ބަޔަކަށް މެންބަރުން ބަދަލުކުރުމަށް ގޮވާލައި އާންމު ރައްޔިތަކު މަޖިލީހަށް ހުށަހެޅި އީ-ޕެޓިޝަނަށް މިއަދުގެ ޖަލްސާގައި ވާހަކަދައްކަވަމުންނެވެ.

މަޖިލީހުގެ މިއަދުގެ ބަހުސްގައި ވާހަކަދައްކަވަމުން ފަލާޙު ވިދާޅުވީ، މަޖިލިސް މެންބަރެއްގެ އިންޝުއަރެންސް ޕެކޭޖަށް ދައުލަތުން އަހަރަކު ޚަރަދުކުރަނީ ކުޑަ އަދަދެއް ކަމަށެވެ.

"ރައްޔިތުން މަޖިލީހުގެ މެމްބަރަކަށް ސައުވީސްހާސް ރުފިޔާ އަހަރަކު ދައްކާފަ، އޭގެ އިތުރުން މެމްބަރަކު ކިތަންމެ ބޮޑު ހަރަދެއް ކުރިޔަސް އެއީކީ ދައުލަތުގެ ބަޖެޓުން ކުރާ ހަރަދެއް ނޫން. އެހެން ނަމަވެސް މީގަ އަނެއްކޮޅަށް ބަލާފިކަމަށް ވަންޏާ، އާސަންދަ ނިޒާމުގަ، އަޅުގަނޑަށްވެސް، ދިވެހި ކޮންމެ ރައްޔިތަކަށްވެސް މި ހަރަދުކުރަނީ މިވަގުތު އެ ނިޒާމުގެ ގޮތުން ހަމަ ސީދާ ދައުލަތުގެ ބަޖެޓުން،" ފަލާޙު ވިދާޅުވިއެވެ.

ފަލާޙު އިތުރަށް ވިދާޅުވީ، އިންޝުއަރެންސް ޕެކޭޖުގެ ތެރެއިން މެންބަރަކަށް އަހަރަކު ތޭރަ ލައްކަ ފަންސާސް ހާސް ރުފިޔާގެ ޚިދުމަތް ލިބުނު ނަމަވެސް، އެއީ ސީދާ ދައުލަތުގެ ބަޖެޓުން ދައްކާ ފައިސާއެއް ނޫން ކަމަށެވެ. އަދި ދައުލަތުން މެންބަރެއްގެ ބޮލަކަށް ދައްކަނީ އިންޝުއަރެންސް ޕްރީމިއަމްގެ ގޮތުގައި އަހަރަކު އެންމެ 24،000 ރުފިޔާ ކަމަށް އޭނާ ފާހަގަކުރެއްވިއެވެ.

އާސަންދައިގެ ނިޒާމާ އަޅާކިޔުއްވަމުން ފަލާޙު ވިދާޅުވީ، އާންމު ރައްޔިތަކަށް ކެންސަރު ފަދަ ނުރައްކާތެރި ބޮޑު ބައްޔެއް ޖެހިއްޖެ ހާލަތެއްގައި "ހުސްނުވާ އާސަންދަ" ގެ ތެރެއިން އެތައް މިލިއަން ރުފިޔާއެއް ދައުލަތުގެ ބަޖެޓުން ސީދާ ޚަރަދުވާ ކަމަށެވެ.

"މިސާލަކަށް ބޮޑު ބައްޔެއް މީހަކަށް ދިމާވި، ދިވެހިރައްޔިތަކަށް. މިސާލަކަށް ކެންސަރު ނޫނިއްޔާ މިފަދަ ބޮޑު ނުރައްކާތެރި ބައްޔެއް ދިމާވި. ހިނގައިދާނެ އަހަރަކު ހަ މިލިއަން ރުފިޔާވެސް. ހުސްނުވާ އާސަންދަ މި އޮތީ. އެ ހަ މިލިއަންވެސް، ހަތް މިލިއަންވެސް، ދިހަ މިލިއަންވެސް ހަރަދުވާނީ ހަމަ ދައުލަތުގެ ބަޖެޓުންނޭ. އާސަންދަ ނިޒާމުގެ. އެހެންވީމަ ބަލާލަން އެބަޖެހޭ މީ ކޮން ނިޒާމެއްގަ ތޯ މި ދައުލަތަށް ގެއްލުންކުޑަ ވެގެން މިދަނީ،" ފަލާޙު ވިދާޅުވިއެވެ.

ފަލާހް އިތުރަށް ވިދާޅުވީ، މަޖިލިސް މެންބަރުންނަށް އިންސްޝުއަރެންސް ލިބޭ ގޮތަށް އޮތުމުން ބަޖެޓަށް ވާނީ ލުއި ކަމަށާ، އެ ކަމާ ގުޅޭ ގޮތުން ޕެޓިޝަން ހުށަހަޅަނީ ފިތުނަ އުފައްދަން ކަމަށެވެ.

މަޖިލީހަށް ހުށަހަޅާފައިވާ އީ-ޕެޓިޝަނަކީ ރައްޔިތުންގެ މަޖިލީހުގެ އިމްތިޔާޒުތަކާއި ބާރުތަކުގެ ޤާނޫނުގެ ދަށުން، މިހާރުގެ މެންބަރުންނާއި ކުރީގެ މެންބަރުންގެ އިތުރުން އެ ބޭފުޅުންގެ އަނބިދަރިންނަށް ރާއްޖެއާއި ސާކް އަދި އާސިއާންގެ ގައުމުތައް ހިމެނޭހެން 19 ގައުމަކުން އުމުރުދުވަހަށް ލިބޭ ވީއައިޕީ ހެލްތު އިންޝުއަރެންސް އުވާލުމަށް އެދި ހުށަހަޅާފައިވާ ޕެޓިޝަނެކެވެ.

އެ ޕެޓިޝަންގައި ފާހަގަކޮށްފައިވާ ގޮތުގައި، 2015 އިން 2025 އާ ދެމެދު މެންބަރުންގެ އިންޝުއަރެންސް ޕްރީމިއަމަށް އެކަނިވެސް ދައުލަތުގެ ބަޖެޓުން 100 މިލިއަނެއްހާ ރުފިޔާ ވަނީ ޚަރަދުކޮށްފައެވެ. އަދި އާންމު ރައްޔިތުންނަށް ނުލިބޭ މިފަދަ ޚާއްސަ އިނާޔަތްތަކެއް ރައްޔިތުންގެ ޓެކްސް ފައިސާއިން މެންބަރުންނަށް ދިނުމަކީ ބަލައިގަނެވޭނެ ކަމެއް ނޫން ކަމަށާއި، މެންބަރުންނަކީވެސް އާންމުންނެކޭ އެއްފަދައިން އާސަންދައާއި އެންސްޕާގެ ނިޒާމުގެ ތެރެއިން ސިއްހީ ޚިދުމަތް ހޯދާ ބަޔަކަށް ހެދުމަށް އެ ޕެޓިޝަނުގައި ވަނީ ގޮވާލާފައެވެ. ސަބަބަކީ ގައުމުގެ އަސާސީ ސިއްހީ ނިޒާމު ރަނގަޅުކުރުމަށް މަސައްކަތް ކުރެވޭނީ، އާންމު ރައްޔިތުން ތަހައްމަލުކުރާ ތަކުލީފުތައް މަޖިލިސް މެންބަރުންނަށްވެސް ތަޖުރިބާ ކުރެވިގެން ކަމަށްވާތީއެވެ.