އއ. އަތޮޅުގެ ފުރަތަމަ އެއާޕޯޓް، މުއިއްޒުގެ ވެރިކަމެއްގައި މަތިވެރީގައި އަޅަން ވަޢުދުވެވަޑައިގެންފި!

އއ. އަތޮޅުގެ ފުރަތަމަ އެއާޕޯޓް އެ އަތޮޅު މަތިވެރީގެ ފަޅު ހިއްކައިގެން އެ ތަނުގައި ހަދަން ޕީޕީއެމް/ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު މިއަދު ވައުދުވެވަޑައިގެންފި އެވެ.

މިއަދު މަތިވެރީގައި ބޭއްްވި ކެމްޕެއިން ޖަލްސާގައި ވާހަކަ ދައްކަވަމުން މުޢިއްޒު ވިދާޅުވީ، ދިވެހި ރައްޔިތުން ދެކެން ބޭނުންވާ ދުވަހަކީ، ކުރީގެ ރައީސް ޔާމިން އަބްދުލްގައްޔޫމް ގެ ވެރިކަމުގައި ގެނެވުނު ތަރައްގީގެ ދުވަސްތައް ކަމަށެވެ.

އަދި މިވެރިކަމުގައި ހުރިހާ ރަށެއްގައިވެސް ފަށާފައިވާ ގިނަ މަޝްރޫއުތައް ހުރީ ނުނިމި ކަމަށާ، އެކަންކަން އެމަނިކުފާނުގެ ވެރިކަމުގައި ހުއްޓާލާނެ ކަމަށް މިސަރުކާރުން ބުނަމުންދާ ކަމަށް މުޢިއްޒު ވިދާޅުވިއެެވެ. އެހެން ނަމަވެސް، އެމަނިކުފާނާއި، ޕީޕީއެމް/ޕީއެންސީގެ އަކީ ތަރައްގީއަށް ލޯބި ކުރާ ބައެއް ކަމަށާ، އެހެން ކަމުން އެފަދަ އެއްވެސް މަޝްރޫއެއް ނުހުއްޓަވާނެ ކަމަށް މުޢިއްޒު ވިދާޅުވިއެެވެ.

އެއްވެސް ރަށެއްގައި، ފެށިފައި، ފަށަން ނިންމާފައި ހުރި އެއްވެސް މަޝްރޫޮއެއް އަޅުގަނޑުމެން ހުއްޓައެއް ނުލާނަން. އޭގެ ބަދަލުގައި ރައްޔިތުން ބޭނުންވާ ބަދަކު ގެނެސްދީގެން ގެންގޮސް ނިންމައި ދީ އަވަހަށް އޭގެ ފައިދާ ރައްޔިތުންނަށް ވާނެގޮތް ހަދައިދޭނަން.

ޑރ. މުހައްމަދު މުޢިއްޒު

މުޢިއްޒު އިތުރަށް ވިދާޅުވީ އއ އަތޮޅުގައި ފަތުރުވެރިކަން އިތުރަށް ތަރައްގީ ކުރުމަށް އެމަނިކުފާނުގެ ވެރިކަމެއްގައި މަސައްކަތް ކުރައްވާނެ ކަމަށެވެ. އެގޮތުން އެކަމަށް ބޭނުންވާ އެންމެ މުހިންމު ކަމަކީ އެ ސަރަހައްދުގައި އެއާޕޯޓެއް ހެދުންކަންވެސް މުޢިއްޒު ފާހަގަކުރެއްވި އެވެ.

އެހެންކަމުން އިންތިހާބު ކާމިޔާބު ވެއްޖެނަމަ، މަތިވެރި ފަޅު ހިއްކައިގެން ރިސޯޓް ހަދައި ވަރަށް އަވަހަށް ނިންމައިދޭނެ ކަމަށް މުޢިއްޒު ވަނީ ވައުދުވެވަޑައިގެންފަ އެވެ. އަދި އެއާޕޯޓަށް ބިން ހިއްކާއިރު، އެ ކަން ކުރާނީ ރަށަށް ބޭނުންވާ ވަރަށް ބިން ހިމަނައިގެން ކަމަށް ވެސް މުއިއްޒު ވިދާޅުވި އެވެ.

"މި ރަށުގައި ބިމެއް ނެތް، ހުސްވެފައި އޮތީ. މުސްތަގްބަލަށް ބޭނުންވާ ޖާގަ އާއި ގެދޮރަށް ބޭނުންވާ ޖާގައާ އެކީގައި އެއާޕޯޓާ އެކީގައި ރަށަށް ބޭނުންވާ ބިމާ އެކީގައި ހިއްކާ ގޮތަށް،" މުއިއްޒު ވިދާޅުވި އެވެ.