އިންތިހާބީ ރައީސްގެ ސިޓީއެއް ރައީސް ޞާލިހަށް؛ އެދިލެއްވީ ސަރުކާރުން ހަތް ކަމެއް މަޑުޖައްސާލަން!

އިންތިޤާލީ މަރުހަލާ ފަށައިގެން މިހާރު ކުރިއަށް ގެންދާއިރު، ސަރުކާރުން މި ވަގުތު ހަތް ކަމެއް މަޑުޖައްސާލަން އެދިވަޑައިގެން އިންތިހާބީ ރައީސް ޑރ. މުހައްމަދު މުއިއްޒުގެ ސިޓީފުޅެއް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހަށް ފޮނުއްވައިފަ އެވެ.

ރައީސް ޞާލިޙަށް ޑރ.މުޢިއްޒު އިއްޔެ ފޮނުއްވި ސިޓީއެއްގައި އެމަނިކުފާނު ވަނީ އިންތިޚާބު ކާމިޔާބުކުރެއްވުމާ ގުޅިގެން ރައީސް ޞާލިހު ދެއްކެވި ޑިމޮކްރެސީގެ ރިވެތި ނަމޫނާއަށްޓަކައި ޝުކުރު އަދާކުރެއްވާފައެވެ. އަދި އައު ސަރުކާރަށް ބާރުތައް ހަވާލުކުރެއްވުމުގެ ކަންކަން އޮމާންކަމާއެކު ގެންދެއްވުމަށް ބޭނުންވާ ހުރިހާ އެހީތެރިަކަމެއް ދެއްވާނެކަމުގެ ޔަގީންކަން ރައީސް ޞާލިހް ދެއްވުމަކީ ނުހަނު ޝުކުރުވެރިކަމާއެކު ބަލައިގަންނަ ކަމެއް ކަމުގައިވެސް ޑރ މުޢިއްޒު ވިދާޅުވުވިއެވެ.

އެކަން ކަމުގެ މަތީގައި ސަރުކާރާ ހަވާލުވުމުގެ ކަންކަން ވިލަރެސްކުރައްވަމުން ގެންދަވާކަން ފާހަގަކުރައްވާ މުއިއްޒު ވަނީ ހަތް ކަމަކަށް ރައީސް ޞާލިހުގެ ކިބައިން އެދިވަޑައިގެންފަ އެވެ. އެއީ:

1- ދައުލަތުގެ އެއްވެސް މުއައްސަސާއަކުން އައު އިންވެސްޓުމެންޓެއް ނުކުރުން

2- ދައުލަތުގެ އެއްވެސް ބިމެއް ތަރައްޤީކޮށް ވިއްކުމުގެ އައު ހުއްދައެއް ނުދިނުން

3- ދައުލަތުގެ އެއްވެސް މުދަލެއްގެ މިލްކުވެރިކަން އެހެން ފަރާތަކަށް ބަދަލުނުކުރުން

4- ބައިނަލްއަޤުވާމީ މުއާހަދާތަކާއި އެއްބަސްވުންތަކުގައި ސޮއިނުކުރުން

5- ޕީއެސްއައިޕީ އަދި އެހެންވެސް ޕްރޮގުރާމެއްގެ ދަށުން އައު ޕްރޮޖެކެޓެއް ނުފެށުން

6- ދައުލަތުގެ އެއްވެސް މުއައްސަސާއެއްގެ މުސާރައިގެ އޮނިގަނޑަށް އެއްވެސް ބަދަލެއް ނުގެނައުން

7- ދައުލަތުގެ އެއްވެސް ވަޒީފާއަކަށް އަލަށް މީހަކު ނުވެއްދުން އަދި މަޤާމުގެ ކުރިއެރުން ނުދިނުން

އިންތިޚާބީ ރައީސް، ސަރުކާރުގެ ކިބައިން މި ކަންކަމަށް އެދިވަޑައިގެންފައިވާއިރު ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުންވެސްވަނީ ސަރުކާރު ކުންފުނިތަކުން ބައެއް ކަންކަން ހިންގުން މަނާކޮށްފައެވެ.