މިއަދު ހުށައެޅިފައިމިވާ އަސްލު މައްސަލައަކީ ރައީސް ޞާލިޙްގެ ކާމިޔާބީ ހަޖަމު ނުވުމުގެ މައްސަލަ: ރޮޒޭނާ
މިއަދު ހުށައެޅިފައިމިވާ އަސްލު މައްސަލައަކީ ރައީސް އިބްރާހިމް މުޙައްމަދު ޞާލިޙްގެ ކާމިޔާބީ ހަޖަމު ނުވުމުގެ މައްސަލަ ކަމަށް ރައްޔުތުން މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވިދާޅުވެއްޖެއެވެ.
ރޮޒައިނާ މިހެން ވިދާޅުވެފައިވަނީ މިއަދު މަޖިލީހަށް ހުށައެޅުނު ބަންޑާރަ ނައިބު އިބްރާހިމް ރިއްފަތުގެ އިތުބާރު ނެތް ކަމުގެ މައްސަލާގައި ވާހަކަ ދައްކަވަމުންނެވެ.
"މިއަދު މި ހުށައެޅިފައިވާ އަސްލު މައްސަލައަކީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙުގެ ވެރިކަމުގެ ކާމިޔާބީ ހަޖަމު ނުވެގެން އުޅޭ މައްސަލަ، މިއަދު ހުށައެޅިފައިވާ އަސްލު މައްސަލައަކީ އެމްޑީޕީގެ ޕްރައިމަރީ ހަޖަމު ނުވެގެން އުޅޭ މައްސަލަ، މިއަދު ހުށައެޅިފައިވާ މައްސައަކީ ވެރިކަމުގައި މުޅި ޤައުމަށް ތަރައްޤީ ގެނެސްދީ ހަމަހަމަކަން ގެނެސްދީ އިންސާފު ގެނެސްދީ އަމާންކަން ގެނެސްދީ، މިކަންކަން މިހެން ދާން ފެށީމަ ދެން ވެރިކަމަށް ފާރަލައިގެން ހުރި އެއްވެސް މީހަކަށް ކުރިއަށް އޮތް ރިޔާސީ ކާމިޔާބު ނުވާނެ ކަމުގެ ޔަޤީންކަން ލިބުނީމަ އެކަމާ ދޭތެރޭކުރާނެ ކަމެއް ނޭނގިގެން އުޅޭ މައްސަލަ" ރޮޒޭނާ މަޖިލީހުގައި ވިދާޅުވިއެވެ.
މިއަދުގެ މަޖިލީހަށް ބަންޑާރަ ނައިބުގެ އިތުބާރު ނެތް ކަމުގެ މައްސަލަ ހުށައެޅުމުގެ ކުރިންވެސް މަޖިލިސް ހޫނުވެ މަޖިލިސް މެދުކަނޑާލައިފައިވެސްއެވެ.
ބަންޑާރަ ނައިބު ރިއްފަތުގެ އިތުބާރު ނެތް ކަމުގެ މައްސަލަ މަޖިލީހަށް ހުށައަޅައިފައިވަނީ ދިވެހިރާއްޖެއާއި ރާއްޖޭގެ ދެކުނުން އޮންނަ ޗާގޯސް އާއި ދެމެދު ފުށުއަރާ ސަރަހަދެއް އޮތްކަމަށް ބުނެ މޮރިޝަސްއިން އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އަށް ހުށައެޅި މައްސަލައިގައި ދައުލަތުގެ ބަންޑާރަނައިބު ވަކާލާތުކޮށްފައިވަނީ ރާއްޖެއާއި ރައްޔިތުންގެ މަސްލަހަތު އިސްކޮށްގެން ނޫންކަން ފެންނަންހުރި ހެކިތަކުން ސާފުވާތީކަމަށް ބުނެ އެވެ.
މިމައްސަލަ މަޖިލީހަށް ހުށައަޅައިފައިވަނީ ކަނޑު ވިއްކުމާއި ދެކޮޅަށް ހަދައިފައިވާ ގުޅިފައިވާ އިއްތިހާދުންނެވެ.
ފާއިތުވި ހަފްތާގައި މިމައްސަލައިގައި ޖަވާބުދާރީ ވުމަށް މަޖިލިހަށް ވަޑައިނުގަނެ ބަންޑާރަ ނައިބު ރިއްފަތު ޖަވާބު ދެއްވާފައިވަނީ ލިޔުމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
