ޢިލްމުވެރިންގެ ގުޅުމުގެ، އަދާލަތުގެ 15 ޝެއިޚުންގެ ތެރެއިން ރައީސް ޞާލިހަށް ތާއީދު ކުރީ 5 ޝެއިޚުން!

ކުރިއަށް އޮތް ރިޔާސީ އިންތިހާބުގައި ދިވެހިރާއްޖޭގެ ގިނަ ދީނީ އިލްމުވެރިން ހިމެނޭ ޖަމިއްޔާ، އިލްމުވެރިންގެ ގުޅުމުން ތާއިދުކުރާނެ ކެންޑިޑޭޓެއް ކަނޑައެޅުމަށް ނެގި ވޯޓުން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް ތާއީދު ކުރެއްވީ އެންމެ 5 އަދާލަތުގެ ޝެއިޚުން ކަން ހާމަވެއްޖެއެވެ.

ދިވެހިރާއްޖޭގެ ރައީސްކަމަށް ކުރިމަތިލެއްވި ރިޔާސީ ކެންޑިޑޭޓުންގެ ސިޔާސަތުތައް ދިރާސާކުރުމަށް ޓަކައި ޢިލްމުވެރިންގެ ގުޅުމުން އެފަރާތްތަކާ ވަނީ މީގެ ކުރިން ބައްދަލުކޮށްފައެވެ. މި ބައްދަލުވުންތަކަށްފަހު އެކުލަވައިލި ރިޕޯޓު އެ ގުޅުމުގެ މެންބަރުންނަށް ހުށައެޅުމަށް ރިޔާސީ އިންތިހާބުގައި ތާއީދު ކުރާނެ ކެނޑިޑޭޓެއް ކަނޑައެޅުމަށް އިލްމުވެރިންގެ ގުޅުމުގެ ވައިބަރ ގްރޫޕްގައި ވޯޓަށް އަހައިފައިވެއެވެ.

މި ރިޕޯޓް ތައްޔާރުކޮށް ހުށައެޅީ ރާއްޖޭގެ އެކިކަންކޮޅުތަކުގައި ޢިލްމުވެރިންނަށް ބޭއްވި އޮންލައިން ބައްދަލުވުންތަކުގެ ތެރެއިންނެވެ.

އަދި ކެންޑިޑޭޓުންގެ ތެރެއިން އެންމެ ރަނގަޅު ފަރާތެއް ކަނޑައެޅުމަށް ޓަކައި ވޯޓަށް އަހާފައިވަނީ ޢިލްމުވެރިންގެ ގުޅުމުގެ ކޮމިއުނިޓީ ވައިބާ ގްރޫޕުގައެވެ.

ޢިލްމުވެރިންގެ މެދުގައި ނެގި ޕޯލް އިން ޑރ. މުޙައްމަދު މުއިއްޒަށް ޢިލްމުވެރިންގެ 87 އިންސައްތަ ތާއީދު އޮތްކަން އެނގެއެވެ.

މިޕޯލްގެ 8 ޕަސެންޓާއި އެކު ޢުމަރު ދެވަނަޔަށް ދިޔައިރު މިވަގުތު ރާއްޖޭގެ ރައީސުލް ޖުމްހޫރިއްޔާ އިބްރާހީމް މުޙައްމަދު ސާލިހަށް ލިބިފައިވަނީ އެންމެ 5 ވޯޓެވެ.

ސަރުކާރާއި އެކު ކޯލިޝަން ހަދައި، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް ދެވަނަ ދައުރެއް ދިނުމަށް މަސައްކަތް ކުރަމުންދާ އަދާލަތު ޕާޓީގެ 15 ޝެއިޚުން އިލްމުވެރިންގެ ގުޅުމުގައި ތިބެއެވެ. އޭގެ ތެރެއިން، ރައީސް ޞާލިހު ވެރިކަމަށް ގެންނަން އެއްބަސް ވީ އެންމެ 5 ޝެއިޚުންނެވެ.

ޢިލްމުވެރިންގެ ތާއީދު ރައީސް ސޯލިހަށް ގެއްލެން މެދުވެރިވި ވަރަށް ގިނަ ސަބަބުތައް ހުރިކަމަށް ރޭ ބޭއްވި ބައްދަލުވުމުގައި ޢިލްމުވެރިން ފާހަގަ ކުރިއެވެ.

މިގޮތުން މިދައުރުގައި އެމް.ޑީއެން. ރިޕޯޓާއި ގުޅިގެން ( މާތް الله އާއި އެކަލާނގެ ރަސޫލާއަށް ފުރައްސާރަކުރި ފަރާތްތަކަށް) ފިޔަވަޅު ނޭޅުމުގެ އިތުރުން އެފަރާތްތަކަށް ބޮޑެތި ވަޒީފާތައް ދީ އެވަޒީފާތަކުގައި ދެމިތިބުން ހިމެނެއެވެ. އަދި ހަމަ އެޔާއި އެކު ރާއްޖޭގައި ޝިރުކުގެ ޢަމަލުތައް ފާޅުގައި ހިންގުމަށް ކުރަމުން އަންނަ މަސައްކަތް ނުހުއްޓުވުމާއި މިސްކިތްތަކަށާއި މުސްހަފްތަކަށް ގެއްލުންދިން މީސްމީހުންނާއި މެދު ޢަމަލުކުރި ގޮތުން ޢިލްމުވެރިންގެ ހިތްހަމަ ނުޖެހުން ރައީސް ސޯލިހަށް އަމާޒުވީއެވެ.

އެ ސަބަބުތަކާއި ހުރެ، ޢަދާލަތު ޕާޓީގެ ވަރަށް ގިނަ ޢާއްމު މެންބަރުންވެސް މިހާރު ރައީސް ޞާލިހަށް ތާއީދެއް ނުކުރެއެވެ.